އަންނަ މަހުން ފެށިގެން ދިވެހި ވިޔަފާރިތަކަށް ޗައިނާގައި ތަކެތި ވިއްކުމުގެ ފުރުޞަތު

ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް އަންނަ މަހުގެ ފުރަތަމަ ދުވަހުން ފެށިގެން އަމަލުކުރަން ފަށާއިރު، ދިވެހި ވިޔަފާރިތަކަށް ޗައިނާގައި ތަކެތި ވިއްކުމުގެ ފުރުޞަތު ފަހިވާނެކަމަށް ވިޔަފާރިއާއި އިޤްތިޞާދީ ތަރައްޤީއާބެހޭ ވުޒާރާއިން ވިދާޅުވެއްޖެއެވެ.

މިނިވަން ވިޔަފާރީގެ އެއްބަސްވުމެއްގައި ޗައިނާއާއެކު ރާއްޖެއިން ސޮއިކުރީ 2014 ވަނަ އަހަރުއެވެ. އަދި އެ އެއްބަސްވުމަށް އަމަލުކުރުމަށް 2017 ވަނަ އަހަރު މަޖިލީހުން ރުހުން ލިބިފައިވާއިރު، 2018 ވަނަ އަހަރު ސަރުކާރު ބަދަލުވުމާއެކު އެ އެއްބަސްވުމަށް އަމަލުކުރުން އޮތީ މަޑުޖެހިފައެވެ. ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާއި ހަވާލުވެވަޑައިގަތުމަށްފަހު މި އެއްބަސްވުމަށް އަމަލުކުރަން ފެށުމަށްކުރަންޖެހޭ މަސައްކަތްތައް ވަނީ ފަށްޓަވާފައެވެ.

އެގޮތުން އަންނަ މަހުގެ 1 ވަނަ ދުވަހުން ފެށިގެން މި އެއްބަސްވުމަށް އަމަލުކުރަން ފަށްޓްވާނެކަމަށް ސަރުކާރުން ވިދާޅުވެފައިވެއެވެ. ޗައިނާއާއި ރައްޖެއާދެމެދު އެކުލަވާލާފައިވާ މިނިވަން ވިޔަފާރީގެ އެއްބަސްވުމުގެ ދަށުން ކުދި ވިޔަފާރިތަކާއި ކްރިއޭޓިވް ނުވަތަ އެނޫންވެސް އުފެއްދުންތެރި މަސައްކަތް ކުރާ ފަރާތްތަކަށް ގިނަ ފުރުސަތުތަކެއް ހުޅުވިގެންދާނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވިއެވެ.

މި އެއްބަސްވުމަށް އަމަލުކުރަން ފަށާއިރު ކްރިއޭޓިވް މަސައްކަތްކުރާ ފަރާތްތަކުގެ މަސައްކަތައް ބޭނުންވާ ގިނަ ބާވަތްތަކަކުން ޑިއުޓީ މައާފްވެގެންދާނެއެވެ. އެގޮތުން ތްރީޑީ ޕްރިންޓަރ، ލޭބަލް ޕްރިންޓަރ އަދި ފޮޓޯގްރަފީ އިކުއިޕްމަންޓްސް އެތެރެކުރާއިރު އެއްވެސް ޑިއުޓީއެއް ނުނަގާނެއެވެ. އަދި ޖުވެލަރީ ނުވަތަ ގަހަނާފަދަ ތަކެތި އުފެއްދުމަށް ބޭނުންކުރާ އާލާތްތަކާއި، ރޯމެޓީރިއަލްސްއިންވެސް މި އެއްބަސްވުމުގެ ދަށުން ޑިއުޓީ މައާފްވެގެންދާނެއެވެ.

މިނިވަން ވިޔަފާރީގެ އެއްބަސްވުމަށް އަންނަ މަހުގެ ފުރަތަމަ ދުވަހުން ފެށިގެން އަމަލުކުރަން ފަށާއިރު މަސްވެރިކަމުގެ ސިނާއަތާއި އަދި އިމާރާތްކުރުމުގެ ސިނާއަތައްވެސް ބޮޑު ފައިދާތަކެއް ކުރާނެކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވިއެވެ. އެގޮތުން ޗައިނާއިން ރާއްޖެ އެތެރެކުރާ މަސްވެރިކަމުގެ ސިނާއަތާއި އިމާރާތްކުރުމުގެ ސިނާއަތައް ބޭނުންކުރާ ގިނަ ބާވަތްތަކެއްގެ ޑިއުޓީވެސް އެއްބަސްވުމުގެ ދަށުން މައާފްވެގެންދާއިރު، ސީފުޑްގެ 296 ބާވަތެއްގެ ޑިއުޓީ އެއްކޮށް މަޢާފްވާނެއެވެ.

މީގެ އިތުރުން މި އެއްބަސްވުމުގެ ދަށުން ވިޔަފާރިތަކާއި އަދި އެހެން ޚިދުމަތްތައް ފޯރުކޮށްދޭ ފަރާތްތަކަށްވެސް ޗައިނާގައި އެމީހުންގެ ވިޔަފާރިއާއި ޚިދުމަތްތައް ދިނުމުގެ ފުރުސަތު ހުޅުވިގެންދާނެއެވެ. މިއީ ބިލިއަނެއްހައި މީހުންގެ އާބާދީއަކަށް ތަކެތި ވިއްކުމަށް ހުޅުވިގެންދާނެ ރަނުގެ ފުރުސަތެކެވެ. ދިވެހި ވިޔަފާރިތައް ބައިނަލްއަޤްވާމީ މާކެޓަށް ފުޅާކުރުމަށް ލިބިގެންދާ ފުރުޞަތެކެވެ.

ސަރުކާރުން ވިދާޅުވެފައިވާ ގޮތުގައި މިހާރުވެސް ދިވެހި ރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މި އަދަދު 1 ބިލިޔަން ޑޮލަރަށް އަރާނެ ސަރުކާރުން ލަފާކުރައްވައެވެ.