ފެންބޮޑުވެގެން ލިބިދާނެ ގެއްލުމަކުން ރައްކާތެރިވުމަށް ދުރާލާ ފިޔަވަޅު އެޅުމަށް އިލްތިމާސްކޮށްފި

ރާއްޖޭއަށް މިހާރު ކުރަމުންދާ ވިއްސާރައިގައި ފެންބޮޑުވެގެން ލިބިދާނޭ ގެއްލުން ކުޑަކުރުމަށް ދުރާލާ ފިޔަވަޅު އެޅުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީއިން އިލްތިމާސްކުރައްވައިފިއެވެ.

އައު އަހަރު ބަންދުގައި މޫސުން ގޯސްވާނެކަމަށް ލަފާކޮށް މޫސުމާއި ބެހޭ ޤައުމީ އިދާރާއިން ވަނީ ކުރިއަށް އޮތް ހަތަރު ދުވަހުވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް ލަފާކުރައްވާފައެވެ.

ރާއްޖޭގެ ބޮޑު ބަޔަކަށް ވިއްސާރަ ކުރާނެކަމަށް ލަފާކުރައްވާފައިވާތީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވަނީ ފެންބޮޑުވެ ގޭތެރެއަށް ފެން ވަނުމުގެ ސަބަބުން ލިބިދާނޭ ގެއްލުން ކުޑަކުރުމަށް ދުރާލާ ފިޔަވަޅު އެޅުމަށް އިލްތިމާސްކުރައްވާފައެވެ. އެގޮތުން ގޭތެރޭގައި ފެންބޮޑުވެއްޖެ ހާލަތެއްގައި ގެއްލުންވެދާނެ ފަދަ މުދަލާއި އެހެނިގެން ތަކެތި ފެނުގެ އަސަރު ނުފޯރާނެ ފަދަ ތަނަކަށް ބަދަލުކުރުމަށާއި، އަދި އިލެކްޓްރޯނިކް ސާމާނު ބޭނުން ނުކުރާނަމަ ނިންވާލުމަށްވެސް އެ އޮތޯރިޓީން ވަނީ އިލްތިމާސްކުރައްވާފައެވެ. މީގެއިތުރުން އުދަ އަރާފާނެކަމަށް ލަފާކޮށް ދުރާލާ ތައްތާރުވުމަށްވެސް ވަނީ އިލްތިމާސްކުރައްވާފައެވެ.

އެންމެ ފަހުން ރާއްޖެއަށް ކުރި ވިއްސާރާގައި ގެއްލުން ލިބިގެން 57 ގެއިން ރިޕޯޓްކޮށްފައިވާކަމަށް އެންޑީއެމްއޭއިން ވިދާޅުވެއެވެ.