ވޭޕު މަނާކުރުމުން މުޖުތަމަޢުގައި ރިވެތި އަޚުލާޤު އަށަގެންނެވި، ވަށައިޖެހޭ ތަރައްޤީއެއް ގެނެވޭނެ: ރައީސް

ރާއްޖޭގައި ވޭޕު ބޭނުންކުރުމާއި ވިއްކުން މަނާކުރެވުމާއެކު ދިވެހި މުޖުތަމަޢުގައި ރިވެތި އަޚުލާޤު އަށަގެންނެވި، ދިވެހިރާއްޖެއަށް ވަށައިޖެހޭ ތަރައްޤީއެއް ގެނެވޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހުރިއްޔާ މިހެން ވިދާޅުވީ އަރިއަތޮޅު ދެކުނުބުރިއަށް މިހާރު ކުރައްވަމުން ގެންދަވާ ދަތުރުފުޅުގައި މަހިބަދޫއަށް ވަޑައިގެން ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

އދ. މަހިބަދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ޤައުމެއް ތަރައްޤީވެ ކުރިއަރާ ދިޔުމުގައި އެ ތަނެއްގައި އުޅޭ މީހުން ފިކުރީ ގޮތުން ތަރައްޤީކުރުން މުހިންމު ކަމަށެވެ. އެގޮތުން ކުރިން ދިވެހިންގެ ކިބަގައި ހުރި ރީތި ސިފަތައް އަލުން އަށަގެންނެވުމާއެކު އިސްލާމީ ރިވެތި އުޞޫލްތައް ދިވެހިންގެ ކިބައިގައި އަށަގެންނެވުމަށް މަސައްކަތްކުރައްވަމުން ގެންދަވާކަމަށް ރައީސް ވިދާޅުވިއެވެ. މިގޮތުން ގިނަ އަދަދެއްގެ ދިވެހި ޒުވާނުންނާއި ކުޑަކުދިން ދެވިހިފާފައިވާ ވޭޕްގެ ނުބައި ޢަމަލުކުރުން މަނާކުރުކަށް ނިންމެވީވެސް މުޖުތަމަޢުގެ އަޚުލާޤީ ފޭރާން ވަރުގަދަކުރުމަށްކަން ރައީސް ފާހަގަކުރެއްވިއެވެ.

ވޭޕް ބޭނުންކުރުމުން އިންސާނާގެ ޞިއްޙަތަށް ގެއްލުންވެ، ވިސްނުން ކޮށިވެ، އިންސާނާގެ ޢާންމު އުޅުމަށް ނޭދެވޭ އަސަރުކުރާކަން ތަޖުރިބާކާރުން ފާހަގަކުރެއެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގައި ވޭޕް ބޭނުންކުރުމާއި ހިލޭބެހުމާއި ވިއްކުން މަނާކުރަން ނިންމެވީ ރައްޔިތުންގެ އެދެމުގެ މަތިން ކަމަށެވެ. އަދި މި ނިންމުމާއެކު ރިވެތި އަޚުލާޤު އަށަގެންނެވި ފިކުރީ ގޮތުން މީހުން ތަރައްޤީވެ، ވަށައިޖެހޭ ތަރައްޤީއެއް ޤައުމަށް ގެނެވޭނެކަމަށް ރައީސް ވިދާޅުވިއެވެ.

"ރައްޔިތުން އެދެމުންދިޔައީ ޤައުމުގެ ދަރިން ވޭޕްގެ ވަބާއިން ސަލާމަތްކޮށްދޭށޭ. އެއީ ވަށައިޖެހޭ ތަރައްޤީ ގެނައުމަށްކުރާ މަސައްކަތެއް. ޞިއްޙީ ގޮތުން ޒުވާނުންނާއި ޢާންމު ރައްޔިތުން ސަލާމަތްވެގެން ތިވބެގެން ނޫނިއްޔާ ޤައުމަށް އެއްވެސް ކަމެއް ނުކޮށްދެވޭނެ. ޤައުމެއް ކުރިނާރާނެ." ރައީސް ވިދާޅުވިއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނެވުނު އިސްލާޙުތަކާއެކު ރާއްޖޭގައި ވޭޕް ބޭނުންކުރުމާއި ވިއްކުމާއި ހިލޭބެހުން މިއަދުން ފެށިގެން ވަނީ މަނާވެފައެވެ. އަދި ޤާނޫނާ ޚިލާފަށް މިއިންއެއްވެސް ކަމެއް ކޮށްފިނަމަ، ބޮޑެތި އަދަދުތަކުން ވަނީ ޖޫރިމަނާ ކަނޑައަޅާފައެވެ.