ފަލަސްޠީނުގެ މިނިވަން ކަމަށް ޖިހާދު ކުރާ ޙަމާސް ޖަމާޢަތުގެ ސިޔާސީ ގޮފީގެ ކުރީގެ ވެރިޔާ، އިސްމާޢީލް ހަނިއްޔާ ޝަހީދު ކޮށްލުމުގެ ފަހަތުގައި އޮތީ ޔަހޫދީ ފައުޖު ކަމަށް ޒަޔަނިސްޓު އިސްރާއީލުގެ ހައްދުފަހަނަ އެޅި ދިފާޢީ ވަޒީރު އިސްރައެލް ކަޓްޒް ފުރަތަމަ ފަހަރަށް އެއްބަސްވެއްޖެއެވެ. ހަނިއްޔާ ޝަހީދު ކޮށްލާފައި ވަނީ އީރާނުގެ ވެރިރަށް ތަހްރާނަށް ޖުލައި މަހު ޔަހޫދީ ފައުޖުން ދިން ނިރުބަވެރި ޙަމަލާއެއްގައެވެ. އެ ޙަމަލާގެ ޒިންމާ އުފުލާ ކަމަށް ކަޓްޒު ބުނުމާ އެކު، ޔަހޫދީންނާއި އީރާނާ ދެމެދު ނުތަނަވަސްވެފައިވާ މަސްރަޙު އިތުރަށް ހޫނުވެގެންދާނެ ކަމަށް މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ހަނިއްޔާ ޝަހީދު ކޮށްލުމުގެ ފަހަތުގައި އޮތީ ނިރުބަވެރި ޔަހޫދީން ކަމުގައި އީރާނުގެ އިތުރުން ޙަމާސް ޖަމާޢަތުން ދިޔައީ ބުނަމުންނެވެ. މީގެ ކުރިން ޔަހޫދީން ވަނީ އެ ކަމާ އެއްބަސްވުމަށް ދެކޮޅު ހަދާފައެވެ. ނަމަވެސް، ކަޓްޒް މި ވަނީ ހަނިއްޔާ ޝަހީދު ކޮށްލަން ދިން ނިރުބަވެރި ޙަމަލާގެ ޒިންމާ އުފުލާ ކަން ހާމަކޮށް، އެ ކަމުގެ ޒިންމާ އުފުލާ ކަމަށް ބުނެފައެވެ.
ހަނިއްޔާ ޝަހީދު ކޮށްލުމުގެ ފަހަތުގައި އޮތީ ޔަހޫދީން ކަން ކަށަވަރު ކޮށްދިނުމަށް ފަހު ހައްދުފަހަނަ އެޅި ކަޓްޒް ވަނީ ޔަމަންގެ ހަތިޔާރު އެޅި ޖަމާޢަތް، ޙޫޘީންނަށް ނުރައްކާތެރި އިންޒާރެއް ދީފައެވެ. އޭނާ ބުނީ، ޙަމާސްގެ އިތުރުން ލުބްނާންގެ މުޖާހިދުންގެ ޖަމާޢަތް، ޙިޒްބުالله ވެސް ބަލިކަށި ކޮށްލާފައިވާނެ ކަމުގައެވެ. އަދި، އީރާނަށް ނުރައްކާތެރި ޙަމަލާތަކެއްދީ، އެ ޤައުމުގެ ދިފާޢީ ނިޒާމުތަކަށް ބޮޑެތި ގެއްލުންތަކެއް ދީފައިވާނެ ކަމުގައެވެ. ސޫރިޔާގެ ރައީސް ބައްޝާރް އަލް-އަސަދުގެ ސަރުކާރު ވައްޓައިލުމުގެ ޒިންމާ އުފުލާ ކަމަށް ވެސް އޭނާ ވަނީ އެއްބަސްވަފައެވެ.
ހަނިއްޔާއަށް ފަހު ޙަމާސްގެ ސިޔާސީ ގޮތްޕާ ދެން ޙަވާލުވެ ވަޑައިގެންނެވި ޔަޙްހާ އަލް-ސިންވާރު ވެސް ޝަހީދު ކޮށްލާފައި ވަނީ ޔަހޫދީ ފައުޖުން ދިން ނިރުބަވެރި ޙަމަލާއެއްގައެވެ. އަދި، ޙިޒްބުاللهގެ ވެރިޔާ އަލް-ސައްޔިދް ޙަސަން ނަޞްރުالله ޝަހީދު ކޮށްލާފައި ވަނީ ބައިރޫތަށް ޔަހޫދީ ފައުޖުން ދިން ރަޙުމު ކުޑަ ޙަމަލާތަކެއްގައެވެ. ޙޫޘީންނަށް އިންޒާރު ދެމުން ކަޓްޒް ބުނީ، ޣައްޒާއާއި ލުބްނާން ސުންނާފަތި ކޮށްލާފައިވާ ފަދައިން ޔަމަންގެ އަލް-ޙުދަޔިދާއާއި ޞަންޢާ ވެސް ސުންނާފަތިކޮށް ބިމާ ހަމަކޮށްލާނެ ކަމުގައެވެ.
ރަތް ކަނޑުގެ އިތުރުން ޢަދަން ކަނޑާއި ބާބް އަލް-މަންދަބީ ކަނޑުން ދަތުރު ކުރާ އާގުބޯޓުފަހަރާ ދެކޮޅަށް ޙޫޘީން އަސްކަރީ އޮޕަރޭޝަނެއް ފަށާފައި ވަނީ، 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހު ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ލާއިންސާނީ ޖަރީމާތަކެއް ފެށުމާ ގުޅިގެންނެވެ. ޙޫޘީންގެ އަމާޒަކީ ފަލަސްޠީނުގެ ރައްޔިތުންނާއި، މިނިވަން ކަމަށް ޖިހާދު ކުރަމުންދާ ޖަމާޢަތްތަކަށް ވާގިވެރިވުމެވެ. އަދި، ބޭނުމަކީ ޔަހޫދީ ފައުޖުގެ އަނިޔާވެރި ކަމަށް ނިމުމެއް ގެނައުމަށް ބާރު އެޅުމެވެ.
ޙޫޘީންގެ އޮޕަރޭޝަންގެ ދަށުން އެ ޖަމާޢަތުން ދަނީ ޒަޔަނިސްޓުންގެ ރަށްތަކަށް އަމާޒުކޮށް ވެސް ނުރައްކާތެރި ޙަމަލާތަކެއް ދެމުންނެވެ. އިސްރާއީލުގެ ވެރިރަށް ތެލް އަވީވުގެ ރަށްބޭރުގައި އޮތް ޔާފާއަށް ޙޫޘީން ދާދިފަހުން ވަނީ އަޑަށް ވުރެ ބާރަށް ދަތުރު ކުރުމުގެ ޤާބިލު ކަން ލިބިފައިވާ ހައިޕަރސޮނިކް ބެލިސްޓިކް މިސައިލެއް ބޭނުން ކޮށްގެން ނުރައްކާތެރި ޙަމަލާއެއް ދީފައެވެ. އަދި، ޔަހޫދީންގެ 16 މީހުން ޒަޚަމު ކޮށްލާފައެވެ. އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީންގެ އެންމެ ބޮޑު މަދަރުގާރު، އެމެރިކާއިން ވަނީ ޔަމަންގެ ވެރިރަށް ޞަންޢާއަށް ނުރައްކާތެރި ވައިގެ ޙަމަލާތަކެއް ދީފައެވެ.