ރަޝިޔާގެ ހުޅަނގުގައި އޮންނަ ކުރޫސްކު ސަރަޙައްދުން ޔޫކްރެއިން ސިފައިން ފަހަތަށް ޖެއްސުމަށް ފާއިތުވި ފަސް މަސް ދުވަހު ރަޝިޔާ ސިފައިން މަސައްކަތް ކުރަމުން ދަނިކޮށް އެ ސަރަޙައްދަށް ޔޫކްރެއިން އަސްކަރިއްޔާއިން ދެމުންދާ ޙަމަލާތައް ވަރުގަދަކޮށްފިއެވެ.
ޔޫކްރެއިނުން ދިން ކުއްލި ޙަމަލާތަކެއްގައި ކުރޫސްކުގެ ބައެއް ސަރަޙައްދުތައް އެ ޤައުމުގެ ސިފައިންގެ ބާރުގެ ދަށަށް ގެންގޮސްފައި ވަނީ މިދިޔަ އަހަރުގެ އޯގަސްޓު މަހުގެ ހަ ވަނަ ދުވަހެވެ.
ޔޫކްރެއިނުގެ އައު ޙަމަލާތައް ހުއްޓުވާފައިވާ ކަމަށް ރަޝިޔާގެ އަސްކަރިއްޔާއިން ބުނި ނަމަވެސް، ހަނގުރާމައިގެ މަޢުލޫމާތުތައް ގެނެސްދެމުންދާ ބްލޮގަރުން ބުނާ ގޮތުގައި، ޔޫކްރެއިނުގެ ޙަމަލާތަކުގައި ރަޝިޔާ ސިފައިން ފަހަތަށް ޖެހެން މަޖުބޫރުވެފައިވާ ކަމަށެވެ. ރަޝިޔާއިން ކުރަމުންދާ ހަނގުރާމައަށް ތާޢީދުކުރި ނަމަވެސް، ޙަމަލާތައް ބަދަލުކުރުމުގެ ތެރެއިން ރަޝިޔާ ސިފައިންނަށް ކުރިމަތިވާ ނާކާމިޔާބީތަކުގެ ވާހަކަތައް ވެސް މި ބްލޮގަރުން ގެނެސްދެއެވެ.
"ދުޝްމަނުންގެ ވަރުގަދަ ޙަމަލާތައް ކުރިމަތިވި ނަމަވެސް، އަޅުގަނޑުމެންގެ ވަރުގަދަ ޔުނިޓުތަކުން ސަފުތައް ހިފަހައްޓައި، ފަހަތަށް ނުޖެހި ދަނީ ރައްދު ދެމުން،" ޔޫކްރެއިނުގެ ޙަމަލާތަކަށް ފަހު ފުރަތަމަ ގަޑިއިރުގެ ތެރޭގައި އޮޕަރޭޓިވްނި ސްވޮޑްކީ (އޮޕަރޭޝަނަލް ރިޕޯޓްސް) ޗެނަލު ހިންގާ ބްލޮގަރު ބުނެފައިވެއެވެ.
ޔޫރީ ޕޮޑޯލިޔަކް ނަމަކަށް ކިޔާ ބްލޮގަރު ބުނީ، ރަޝިޔާ ސިފައިންނަށް ފުރަތަމަ ހެދުނު ގޯސްތަކަށްފަހު، ޙާލަތު ކޮންޓްރޯލްކޮށް، ކުރޫސްކުގެ ވެރިރަށަށް ޔޫކްރެއިނު ސިފައިން ވަންނަން އޮތް މަގު ބަންދުކޮށްފައިވާ ކަމަށެވެ.
ހަނގުރާމައިގައި ބައިވެރިވާ ރަޝިޔާގެ ސިފައިންގެ ޢަދަދު ދުވަހެއް ދުވަހަކަށް ދަށަށް ދާން ފެށުމުން އެ ކަން ފޫބެއްދުމުގެ ގޮތުން ރަޝިޔާއިން ވަނީ ހަނގުރާމައިގައި އުތުރު ކޮރެޔާގެ ސިފައިން ބޭނުން ކުރަން ފަށައިފައެވެ.
މި ގޮތުން، ކުރޫސްކު ސަރަޙައްދުގައި އުތުރު ކޮރެޔާގެ 11،000 ސިފައިން ޙަރަކާތްތެރިވަމުންދާ ކަމަށް ޔޫކްރެއިނުން ދަނީ ބުނަމުންނެވެ.
ޔޫކްރައިނުގެ ރައީސް ވޮލޮޑޮމީރު ޒެލެންސްކީ، މިދިޔަ ހޮނިހިރު ދުވަހު ވިދާޅުވި ގޮތުގައި، ކުރޫސްކުގެ އަވަށެއްގައި ޙަމަލާތައް ބަދަލުކުރުމުގެ ތެރެއިން ރަޝިޔާ ސިފައިންގެ އިތުރުން ގިނަ ޢަދަދެއްގެ އުތުރު ކޮރެޔާގެ ސިފައިން ވަނީ މަރުވެފައެވެ. ނަމަވެސް، ޙަމަލާތަކުގައި މަރުވި ސިފައިންގެ އަދަދެއް ޒެލެންސްކީ ވިދާޅެއްނުވެއެވެ.
ފާއިތުވި އަހަރުގެ ތެރޭގައި ޔޫކްރައިނުގެ ހުޅަނގުގެ ސަރަޙައްދެއް ކަމަށްވާ ދޮންޔެސްކު ސަރަޙައްދަށް އަތްގަދަ ކުރުމަށް ރަޝިޔާއިން ވަނީ ގިނަ މަސައްކަތްތަކެއް ކޮށްފައެވެ. އެމެރިކާގެ އިންސްޓިޓިއުޓް އޮފް ސްޓަޑީ އޮފް ވޯ (އައިއެސްޑަބްލިއު)އިން ބުނީ ސެޓެލައިޓު ފޮޓޯއިންނާއި ޖިއޯލޮކޭޓު ކޮށްފައިވާ ވީޑިޔޯ މަންޒަރުތަކުން އެނގޭ ގޮތުގައި އެ ސަރަޙައްދަށް އަތްގަދަ ކުރުމަށް ރަޝިޔާއިން ކުރަމުންދާ މަސައްކަތުގައި އެ ޤައުމަށް މިހާތަނަށް ހޯދިފައި ވަނީ 4,168 އަކަ ކިލޯމީޓަރުގެ ބިން ކަމަށެވެ. އެއީ ޔޫކްރައިނުގެ ބިމުގެ ސަރަޙައްދުގެ އެންމެ 0.69 އިންސައްތައެވެ. ރަޝިޔާއިން އަތްގަދަ ކޮށްފައިވާ ސަރަޙައްދުތަކުގެ ތެރޭގައި ގިނައީ ފެހި ބިންތަކާއި ކުދިކުދި ފަޅު އަވަށްތަކެވެ.
ދެ ފަރާތުން ވެސް ދަނީ ސުލްޙައިގެ އެއްބަސްވުމެއް އެކުލަވާލާއިރު، ޝަރުތުތައް ވަރުގަދަކުރުމަށްޓަކައި، ހަނގުރާމައިގެ މައިދާނުގައި ކުރިއެރުން ހޯދަން މަސައްކަތް ކުރަމުންނެވެ.
މި ގޮތުން، ދެ ފަރާތުން ވެސް ޙަމަލާތައް ވަރުގަދަކުރަމުން ދަނީ، އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް، މި މަހުގެ 20 ވަނަ ދުވަހު މަޤާމުގެ ހުވައި ކުރެއްވުމާ ދިމާކޮށެވެ.
ރިޔާސީ ކެމްޕޭނުގެ ތެރެއިން ޓްރަމްޕް ވަނީ، މަޤާމާ ޙަވާލުވެވަޑައިގެންނެވުމާ އެކު ހަނގުރާމަ ނިމުމަކަށް ގެންނަވާނެ ކަމަށް ތަކުރާރުކޮށް ވިދާޅުވެފައެވެ. ނަމަވެސް، އެ ކަން ޙާޞިލުކުރައްވާނެ ގޮތެއް ޓްރަމްޕް މިހާތަނަށް ވިދާޅުވެފައެއް ނުވެއެވެ.