އަންނަ އަހަރުގެ އިންޓަރ ސްކޫލު ވޮލީ މުބާރާތް ޒޯންތަކުގެ މެދުގައި ބޭއްވުމުގެ ވިސްނުން ގެންގުޅުއްވާކަމަށް ވޮލީބޯލް އެސޯސިއޭޝަންގެ ރައީސް މުހަންމަދު ލަތީފް ވިދާޅުވެއްޖެއެވެ.
ޕީއެސްއެމް " ކުޅިވަރު ވިންދު" ޕްރޮގްރާމްގައި ވާހަކަދައްކަމުން ލަތީފް ވިދާޅުވީ އަންނަ އަހަރު އިންޓަރ ސުކޫލު ބޮޑު ބަދަލަކާ ދިމާލަށް ގެންދިޔުމުގެ އެންމެ ބޮޑު ބޭނުމަކީ ކުޅިވަރުގެ މަގުބޫލުކަން އިތުރުވުން ކަމަށެވެ. އަންނަ އަހަރު އަތޮޅު ތެރެއަށް މުބާރާތް ގެންދިޔުމުގެ ވާހަކަ ފާހަގަކުރައްވަވާ ލަތީފް ވިދާޅުވީ މުބާރާތް އަތޮޅު ތެރޭގައި ބާއްވާކަމުގަ ވާނަމަ ވަރަށް ބޮޑަށް ހަރަދަށް ވެސް ބަލަންޖެހޭ ކަމަށެވެ.
"ބައެއް ޓީމުތަކުން ފާހަގަކޮށްފައިވަނީ ޒޯން ކުޅެން ދިޔުމަށް ވުރެ ހަރަދު ކުޑައޭ މާލެގޮސް މުބާރާތް ކުޅެލަން، މިސާލަކަށް ޒޯންތަކުގެ މުބާރާތް ބަހާލާއިރު ޒޯންތަކުގައި ބައިތައް މާލޭގަވެސް ކުޅެވިގެންދާނެ" ލަތީފް ވިދާޅުވިއެވެ.
އަންނަ އަހަރު މުބާރާތް ރޭވުމުގައި މިފަހަރު މުބާރާތުގައި ބައިވެރިވި ޓީމުތަކާއެކު މަޝްވަރާ ކުރާނެކަމަށް ވެސް ލަތީފް ވިދާޅުވިއެވެ. މުބާރާތް އަންނަ އަހަރު ތަރުތީބު ކުރެވިގެންދާއިރު ޓީމުތަކުގެ މެނޭޖުމަންޓުގެ ތަޖުރިބާގެ އަލީގައި ކުރެވުނު މަސައްކަތާމެދު މަޝްވަރާ ކުރައްވާނެކަމަށް ވޮލީބޯލް އެސޯސިއޭޝަންގެ ޔޫތް ޑިވޮލަޕްމެންޓް އޮފިސަރ ފަތުހުﷲ ވަހީދު ވިދާޅުވިއެވެ.
"ވަރަށް ގިނަ ޓީމުތަކެއް އަންނަ އަހަރަށް އިތުރުވާނެ، ކޮލިފިކޭޝަން ރައުންޑް ކުޅުމަކީ ނެތްކަމެއް ނޫން، ރައީސްގެ ވިސްނުންފުޅުގައި އެބަހުރި ގިނަ ޓީމުތަކަށް ގިނަ ތަޖުރިބާ ހޯދުމުގެ ވިސްނުން" ފަތުހުﷲ ވިދާޅުވިއެވެ.
މިއަހަރުގެ އިންޓަރ ސްކޫލު ވޮލީ މުބާރާތުގައި 80 ޓީމެއް ވަނީ ވާދަކޮށްފައެވެ.