އެފްރިކާ ބައްރުގައި އޮންނަ މޮޒަމްބީކަށް އެރި ބާރުގަދަ ތޫފާނު، ޗީޑޯގައި މަރުވި މީހުންގެ އަދަދު 94އަށް އުފުލިއްޖެއެވެ.
މޮޒަމްބީކަށް ތޫފާނު ޗީޑޯ އެރީ މީގެ ހަފުތާއެއްހާ ދުވަސް ކުރިންނެވެ. މިދިޔަ ބުރާސްފަތި ދުވަހާ ހަމައަށް މަރުވި މީހުންގެ އަދަދު 73އަށް އުފުލިފައިވާ ކަމަށް އެ ޤައުމުގެ ޑިޒާސްޓަރ މެނޭޖްމަންޓުން ވަނީ ބުނެފައެވެ. ނަމަވެސް، މިހާރު އެ އަދަދު 94އަށް އުފުލިފައިވާ ކަމަށް ޑިޒާސްޓަރ މެނޭޖްމަންޓުން ބުނެފައިވެއެވެ.
ފާއިތުވި ގަރުނެއްގެ ތެރޭގައި އުފެދުނު އެންމެ ބާރުގަދަ ތޫފާން، ޗީޑޯ އެންމެ ފުރަތަމަ އަރާފައިވަނީ ފަރަންސޭސިވިލާތުގެ ބާރުގެ ދަށުގައި އޮންނަ އިންޑިޔާ ކަނޑުގެ ޖަޒީރާ ޤައުމެއް ކަމަށްވާ މަޔޮޓަށެވެ.
އެ ތޫފާނުގައި އެންމެ ބޮޑު ގެއްލުމެއް ވެސް ލިބިފައިވަނީ މަޔޮޓަށެވެ. އެ ތޫފާނުގައި މަޔޮޓުން 35 މީހުން މަރުވިކަން ޔަޤީން ކުރެވުނު ނަމަވެސް އެ ޢަދަދު އެތައް ހާހަކަށް އެރުމުގެ ފުރުޞަތު ބޮޑު ކަމަށް ކަމާ ގުޅޭ އިދާރާތަކުން ވަނީ ބުނެފައެވެ.
މި ތުފާނުގެ ސަބަބުން ލިބުނު ގެއްލުންތަކާއި މި ފަހުން ބޭއްވި އިންތިޚާބުގެ ތެރެއިން ހިނގި ހަމަނުޖެހުންތަކާ ގުޅިގެން، މޮޒަމްބީކްގެ އިޤްތިޞާދު ކުރިއަރާނެ ކަމަށް ކުރިން ލަފާކޮށްފައިވާ 4.3 އިންސައްތަ ދަށްކުރަން ޖެހޭނެކަމަށް ބައިނަލްއަޤްވާމީ މާލީ އިދާރާ އައިއެމްއެފުން ބުނެފައިވެއެވެ.