މިރޭ 8:00 ޖެހުމާއި ހަމައަށް މާލޭގެ މަގުތަކުން 7600 ޓަނުގެ ފެން ހިންދައިފި

މާލެއަށް ބޯކޮށް ވާރެވެހި ފެން ބޮޑުވުމުގެ ސަބަބުން ފެން ހިންދުމަށްޓަކައި ކުރަމުންދާ މަސައްކަތުގެ ތެރެއިން 7600 ޓަނުގެ ފެން ހިންދާފައިވާކަމަށް މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ވިދާޅުވެއްޖެއެވެ.

ޕީއެސްއެމް ނިއުސްއަށް މައުލޫމާތު ދެއްވަމުން އެމްއެންޑީއެފްގެ މީޑިއާ އޮފިސަރ މޭޖަރ ހަނާ މުޙައްމަދު ވިދާޅުވީ ރާއްޖޭގެ އެކި ހިސާބުތަކަށް ބޯކޮށް ވާރޭވެރި ފެން ބޮޑުވުމުގެ ސަބަބުން އަތޮޅުތެރޭގެ 7 ރަށެއްގައި އެމްއެންޑީއެފްއިން ހަރަކާތްތެރިވަމުންދާ ކަމަށެވެ. އަދި އެ ރަށްރަށުގެ ރައްޔިތުންނާ ގުޅިގެން ފެން ހިންދުމުގެ މަސައްކަތް އެމްއެންޑީއެފުން ކުރަމުންދާކަމަށްވެސް ހަނާ ވިދާޅުވިއެވެ.

"ށ. ނަރުދޫއާއި އދ. މާމިގިލީއާއި ކ. މާފުށްޓާއި ކ. ގުރައިދޫއާއި ދ. ކުޑަހުވަދޫއާއި ދ. މީދޫގެ އިތުރުން ފ. ނިލަންދޫގައި އެމްއެންޑީއެފުން ދަނީ ހަރަކާތްތެރިވަމުން." ހަނާ ވިދާޅުވިއެވެ.

މިހާރު ކުރަމުންދާ ވިއްސާރާގައި މާލެ ސަރަހައްދަށްވެސް ބޯކޮށް ވާރޭވެހި ވަރަށް ބޮޑަށް ފެން ބޮޑުވެފައިވެއެވެ. ހަނާ ވިދާޅުވީ މާލޭގެ މަގުތަކުން ފެން ހިންދުމަށް 16 ޕަންޕެއް 6 ސަރަހައްދެއްގައި ބަހައްޓާފައިވާ ކަމަށެވެ. އަދި މިރޭ 8:00 ޖެހުމާއި ހަމައަށް 7،639 ޓަނުގެ ފެން މާލެއިން ހިންދާފައިވާކަމަށް އެމްއެންޑީއެފްގެ މީޑިއާ އޮފިސަރ ވިދާޅުވިއެވެ.

ވިއްސާރަވެ ފެން ބޮޑުވުމާ ގުޅިގެން ފެން ހިންދުމުގެ އިތުރުން ޢުމްރާއަށްފަހު އަނބުރާ ރާއްޖެ އައި ދިވެހިން ގެއަށް ދިއުމުގެ އެހީތެރިކަން ފޯރުކޮށްދީފައިވާކަމަށް ހަނާ ވިދާޅުވިއެވެ.