2 މިލިޔަން ވަނަ ފަތުރުވެރިޔާ ބުރާސްފަތިދުވަހު ރާއްޖެ އަންނާނެކަމަށް ލަފާކުރެވޭ: ވަޒީރު ފައިސަލް

މިއަހަރު ރާއްޖެއަށް ޒިޔާރަތްކުރާ 2 މިލިއަން ވަނަ ފަތުރުވެރިޔާ އަންނަ ބުރާސްފަތިދުވަހު ރާއްޖެ އަންނާނެކަމަށް ލަފާކުރައްވާކަމަށް ފަތުރުވެރިކަމާބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ސަރުކާރުން ކަނޑައަޅާފައިވަނީ މިއަހަރު 2 މިލިއަން ފަތުރުވެރިން ރާއްޖެ ގެނައުމުގެ އަމާޒެކެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ފަތުރުވެރިކަމާބެހޭ ވަޒީރު އިބްރާހިމް ފައިޞަލް ވިދާޅުވީ އާދީއްތަދުވަހުގެ ނިޔަލަށް ރާއްޖެއަށް 1978252 ފަތުރުވެރިން ޒިޔާރަތްކޮށްފައިވާކަމަށެވެ. އަދި ފަތުރުވެރިން އަންނަ އަދަދުތަކަށް ބަލާއިރު، 2 މިލިޔަންވަނަ ފަތުރުވެރިޔާ އަންނާނެކަމަށް ބެލެވެނީ އަންނަ ބުރާސްފަތިދުވަހުކަމަށްވެސް ވަޒީރު ފައިސަލް ވިދާޅުވިއެވެ.

ވަޒީރު ވިދާޅުވީ 2 މިލިއަން ފަތުރުވެރިންގެ އަމާޒަށް ވާސިލުވާން ކައިރިވެފައިވާއިރު، މިއީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އިރުޝާދާއި ލަފާގެ ދަށުން ފަތުރުވެރިކަމުގެ ވުޒާރާއާއި ސިނާޢަތުގައި މަސައްކަތްކުރައްވާ ފަރާތްތަކުން ގުޅިގެން ކުރެވުނު ކާމިޔާބު މަސައްކަތްތަކެއްގެ ނަތީޖާކަމަށެވެ.

ފަތުރުވެރިކަމާއި ބެހޭ ވުޒާރާއިން އެންމެ ފަހުގެ ތަފާސްހިސާބުތައް ދައްކާގޮތުން ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފައެވެ. މި އަދަދަކީ މިދިޔަ އަހަރުގެ މި މުއްދަތާއި އަޅާ ބަލާއިރު %2.9 އިތުރު އަދަދެކެވެ. މިދިޔަ އަހަރުގެ ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް އައިސްފައިވަނީ 100،652 ފަތުރުވެރިންނެވެ.

ތަފާސްހިސާބުތައް ދައްކާގޮތުން އެވްރެޖްކޮށް ކޮންމެ ދުވަހަކު މިހާރު ރާއްޖެއަށް 6092 ފަތުރުވެރިން އާދެއެވެ. މިމަހުގެ ކުރީކޮޅު ރާއްޖެއަށް ކޮންމެ ދުވަހަކު އަންނަ ފަތުރުވެރިންގެ އަދަދުތައް ހުރީ 5000ގައެވެ.

ފަތުރުވެރިންގެ ޖުމްލަ އަދަދަށް ބަލާއިރު، އަހަރުގެ މިހާތަނަށް ވަނީ 1.9 މިލިޔަން ފަތުރުވެރިންނާއެކު ރެކޯޑް އަދަދަކަށް ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މިހާތަނަށް ރާއްޖެއަށް އައިސްފައިވާ 1.7 މިލިޔަން ފަތުރުވެރިންނާއި އަޅާ ބަލާއިރު %8.8 އިތުރު އަދަދެކެވެ.