24.12.24: ރީތި ތާރީޚުގައި އެތައް ދެމަފިރިއަކަށް އުފާވެރިކަން

އަހަރުގެ ތެރޭގައި ދުވަހަކަށްފަހު ދުވަހެއް ފާއިތުވަމުން ދިޔަޔަސް ކަލަންޑަރުގައި ބޮޅު އަޅަންޖެހޭފަދަ ތާރީޚުތައް ޚާއްސަވެއެވެ. އެކި ގޮތްގޮތުން ޢަދަދުތައް އެއްގޮތްވާ ރީތި ތާރީޚުތައް ވަކިން ޚާއްސަވެއެވެ. މިފަދަ ދުވަސްދުވަސް ޚާއްސަވަނީ އެ ތާރީޚުގައި ހިނގާފައި ހުންނަ ޚާއްސަ ކަންކަމުގެ ސަބަބުންނެވެ. ނުވަތަ އެ ތާރީޚެއް ލިޔެލާފައި އޮންނައިރު ނަންބަރުތައް ތަރުތީބުވެފައިވާ ގޮތުގެ ރީތިކަމުންނެވެ.

މިގޮތަށް ބަލާއިރު މިހިނގާ 2024 ވަނަ އަހަރުގެ އެންމެ ރީތި އެއް ތާރީޚަކަށްވާނީ ހަމަގައިމުވެސް މިއަދުގެ ތާރީޚެވެ. ދޭ އަދި ހަތަރެއް ފެންނަން އޮންނަ މިއަދުގެ ތާރީޚަކީ މިއަހަރު ތެރޭގައި ބައްދަލުކުރާ އެންމެ ރީތި އެއް ތާރީޚެކެވެ.

މި ރީތި ތާރީޚު ޚާއްސަކޮށްލުމަށް ދުނިޔޭގެ ކަންކޮޅުތަކުގައި އެންމެންވެސް އަންނަނީ ތަފާތު ކަންކަން ކުރަމުންނެވެ. 2000ވަނަ އަހަރުގެޑިސެމްބަރުު 24ގައި އުފަންވި ކުދިންނަށް މިއަދަކީ އަދި މާ އުފާވެރި ޚާއްސަ ދުވަހަކެވެ. އެމީހުންގެ 24ވަނަ އުފަން ދުވަސް މިއަދު ފާހަގަކުރަނީއެވެ. އަދި މިއަދު އުފަންވާ ކުދިންނަށްވެސް ރީތި ތާރީޚެއް ލިބުނީއެވެ.

24.12.24 ވަނަ ދުވަހު ރާއްޖޭގެ ފެމިލީ ކޯޓާއި އަތޮޅުތަކުގެ ކޯޓުތައްވެސް ވަރަށް ބިޒީއެވެ. މި ހިތްގައިމު ރީތި ދުވަހު ކައިވެނިކުރުމަށްޓަކައެވެ.

ދެ މީހެއްގެ ދެމެދުގައި ކައިވެނީގެ ގޮށް ޖަހާލުމަށް މިއަދުގެ ތާރީޚު އިޚުތިޔާރުކުރި މީހުންގެ އަދަދު ވަރަށް ގިނައެވެ. މިއަދު ފެމިލީ ކޯޓުގައި 52 ކައިވެންޏެއް ކުރުމަށް ތާވަލުކޮށްފައިވެއެވެ. މިއީ ރާއްޖެއަށް ބަލާއިރު ފާހަގަކޮށްލަންޖެހޭ ޢަދަދެކެވެ. އެއްދުވަހެއްގައި މިހާ ގިނާ އަދަދެއްގެ ކައިވެނިކުރާތީއެވެ.

ފެމެލީ ކޯޓުގައި ކައިވެނި ކުރުމާ ހަމައިން ނިމުނީއެއް ނޫނެވެ. ކައިވެނީގެ އުފާ ފާޅުކުރުމުގެ ހަފްލާތަކަށްވެސް 24.12.24 ވަނީ ޚާއްޞަ ވެފައެވެ. މާލޭގައި ޕާޓީ ބާއްވާ ގިނަ މާލަމަކާއި، ހޯލަކާއި ޕާކުތައް ވަނީ ބުކްކޮށްފައެވެ. ޑިޒައިނަރުންނާ، ޕާޓީ އިންތިޒާމުކޮށް ހިންގާ ކުންފުނިތަކަށްވެސް މިއަދަކީ ބުރަ ދުވަހެކެވެ.

މި ރީތި ތާރީޚުގެ ސަބަބުން އާމްދަނީ އިތުރުވެ، ގުޅުންތައް ބަދަހިވެ، ހިތްތައް ގުޅި، ވަޒީފާގެ ޒިންމާ ފުރިހަމައަށް އަދާކުރުމަށް އެހީތެރިކަން ލިބުނީއެވެ.