މެޑިޓެރޭނިއަން ކަނޑުން ދަތުރު ކުރަމުން ދިޔަ ރަޝިޔާގެ އާގުބޯޓަކަށް ބަޔަކު ޙަމަލާދީ ފައްތާލީ ކަމަށް އެ އުޅަނދު ދުއްވާ ކުންފުނިން ތުޙްމަތުކޮށްފިއެވެ. އެ ކުންފުނިން ބުނީ އެ ބޯޓުގައި ބާރުގަދަ ތިން ގޮވުން ގަވައި އެ އުޅަނދުގެ އަޑިއަށް ދާން ފެށީ ހޯމަ ދުވަހު ކަމަށެވެ.
2009ވަނަ އަހަރު ބަނދެފައިވާ އުރްސާ މޭޖަރ ނަމަކަށް ކިޔާ އާގުބޯޓުގެ އިންޖީނުގޭގައި ބާރުގަދަ ގޮވުމެއް ގޮވައި އެ އުޅަނދު އަޑިއަށް ދިޔުމުން ދެ ފަޅުވެރިން ވަނީ ގެއްލިފައެވެ. އެ ހާދިސާއިން ސަލާމަތްވި 14 ފަޅުވެރިން ވެސް ވަނީ އެ އާގުބޯޓުގައި ބާރުގަދަ ގޮވުންތަކެއް ގޮވި ކަމަށް ބުނެފައެވެ.
މެޑިޓެރޭނިއަން ކަނޑުން ރަޝިޔާގެ ބަނދަރަކަށް ދަތުރު ކުރަމުން ދިޔަ އާގުބޯޓު ފެތުނީ ސްޕެއިންނާއި އަލްޖަޒާއިރާ ދެމެދަށެވެ. އޭރު އޭގައި ހުންނާނީ ހުސްކޮށް ހުރި 129 ކޮންޓެއިނަރާއި އައިސް ކަނޑަން ބޭނުންކުރާ އާލަތްތަކެއް ކަމަށްވެއެވެ.
އުރްސާ މޭޖަރ ދުއްވަނީ އޮބޮރޮންލޮޖިސްޓިކާ ނަމަކަށް ކިޔާ ކުންފުންޏަކުންނެވެ. އެއީ ރަޝިޔާގެ ދިފާޢީ ވުޒާރާއާ ގުޅުން އޮންނަ ކުންފުންޏެކެވެ. އޮބޮރޮންލޮޖިސްޓިކާއާއި އުރްސާ މޭޖަރއާ ދެކޮޅަށް އެމެރިކާއިން ވަނީ 2022ވަނަ އަހަރު ދަތިކުރުމުގެ ފިޔަވަޅު އަޅައިފައެވެ.