ޔޫކްރެއިންގެ ރައީސް ވޮލޮޑިމިއަރ ޒެލެންސްކީ، ޖަރުމަންވިލާތުގެ ޗާންސެލަރ އޯލާފް ޝޯލްޓްސަށް އަމާޒުކުރައްވާ ފާޑުކިޔުންތައް ހައްޤު ނޫން ކަމަށް ހުޅަނގުގެ ދިފާޢީ އިއްތިޙާދު (ނޭޓޯ)ގެ ވެރިޔާ މާކް ރުތޭ ވިދާޅުވެއްޖެއެވެ.
ރަޝިޔާއާ ދެކޮޅަށް ކުރަމުންދާ ހަނގުރާމައިގައި، ޖަރުމަންވިލާތުން ޔޫކްރެއިނަށް ބޮޑެތި އެހީތަކެއް ދެމުން ދިޔަ ނަމަވެސް، ދިގު ރާސްތާ ޓޯރަސް މިސައިލް ފޯރުކޮށްދޭން ޖަރުމަންވިލާތުން ފަސްޖެހެމުންދާތީ، ޔޫކްރެއިނުގެ ނުރުހުން ވަނީ ބޮޑުވެފައެވެ.
"އަޅުގަނޑު ތަކުރާރުކޮށް ޒެލެންސްކީ އަރިހު ދަންނަވަމުން މި ދަނީ، އޯލާފް ޝޯލްޓްސަށް ފާޑުވިދާޅުވުން ހުއްޓައިލައްވަންޖެހޭ ކަމަށް. ސަބަބަކީ، އަޅުގަނޑަށް ޤަބޫލުކުރެވޭ ގޮތުގައި އެއީ ހައްޤު ފާޑުކިޔުންތަކެއް ނޫން،" ރުތޭއާ ޙާވާލާދީ ޖަރުމަންވިލާތުގެ ނޫހަކުން ބުނެފައިވެއެވެ.
އަދި ޖަރުމަންވިލާތުން ނުދިން ނަމަވެސް، ޔޫކްރެއިނުން ބޭނުން ޢަދަދަކަށް ޓޯރެސް ކްރޫޒް މިސައިލް ދޭން ނޭޓޯ ތައްޔާރަށް އޮތް ކަމަށް ރުތޭ ވިދާޅުވިއެވެ. އެއީ، ރުތޭ ވިދާޅުވި ގޮތުގައި ރަޝިޔާއާ ދެކޮޅަށް ޔޫކްރެއިންގެ އެ ފަދަ ޤާބިލު ކަމެއް ހުންނަން ޖެހޭ ކަމަށް ޤަބޫލުކުރައްވާތީއެވެ.
މިދިޔަ ނޮވްމެބަރު މަހު، ޝޯލްޓްސް ފޯނުން ގުޅުއްވައި، ރަޝިޔާގެ ރައީސް ވްލަޑިމިއަރ ޕޫޓިންއާ މަޝްވަރާކުރެއްވުމުން ވެސް ޒެލެންކްސީ ވަނީ ނުރުހުން ފާޅު ކުރައްވައިފައެވެ. އެއީ ޕޫޓިން އެކަހެރިކޮށް އިންސާފުވެރި ގޮތަކަށް ހަނގުރާމަ ނިންމުމަށް ހުރަސް އެޅުނު ކަމެއްގެ ގޮތުގައި ޒެލެންކްސީ ވަނީ ސިފަކުރައްވައިފައެވެ.