ދެކުނު ކޮރެޔާގެ މަތިންދާބޯޓެއް ޖައްސަން އުޅުމުގެ ތެރޭގައި ރަންވޭ މަތިން ކަހާލައިގެން ހިނގި ހާދިސާގައި މިހާތަނަށް 62 މީހަކު މަރުވެފައިވާ ކަމަށް ރިޕޯޓުތައް ބުނެފިއެވެ.
މި ހާދިސާ ހިނގީ ތައިލެންޑްގެ ވެރިރަށް ބެންކޮކުން ފުރައިގެން، 175 ފަސަންޖަރުންނާއި ހަ ފަޅުވެރިންނާ އެކު، ދެކުނު ކޮރެޔާގެ ޖޭޖޫ އެއާލައިންސްގެ މަތިންދާބޯޓު 2216ސީ7، ދެކުނު ކޮރެޔާގެ ދެކުނުގައި އޮންނަ މުވާން އިންޓަރނޭޝަނަލް އެއަރޕޯޓަށް ޖައްސަން އުޅުމުގެ ތެރޭގައެވެ.
ވީޑިއޯތަކުން ފެންނަ ގޮތުގައި، އެ ބޯޓު ޖައްސަން އައި ވަގުތު ލޭންޑިން ގިޔާ ތިރިނުވެ، ރަން މަތީގައި ބޯޓު ކެހެމުން ގޮސް ފާރެއްގައި ޖެހި، ބޯޓުގެ ބޮޑު ބައެއްގައި ހުޅުފަޅައިގެންދާ މަންޒަރު ފެނެއެވެ.
ބޯޓުން މީހުން ސަލާމަތްކުރުމުގެ މަސައްކަތް ކުރަމުންދާއިރު، މިހާތަނަށް ދެ މީހަކު ސަލާމަތްކޮށްފައިވާ ކަމަށް ރިޕޯޓުތައް ބުނެއެވެ.
މި ހާދިސާގައި މަރުވި މީހުންގެ ސީދާ އަދަދެއް އަދި ރަސްމީކޮށް ހާމަކޮށްފައިނުވިނަމަވެސް، ބައެއް ރިޕޯޓުތައް ބުނާ ގޮތުގައި އެ ބޯޓުން ދަތުރުކުރި މީހުންގެ ތެރެއިން 62 މީހަކު ވަނީ މަރުވެފައެވެ.
މި ހާދިސާ ހިނގަން މެދުވެރިވި ސަބަބެއް ދެނަގަތުމުގެ މަސައްކަތް ކުރަމުންދާކަމަށް، ޖޭޖޫ އެއަރލައިންސްގެ ތަރުޖަމާނު މީޑިޔާތަކަށް ވިދާޅުވިއެވެ.
މުވާން އިންޓަރނޭޝަނަލް އެއަރޕޯޓުގެ އުދުހުންތައް ވަނީ މިވަގުތަށް ކެންސަލްކޮށްފައެވެ.