ފެންވަދެ ގެއްލުންވެގެން 8 ގެއަކުން މީހުން ބަދަލުކޮށްފި

މާލޭގެ މަގުތަކުގައި ފެންބޮޑުވެ، ގޭތެރެއަށް ފެން ވަނުމުގެ ސަބަބުން 8 ގެއަކުން މީހުން ބަދަލުކޮށްފައިވާކަމަށް ނެޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ވިދާޅުވެއްޖެއެވެ.

މޫސުން ގޯސްވެ، ބޯކޮށް ވާރޭވެހި މާލޭގެ ބައެއް ސަރަހައްދުތަކުގައިވަނީ ފެން ބޮޑުވެފައެވެ. އެގޮތުން މިދިޔަ 24 ގަޑިއިރު އެންމެ ގިނައިން ވާރޭ ވެހިފައިވަނީ މާލެއަށްކަމަށް މޫސުމާބެހޭ ޤައުމީ އިދާރާއިން ވަނީ ހާމަކުރައްވާފައެވެ.

އެންޑީއެމްއޭގެ އެމަޖެންސީ މެނޭޖްމެންޓް ޑިރެކްޓަރ ފަރޫޝާ ޢަލީ ނަޞީރު ވިދާޅުވީ މިހާރު ކުރަމުންދާ ވިއްސާރާގައި މާލޭގެ މަގުތަކުގައި ވަރަށް ބޮޑަށް ފެން ބޮޑުވުމުގެ ސަބަބުން ގިނަ އަދަދެއްގެ ގޭބިސީތަކުން ވެލިބަސްތާ ޖަހައިދިނުމަށް އެދިފައިވާ ކަމަށެވެ. އެގޮތުން 47 ގޭބިސީއެއްގައި 229 ވެލިބަސްތާޖެހުމުގެ މަސައްކަތް މިހާރު ކުރަމުންދާކަމަށް އޭނާ ވިދާޅުވިއެވެ.

ވެލިބަސްތާ ޖެހުމުގެ މަސައްކަތްކުރަމުންދަނީ ދިވެހިރާއްޖޭގެ ޤައުމީ ދިފާޢީ ބާރާއި، ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއާއި މާލެ ސިޓީ ކައުންސިލާ ގުޅިގެންނެވެ.

ފަރޫޝާ ވިދާޅުވީ މިހާރުކުރަމުންދާ ވިއްސާރައިގެ ސަބަބުން އެކި ކަންކަމުގައި އެހީތެރިކަމަށް އެދި 101 ފޯނު ކޯލެއް ލިބިފައިވާ ކަމަށެވެ. އަދި އެ އިދާރާއިން ހެދި އެސެސްމެންޓުން ދިރިއުޅުމަށް ދަތިވެފައިވާ 12 ގޭބިސީއެއް ފާހަގަކުރެވިފައިވާ ކަމަށާއި ދިރިނޫޅެވޭވަރަށް ގެއްލުން ލިބިފައިވާ 8 ގޭބިސީއެއް ފާހަގަވި ކަމަށް ފަރޫޝާ ވިދާޅުވިއެވެ. އެހެންކަމުން އެ 8 ގޭބިސީގައި ދިރިއުޅުނު 32 މީހަކު ވަގުތީ ހިޔާވައްސަކަށް މިހާރު ބައްދަލުކޮށްފައިވާކަމަށް ފަރޫޝާ ވިދާޅުވިއެވެ. އެގޮތުން އެމީހުން ބަދަލުކޮށްފައިވަނީ ގެސްޓްހައުސްތަކަށާއި ޢާއިލާ މީހުން ދިރިއުޅޭ ގެތަކަށެވެ.

"އަޅުގަނޑުމެންނަށް ފާހަގަވި ކައްކާ ކެއުންބުއިމަށް ދަތިވެފައިހުރި ތަންތަނާއި ފާހަނައިގެ ނިޒާމަށް ބުރުއަރާފައިހުރި ތަންތަން. 8 ތަނެއް ފާހަގަކުރެވުނީ ވަގުތުން ވަގުތަށް އެހީތެރިކަން ބޭނުންވާކަމަށް." ފަރޫޝާ ވިދާޅުވިއެވެ.

އެންޑީއެމްއޭއިން ވިދާޅުވީ އަތޮޅުތެރޭގެ ރަށްރަރަށް ގެއްލުން ލިބިފައިވާ މިންވަރު ބެލުމަށް ރަށްރަށުގެ ކައުންސިލްތަކަށް ގުޅުމުގެ މަސައްކަތްކުރަމުން އަންނަ ކަމަށާއި، މީހުން ބަދަލުކުރަންޖެހޭ ވަރުގެ ގެއްލުމެއް ލިބިގެން އެއްވެސް ރަށަކުން އަދި މިހާތަނަށް ރިޕޯޓުކޮށްފައިނުވާ ކަމަށެވެ.