ރައީސް މުޢިއްޒުގެ ވެރިކަމުގައި ހަކަތައިގެ ސިނާއަތުގެ ކުރިމަގު ފެންނަނީ ވަރަށް އުޖާލާކޮށް: ފަހުމީ

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަމުގައި ހަކަތައިގެ ސިނާއަތުގެ ކުރިމަގު އޮތީ ވަރަށް އުޖާލާކޮށްކަމަށް ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއެެވެ. ފަހުމީ މިހެން ވިދާޅުވީ ސްޓެލްކޯއަށް 75 އަހަރު ފުރުމާއި ގުޅިގެން ސޯޝިއަލް މީޑިއާގައި ޙިއްސާކުރެއްވި ޕޯސްޓެއްގައެވެ.

މީގެ 75 އަހަރު ކުރިން ސްޓެލްކޯ އުފެދި އެ ކުންފުނިން ފޯރުުކޯށްދޭ ޚިދުމަތާއި ހިންގުމަށް ވަނީ ބޮޑެތި ކުރިއެރުންތަކެއް އައިސްފައެވެ. އެގޮތުން ސްޓެލްކޯގެ އަލިމަސްޔޫބިލް މިއަދު ފާހަގަކުރަމުންދާއިރު ގިނަ ހަރަކާތްތަކެއްވެސް އެ ކުންފުނިން ވަނީ ރާވާފައެވެ.

ސްޓެލްކޯގެ ރަންޔޫބީލްއާ ގުޅިގެން ސޯޝައަލް މީޑިއާގައި ހިއްސާ ކުރެއްވި ޕޯސްޓެއްގައި ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ ކަރަންޓުގެ ޚިދުމަތުގެ އަލިމަސްޔޫބީލްއާ ހަމަޔަށް ވާސިލްވެފައިވާއިރު، ލިބޭ އެންމެ ބޮޑު ހިތްހަމަޖެހުމަކީ ޤައުމު ބިނާކުރުމާއި، ތަރައްޤީއާއި ތަހުޒީބަށް މަގުފަހިކޮށްދީ، އިންސާނީ އަދި އުމްރާނީ ތަރައްޤީއަށް ކަރަންޓުގެ ޚިދުމަތްތެރީން އިޚްލާޞްތެރިކަމާއެކު ކޮށްދީފައިވާ އަދި ކޮށްދެމުންގެންދާ އަގުހުރި މަަސައްކަތްތައްކަމަށެވެ.

އެގޮތުން މި ކާމިޔާބީގެ ވާހަކަތައް ތާރީޚުގައި ލިޔެވިގެންދާއިރު، ކަރަންޓު ހިމެނޭ ހަކަތައިގެ ސިނާއަތުގައި މަސައްކަތްކުރައްވާ އެންމެހާ ފަރާއްތަކާމެދު ފަޚުރުވެރިވާކަމަށް ފަހުމީ ވިދާޅުވިއެވެ.

ފަހުމީ ވަނީ އެކިއެކި ގޮންޖެހުންތަކާ ކުރިމަތިލައްވައިގެން، ކާމިޔާބީގެ ހަރުފަތްތައް ގިރާކުރައްވަމުން އަލިމަސް ޔޫބީލްއާ ހަމައަށް ވާޞިލުވުމުގައި، މި ސިނާއަތުގައި އެކި ދުވަސްވަރު މަސައްކަތްކޮށްދެއްވާފައިވާ ބޭފުޅުން ޤައުމާއި ރައްޔިތުންގެ ކުރިއެރުމަށް ކޮށްދެއްވި ޚިދުމަތްތަކަށާއި، އަދި މިހާރު ތިއްބެވި ބޭފުޅުން މެދުކެނޑުމެއް، ފޫހިކަމެއް އަދި ވަރުބަލިކަމެއްނެތި ކޮށްދެއްވަމުންގެންދަވާ އަގުހުރި ޚިދުމަތްތަކަށް ޝުކުރު ދަންނަވާފައެވެ.

ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ މިހާރު ހޯދަން މަސައްކަތްތަކާއެކު ކުރިއެރުންތަކާއެކު ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ވެރިކަމުގައި މި ސިނާއަތުގެ ކުރިމަގު އޮތީ ވަރަށްވެސް އުޖާލާކޮށްކަމަށެވެ.

އެންމެ 14 ކިލޯވޮޓްގެ ކެޕޭސިޓީއަކާއެކު 1949 ވަނަ އަހަރު އުފެދުނު ސްޓެލްކޯއިން ފުރަތަމަ ހިދުމަތް ދިނީ މާލޭގެ އެންމެ 50 ގެއަކަށެވެ. ދިހަވަރަކަށް އަހަރު ތެރޭގައި 1997 ވަނަ އަހަރު ސްޓޭޓް އިލެކްޓްރިކް ކޮމްޕެނީ ލިމިޓެޑަށް ވުމުގެ ކުރިން ސަރުކާރުގެ ޑިޕާޓްމަންޓެއްގެ ގޮތުގައި މަސައްކަތް ކުރިއިރު، މިހާރު ސްޓެލްކޯއިން 80،973 އަށް ވުރެ ގިނަ ކަސްޓަމަރުންނަށް ކަރަންޓް ފޯރުކޮށްދެއެވެ.

އިޖުތިމާއީ ޒިންމާ އަދާކުރުމުގައި ސްޓެލްކޯ މިސާލަކަށް ފުދެއެވެ. ސްޓެލްކޯގެ އަމާޒަކީ ސްޓެލްކޯއިންދެވޭ ޔުޓިލިޓީ ހިދުމަތްތައް ފުޅާކޮށް ކާމިޔާބުކަމާއެކު ދެމެހެއްޓުމަކީ އެންމެ އިސް އެއް މަސްއޫލިއްޔަތެވެ. ހިދުމަތުގެ ފެންވަރު ރަނގަޅުކޮށް ރައްޔިތުންނަށް ބޭނުންވާ މިންވަރަށް ދަތިކަމެއް ނެތި ލުއިފަސޭހަކަމާއެކު ފޯރުކޮށް ދިނުމަކީ ކެނޑިނޭޅި ކުރެވޭ މަސައްކަތެވެ. ދެވޭ ހިދުމަތަކީ ޖީބަށްލުއި ހަރަދުކުޑަ ހިދުމަތަކަށް ހެދުމަކީވެސް ސްޓެލްކޯގެ އަމާޒެކެވެ.

ސަރުކާރުގެ އަމާޒަކީ ރާއްޖޭގައި އުފައްދާ ހަކަތައަކީ ތިމާވެއްޓާ ރައްޓެހި އެއްޗަކަށް ހަދާ ހަކަތަ އުފެއްދުމަށް ތެލަށް ކުރަމުން އަންނަ ހޭދަ ކުޑަކުރުމެވެ. މީގެއިތުރުންވެސް އިޔާދަކުރަނިވި ހަކަތައަށް ބަދަލުކުރުމުގެ ބޮޑެތި މަޝްރޫޢުތަކެއް ރާއްޖޭގެ އެކި ރަށްރަށުގައި އަންނަނީ ހިންގަމުންނެވެ.