މިދިޔަ ހަފުތާ ބަންދުގައި، 200އަށްވުރެ ގިނަ ރެފިޔުޖީން ކަނޑުމަގުން އިންޑޮނިޝިޔާއަށް ވެސް އެތެރެވެފައިވާ ކަމަށް އިންޑޮނީޝިޔާއިން ބުނެފިއެވެ. އޭގެ ތެރޭގައި ގިނައީ މިޔަންމާގެ ރޮހިންޔާ ދަރިކޮޅަށް ނިސްބަތްވާ މީހުން ކަމަށް އެ ޤައުމުން ވަނީ ބުނެފައެވެ.
ކޮންމެ އަހަރެއްގެ ވެސް އޮކްޓޯބަރު މަހާއި އޭޕްރީލް މަހާ ދެމެދު، ކަނޑުތައް މަޑުވުމާއެކު، މިޔަންމާގެ ރެފިޔުޖީން ޙިމާޔަތް ހޯދުމަށް އިންޑޮނީޝިޔާގެ އިތުރުން މެލޭޝިޔާ އަދި ތައިލެންޑަށް ދަތުރުކުރެއެވެ.
މި ގޮތުން، މިދިޔަ ހަފުތާ ބަންދުގެ ތެރޭގައި އިންޑޮނީޝިޔާގެ ސުމާޓްރާގެ އިރުން އޮންނަ އާޗޭއަށް ބޯޓުތަކެއްގައި މިޔަންމާގެ 200އަށްވުރެ ގިނަ ރެފިޔުޖީން ދަތުރުކޮށްފައިވާ ކަމަށް އެ ޤައުމުން ބުނެފައިވެއެވެ.
އދގެ ރެފިޔުޖީ އެޖެންސީ، ޔޫއެންއެޗްސީއާރުގެ ތަރުޖަމާނެއް ކަމުގައިވާ ފައިސަލް ރަޙްމާން ވިދާޅުވީ، އެ ޖަމްޢިއްޔާއިން އިނޑޮނޭޝިޔާގެ އިދާރާތަކާ ގުޅިގެން މަސައްކަތް ކުރަމުންދާ ކަމަށާއި، އެ ޖަމްޢިއްޔާގެ ވަފުދެއް މިހާރު އެ ސަރަޙައްދަށް ދަތުރުކުރަމުންދާ ކަމަށެވެ.
މިދިޔަ އަހަރުގެ އޮކްޓޯބަރާއި ނޮވެމްބަރު މަހުގެ ތެރޭގައި ވެސް، 500އަށްވުރެ ގިނަ ރެފިޔުޖީން ވަނީ ކަނޑުމަގުން އިންޑޮނީޝިޔާއަށް އެތެރެވެފައެވެ.
ރޮހިންޔާ ދަރިކޮޅަށް ނިޞްބަތްވާ މީހުންނަކީ ބުދުދީން އޮންނަ މިޔަންމާގައި ދިރިއުޅޭ ބައިމަދު މުސްލިމު އާބާދީއެކެވެ. 2017ވަނަ އަހަރުގެ އޮގަސްޓު މަހުން ފެށިގެން މިޔަންމާގެ ސަރުކާރުން ދަނީ ރޮހިންޔާ މުސްލިމުން ނައްތައިލުމަށް މަސަައްކަތް ކުރަމުންނެވެ. އދން ވަނީ މިޔަންމާގައި ރޮހިންޔާ މުސްލިމުން ނައްތައިލަން ކުރާ މަސައްކަތަކީ ބައިމަދު އާބާދީއެއް ނަސްލުހޭދު ކުރުމަށް ކުރަމުންދާ މަސައްކަތެއްގެ ގޮތުގައި ސިފަ ކޮށްފައެވެ.
ޔޫއެންއެޗްސީއާރުގެ ތަފާސްހިސާބުތަކުން ދައްކާ ގޮތުގައި 2023 ވަނަ އަހަރު އިންޑޮނީޝިޔާއަށް 2،000 އަށް ވުރެ ގިނަ ރޮހިންޔާ މީހުން އައިސްފައިވާއިރު، މިއީ އޭގެ ކުރީ ހަތަރު އަހަރު ތެރޭގައި އިންޑޮނޭޝިޔާއަށް އެތެރެވި ޖުމްލަ ޢަދަދަށް ވުރެ އިތުރު ޢަދަދެކެވެ.
އިންޑޮނީޝިޔާގެ އިތުރުން މެލޭޝިޔާއަށް ވެސް އެތެރެވާން މަސައްކަތް ކުރި އެތައް ސަތޭކަ ރޮހިންޔާ ރެފިޔުޖީން، އެ ޤައުމުގެ ކޯސްޓުގާޑުން ވަނީ ހުއްޓުވައި އަނބުރާ ފޮނުވާލައިފައެވެ.