އެމެރިކާގެ ކުރީގެ ރައީސް ޖިމީ ކާޓަރ އަވަހާރަވެއްޖެއެވެ.
1976ވަނަ އަހަރުގެ އެމެރިކާގެ ރިޔާސީ އިންތިޚާބުގައި އޭރުގެ ރައީސް ޖެރަލްޑް ފޯޑު ބަލިކުރައްވައި ޑިމޮކްރަޓެއް ކަމުގައިވާ ޖިމީ ކާޓަރ ވަނީ ރައީސްކަމާ ޙަވާލުވެވަޑައިގެންފައެވެ. އޭނާ ވެރިކަން ކުރެއްވީ 1977ވަނަ އަހަރުގެ ޖަނަވަރީ މަހުން ފެށިގެން 1981ވަނަ އަހަރުގެ ޖަނަވަރީ މަހަށެވެ. އޭނާގެ ވެރިކަމުގެ ހަތަރު އަހަރުގެ ތެރޭގައި ގިނަ ގޮންޖެހުން ތަކަކާ ކުރިމަތިލާން ޖެހިވަޑައިގަތެވެ. އެ ގޮތުން ޤައުމުގެ އިޤްތިޞާދީ ޙާލަތު އިންތިހާއަށް ގޯސްވުމާއި އެމެރިކާގެ 52 ރައްޔިތުން އީރާނުގެ އަސީރުންގެ ގޮތުގައި ގެންދިޔުން ހިމެނެއެވެ. އޭނާގެ ވެރިކަމުގައި ޙާޞިލް ކުރެއްވި އެންމެ ފާހަގަ ކޮށްލެވޭ އެއް ކާމިޔާބީއަކީ ޔަހޫދީ ދައުލަތާއި މިޞްރާ ދެމެދު ޞުލްޙަ ޤާއިމުކޮށް މެދިއިރުމައްޗަށް ޞުލްޙަ ގެނައުމެވެ. އޭނާގެ ވެރިކަން ނިމުމަކަށް އައީ ރިޔާސީ އިންތިޚާބުގައި ރޮނަލްޑް ރޭގަން އޭނާގެ މައްޗަށް ކުރި ހޯއްދެވުމުންނެވެ.
ކާޓަރގެ ވެރިކަން ނިމުނު އިރު އޭނާގެ މަޤުބޫލުކަން ގެއްލުނު ނަމަވެސް އޭނާ އަކީ އިންސާނީ ހައްޤުތަކަށާއި ޞުލްޙައަށް ވަކާލާތުކުރެއްވި ވަރުގަދަ ޝަޚުސިއްޔަތެކެވެ. އޭނާ ކުރެއްވި އިންސާނީ މަސައްކަތްތަކަށް 2022ވަނަ އަހަރު ނޯބެލް އިނާމު ވެސް ވަނީ ލިބިވަޑައިގެންފައެވެ.
ފާއިތުވި އަހަރުތަކުގައި ކާޓަރއަށްވަނީ ގިނަ ޞިއްޙީ މައްސަލަތަކެއް ކުރިމަތިވެވަޑައިގެންފައެވެ. އެ ގޮތުން ހަމުގެ ކެންސަރު ޖެހިވަޑައިގެން އޭނާގެ ފުރަމެއަށާއި ސިކުނޑިއަށް ވަނީ ކެންސަރު ފެތުރިފައެވެ. އިތުރު ޞިއްޙީ ފަރުވާ ނުހޯއްދަވަން ނިންމަވާ ހޮސްޕިސް ޚިދުމަތް ހޯއްދަވަން އޭނާ ނިންމެނީ 2023ވަނަ އަހަރުގެ ފެބްރުވަރީ މަހުގެ ތެރޭގައެވެ. އޭނަ އަވާހަރީ ޖޯޖިޔާގައި ހުންނަ އޭނާގެ ގެކޮޅުގައި ޢުމުރުން 100 އަަހަރުގައެވެ.