ސޫރިޔާގެ ޠަރްޠޫސްގެ ރަށްބޭރުގެ ސަރަޙައްދެއްގައި ދިން ނުރައްކާތެރި ޙަމަލާތަކެއްގައި ސޫރިޔާގެ ފުލުހުންގެ 14 މީހުން މަރައިލައިފިއެވެ. މި ޙަމަލާތަކުގެ ފަހަތުގައި ތިބީ ކުރީގެ ރައީސް ބައްޝާރް އަލް-އަސަދަށް ވަފާތެރި ސިފައިން ކަމަށް ބެލެވެއެވެ. ސޫރިޔާގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސް)ގެ ހަނގުރާމަވެރިން ވެރިރަށް ދިމިޝްޤަށް އަރައި އަސަދުގެ ސަރުކާރު ވައްޓައިލާފައި ވަނީ ޑިސެންބަރު މަހުގެ 8ވަނަ ދުވަހުއެވެ.
ސޫރިޔާގައި މި ވަގުތު ވެރިކަން ކުރަމުން ދަނީ އެޗްޓީއެސުން ޤާއިމު ކޮށްފައިވާ ވަގުތީ ސަރުކާރަކުންނެވެ. އަސަދުގެ ސަރުކާރު ވައްޓައިލުމާ ގުޅިގެން އެ ޤައުމުގެ އެކި ކަންކޮޅުތަކުގައި ހަމަނުޖެހުން ހިންގަމުންދާ ކަމުގައި އެޗްޓީއެސްގެ ސަރުކާރުން ބުންޏެވެ. މި ކަން ހުއްޓުވުމަށް އިންތިޤާލީ ސަރުކާރުން އަޅާފައިވާ ބައެއް ފިޔަވަޅުތަކުގެ ތެރޭގައި ބައެއް ސަރަޙައްދުތަކުގައި ކަރފިޔު ހިންގުން ހިމެނެއެވެ.
ސޫރިޔާގެ އިންތިޤާލީ ސަރުކާރުގެ ދާޚިލީ ވުޒާރާއިން ބުނީ، ޠަރްޠޫސްގެ ރަށްބޭރުގައި ދީފައިވާ ޙަމަލާތަކުގައި 14 ފުލުހުން މަރުވުމުގެ އިތުރުން ފުލުހުންގެ 10 މީހުން ޒަޚަމުވެފައިވާ ކަމުގައެވެ. އަދި، އަސަދަށް ވަފާތެރި ސިފައިން ހޯދައި، އެ މީހުންގެ ހަރަކާތްތައް ހުއްޓުވާނެ ކަމުގެ އިންޒާރު އެ ވުޒާރާއިން ވަނީ ދީފައެވެ. ސޫރިޔާގެ ސަލާމަތީ ބާރުތަކާއި ޢާންމު ރައްޔިތުންގެ ފުރާނައަށް ނުރައްކާ ކުރާ ކޮންމެ ފަރާތެއް ހޯދައި، ހުއްޓުވާނެ ކަމުގައި ވެސް އެ ވުޒާރާއިން ބުންޏެވެ.
ހަމަނުޖެހުން ބޮޑުވެ ކަރފިޔު ހިންގަން ފަށާފައިވާ ސަރަޙައްދުތަކުގެ ތެރޭގައި ޙުމްޞް ހިމެނެއެވެ. ސޫރިޔާގެ ދަޢުލަތުގެ މީޑިޔާއިން ބުނީ، އެ ސަރަޙައްދުގައި ހިންގަމުންދާ ހަމަނުޖެހުންތަކުގެ އަޑީގައި ތިބީ އަލް-ޢަލާވިއްޔޫން ދަރިކޮޅުގެ މީހުންނާއި ޝިޔަޢީ ގުރޫޕުތައް ކަމަށް ބެލެވޭ ކަމުގައެވެ. ހަމަނުޖެހުންތައް ހިންގަމުންދާ ގުރޫޕުތަކުގެ އަމާޒަކީ ކޮބައިކަން ސާފެއް ނޫނެވެ.
ޙުމްޞްގެ ބައެއް ރައްޔިތުން ބުނީ، އެ ސަރަޙައްދުގައި ހަމަނުޖެހުން ހިންގަން ފަށާފައި ވަނީ އަލް-ޢަލާވިއްޔޫން ދަރިކޮޅުގެ މީހުންނާ ދެކޮޅަށް އަނިޔާވެރި އަމަލުތައް ހިންގަމުންދާތީ، އެ ކަން ހުއްޓުވަން ބާރު އެޅުމުގެ ގޮތުން ކަމުގައެވެ. އެއީ، އަސަދު ނިސްބަތްވެ ވަޑައިގަންނަވާ ދަރިކޮޅެވެ. ޙުމްޞްގައި ހިންގަމުންދާ ކަރފިޔުއާ ގުޅޭ ގޮތުން ވަކި އެއްޗެއް ހާމަކުރަން އެޗްޓީއެސްގެ ސަރުކާރުގެ ތަރުޖަމާނު ވަނީ ދެކޮޅު ހަދާފައެވެ. ނަމަވެސް، ސޫރިޔާގެ ދައުލަތުގެ މީޑިޔާއިން ބުނީ، އިރުއޮއްސި 6ން ފެށިގެން ހެނދުނު 8އާ ދެމެދު އެ ސަރަޙައްދުގައި ކަރފިޔު އިޢުލާނު ކޮށްފައިވާ ކަމުގައެވެ.
ސޫރިޔާގެ މައިނޯރިޓީ ދަރިކޮޅުތަކުގެ މީހުންގެ ރައްކާތެރިކަން ކަށަވަރުކޮށްދީ، އެ މީހުންގެ ޙައްޤުތައް ޙިމާޔަތް ކޮށްދިނުމަށް އެޗްޓީއެސްގެ ސަރުކާރުން ވަނީ ވަޢުދުވެފައެވެ. ނަމަވެސް، އަސަދަށް ތާޢީދުކޮށް، އޭނާގެ ސަރުކާރަށް ވާގިވެރިވި މީހުންނާ ދެކޮޅަށް އަނިޔާވެރި އަމަލުތައް ހިންގާނެ ކަމަށް، ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. ޙުމްޞްގެ އިތުރުން ޠަރްޠޫސްގެ އައްސޭރިފަށުގެ ސަރަޙައްދުތަކުގައި ވެސް ހަމަނުޖެހުން ހިންގަމުންދާ ކަމުގައި ރިޕޯޓުތައް ބުނެއެވެ.
މި ހަމަނުޖެހުންތަކުގެ ތެރެއިން ޙަލަބުގައި ހުންނަ އަލް-ޢަލާވިއްޔޫން ދަރިކޮޅުގެ މީހުންގެ މަޤުބަރާތަކަށް ބަޑީގެ ޙަމަލާތަކެއް ދެމުންދާ މަންޒަރު ފެންނަ ވީޑިޔޯތަކެއް ވަނީ ޢާންމުވެފައެވެ. އެ ޙަމަލާތަކުގައި ޢާންމުންގެ ބަޔަކު މަރައިލާފައިވާ ކަމަށް ރިޕޯޓުތައް ބުނި ނަމަވެސް، މަރުވި މީހުންގެ އަދަދުތައް ސާފެއް ނޫނެވެ. މި ކަމާ ގުޅޭ ގޮތުން އެޗްޓީއެސްގެ ސަރުކާރުން ބުނީ، އެއީ ނޮވެންބަރު މަހު ނަގާފައިވާ ވީޑިޔޯތަކެއް ކަމަށް ބެލެވޭ ކަމުގައެވެ. އަދި، އެ ޙަމަލާތަކުގެ ފަހަތުގައި އޮތީ ކޮން ގުރޫޕެއް ކަން ސާފު ނޫން ކަމުގައި ވެސް އެޗްޓީއެސްގެ ސަރުކާރުން ހާމަކުރިއެވެ.