ސިނގިރޭޓު ހަދަން ބޭނުންކުރާ ތަކެތި ރާއްޖެ އެތެރެކުރުން ޤާނޫނުގައި އޮތީ މަނާކޮށްފައި: ސިއްހީ ވުޒާރާ

ސިނގިރޭޓު ހަދަން ބޭނުންކުރާ ތަކެތި ރާއްޖެ އެތެރެކުރުން ދުންފަތް ކޮންޓްރޯލްކުރުމާބެހޭ ޤާނޫނުގެ ދަށުން އޮތީ މަނާކޮށްފައިކަމަށް ސިއްހީ ވުޒާރާއިން ވިދާޅުވެއްޖެއެވެ.

ސިއްހީ ވުޒާރާއިން މިހެން ވިދާޅުވީ ސިނގިރޭޓު ހަދަން ބޭނުންކުރާ ކަރުދާހާއި ފިލްޓަރު ރާއްޖެ އެތެރެކުރުން މަނާކުރަން ސިއްހީ ވުޒާރާއިން ކަސްޓަމްސްއަށް އަންގާފައިވާކަމަށް ބުނެ ދެކެވެމުންދާ ވާހަކަތާއި ގުޅިގެނެވެ.

ސިއްހީ ވުޒާރާގެ އޮފިޝަލަކު ވިދާޅުވީ ދުންފަތް ކޮންޓްރޯލްކުރުމާބެހޭ ޤާނޫނުގެ ދަށުން ސިނގިރޭޓު ހަދަން ބޭނުންކުރާ ތަކެތި ރާއްޖެ އެތެރެކުރުމަކީ މަނާކަމެއްކަމަށެވެ. އަދި އެއީ އެ ވުޒާރާއިން ނިންމެވި ނިންމުމެއް ނޫންކަމަށާއި، އެ ވުޒާރާއިން ކަމާބެހޭ ފަރާތްތަކަށް އަންގަވާފައިވަނީ ޤާނޫނުގައި ބުނާ ކަންކަން ތަންފީޒުކުރެއްވުމަށްކަމަށްވެސް ސިއްހީ ވުޒާރާގެ އޮފިޝަލް ވިދާޅުވިއެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް މިދިޔަ ނޮވެމްބަރުމަހު ގެނައި އިސްލާހުގައި ވަނީ ދިވެހިރާއްޖޭގައި އެއްވެސް މިންވަރަކަށް ދުންފަތުގެ ބާވަތެއް އުފެއްދުމަކީ މަނާކަމެއްކަމަށް ބަޔާންކޮށްފައެވެ. އަދި ދުންފަތް ގަހާއި ދުންފަތުގެ ގަހުގެ އޮށް ހިމެނޭހެން ދުންފަތް ގަސް ހެއްދުމަށް ބޭނުންކުރެވިދާނެ އެ ގަހުގެ އެނޫންވެސް ބައެއް، ރާއްޖެ އެތެރެކުރުމަކީވެސް މަނާކަމެއްކަމަށް ޤާނޫނުގައި ބަޔާންކޮށްފައިވެއެވެ.

ދުންފަތް ކޮންޓްރޯލްކުރުމާބެހޭ ޤާނޫނުގައި ވަނީ ދުންފަތުގެ ބާވަތްތައް މާނަކުރާ ގޮތް ބަޔާންކޮށްފައެވެ. އެގޮތުން ދުންފަތުގެ ބާވަތްތައްކަމަށް ބަލާނީ ދުންފަތާއި ދުންފަތުގެ ތަނޑިއާއި ނިކޮޓިންއާއި ދުންފަތާއި ދުންފަތުގެ ތަނޑިއާއި ނިކޮޓިން ހިމަނައިގެން ތައްޔާރުކޮށްފައި ހުންނަ ތަކެއްޗަށެވެ. އަދި އެއިން އެއްވެސް ބާވަތެއް އެއްވެސް މިންވަރަކަށް ހިމެނޭ، ހަފައިގެން ނުވަތަ ބޮއެގެން ނުވަތަ ވަސްދަމައިގެން ނުވަތަ ހަށިގަނޑުގެ ތަނެއްގައި ތަތްކޮށްގެން ނުވަތަ ޖައްސައިގެން ނުވަތަ އުނގުޅައިގެންވިއަސް އޭގެ މާއްދާއެއް ނުވަތަ މާއްދާތަކެއް ހަށިގަނޑަށް ވާޞިލުވާގޮތަށް ތައްޔާރުކޮށްފައިވާ ކޮންމެ އެއްޗަކީ ދުންފަތުގެ ބާވަތެއްކަމަށް ޤާނޫނުގައި ބަޔާންކޮށްފައިވެއެވެ. އެހެންކަމުން ދުންފަތް އޮޅަން ބޭނުންކުރާ ކަރުދާހާއި ފިލްޓަރަކީ ދުންފަތުގެ ބާވަތެއް ހަށިގަނޑަށް ވާޞިލުކޮށްދޭން ބޭނުންކުރާ އެއްޗަކަށްވާތީ، އެއީ ދުންފަތުގެ ބާވަތެއްކަމަށް ޤާނޫނުގައި ކަނޑައަޅައި، އެ ތަކެތި ރާއްޖެ އެތެރެކުރުންވެސް ވަނީ މަނާކޮށްފައެވެ.

ދުންފަތުން ދުރުހެލިވުމަށް ބޭނުންކުރާ ތަކެތިވެސް މަނާކޮށްފައިވާކަމަށް ބުނެ ބައެއް ފަރާތްތަކުން ވާހަކަތައް ފެތުރިނަމަވެސް، އެއީ ދޮގު ވާހަކަތަކެއްކަމަށް ސަރުކާރުން ވިދާޅުވެއެވެ. އެގޮތުން ދުންފަތުން ދުރުހެލިވުމަށް "ސެޒޭޝަން" ފަރުވާގެ ތެރެއިން ދެވޭ އަދި ކަމާބެހޭ ފަންނީ އިދާރާތަކުން ކަނޑައަޅައި ހުއްދަކޮށްފައިވާ ނިކޮޓިން ރިޕްލޭސްމަންޓް ތެރަޕީ ނުވަތަ ފަރުވާގެ ގޮތުގައި ބޭނުންކުރާ މި ކަހަލަ އެހެން ބާވަތްތައް ގާނޫނުގެ ބޭނުމަށް ދުންފަތުގެ ބާވަތްތައްކަމަށް ނުބެލެވޭ ކަމަށް ވަނީ ބުނެފައިވެއެވެ.