ޣައްޒާ ޢުދުވާން ހުއްޓުވުމާ ގުޅޭ މަޝްވަރާތައް ކުރިއަށް ދަނިކޮށް 100އެއްހާ މީހުން ޝަހީދުކޮށްލައިފި
ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ދަށުން ފާއިތުވި 48 ގަޑިއިރުގެ ތެރޭގައި ދީފައިވާ ނިރުބަވެރި ޙަމަލާތަކުގައި 100އެއްހާ މީހުން ޝަހީދު ކޮށްލާފައިވާ ކަން ފަލަސްޠީނުގެ ޞިއްޙީ ޚިދުމަތްތެރިން ހާމަކޮށްފިއެވެ. ޣައްޒާއަށް ދެމުންދާ ޙަމަލާތައް އިތުރު ކުރަމުން މި ދަނީ، ޔަހޫދީންގެ ލާއިންސާނީ ޖަރީމާ ހުއްޓުމަކަށް ގެނައުމާ ގުޅޭ ގޮތުން، މެދުވެރިންގެ އެހީތެރިކަމާ އެކު، މަޝްވަރާތައް ބާއްވަމުންދާ ދަނޑިވަޅެއްގައެވެ.
ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ލާއިންސާނީ ޢުދުވާނެއް ހިންގަން ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. އެއީ، ޣައްޒާގައި ވެރިކަން ކުރާ ޙަމާސް ޖަމާޢަތް ނައްތައިލުމުގެ ނަމުގައި ފަށާފައިވާ ޢުދުވާނެކެވެ. ޣައްޒާގެ މުސްލިމުން ޝަހީދުކޮށް ނެތިކޮށްލުމަށް ޢުދުވާނީ ޙަމަލާތައް ފަށާފައި ވަނީ، އެ ދުވަހު ޙަމާސްގެ މުޖާހިދުން ޒަޔަނިސްޓުންނަށް އަމާޒުކޮށް ޖިހާދީ ޙަމަލާތަކެއް ދިނުމާ ގުޅިގެންނެވެ. އެއީ، ޔަހޫދީންގެ އަޅުވެތިކަމާއި އިސްތިޢުމާރީ ވެރިކަމަށް ކެތް ނުކުރެވިގެން ޙަމާސްގެ މުޖާހިދުން ދީފައިވާ ޙަމަލާއެކެވެ.
ޙަމާސްގެ މުޖާހިދުންނާއި ޔަހޫދީންނާ ދެމެދު ކުރަމުންދާ މަޝްވަރާތައް މެދުވެރިންގެ ގޮތުގައި ވިލަރެސް ކުރަނީ މިޞްރާއި ޤަޠަރުންނެވެ. ޔަހޫދީންގެ އެންމެ ބޮޑު މަދަދުގާރު، އެމެރިކާއިން ވެސް ދަނީ ނަމެއްގައި މަޝްވަރާތަކުގައި ބައިވެރިވަމުންނެވެ. ދެ ފަރާތުގެ ދެމެދުގައި މި ވަގުތު ހިނގަމުންދާ މަޝްވަރާތަކުގައި އެންމެ ބޮޑަށް އަލިއަޅުވައިލާފައި ވަނީ ޙަމާސުން ރަހީނު ކޮށްފައިވާ އަސީރުން މިނިވަން ކުރުމަށެވެ.
ޙަމާސްގެ ހުށަހެޅުންތައް ޔަހޫދީން ބޮލާލާޖެހުން
ޙަމާސުން ބުނީ، ޢުދުވާން ހުއްޓުމަކަށް ގެނައުމާ އެކު، އެ ޖަމާޢަތުން ވަގުތުން މިނިވަން ކުރާނެ 34 އަސީރެއްގެ ނަން ޒަޔަނިސްޓު ސަރުކާރާ ހިއްސާ ކޮށްފައިވާނެ ކަމުގައެވެ. ނަމަވެސް، ޒަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫގެ އޮފީހުން ވަނީ އެ ކަން ދޮގުކޮށްފައެވެ. މި ކަމާ ގުޅިގެން، ޙަމާސުން ވަނީ، އެ ޖަމާޢަތުން މިނިވަން ކުރުމަށް ނިންމާފައިވާ 34 އަަސީރުންގެ ނަން ހިމެނޭ ލިސްޓެއް މީޑިޔާތަކާ ހިއްސާ ކޮށްފައެވެ.
ޣައްޒާ ޢުދުވާން ހުއްޓުމަކަށް ގެނައުމަށް ކުރަމުންދާ މަޝްވަރާތައް އަލުން ފަށާފައިވާއިރު، އެމެރިކާގެ ރައީސް ޖޯ ބައިޑަންގެ ސަރުކާރުގެ އަމާޒަކީ ޖަނަވަރީ 20ވަނަ ދުވަހުގެ ކުރިން ދެ ފަރާތުގެ ދެމެދުގައި އެއްބަސްވުމެއް އެކުލަވައިލުމެވެ. ސަބަބަކީ، އެ ދުވަހު އިންތިޚާބީ-ރައީސް ޑޮނަލްޑް ޓްރަމްޕް، ރައީސް ކަމުގެ މަޤާމުގެ ހުވައި ކުރައްވައި އެމެރިކާގެ ވެރިކަމާ ޙަވާލުވެ ވަޑައިގަންނަވާނެއެވެ. އޭގެ ކުރިން ޢުދުވާންތަކަށް ނިމުމެއް ނުގެނެވުމަކީ ބައިޑަންގެ ސަރުކާރުގެ އަގުވެއްޓުމުގެ ގޮތުގައި ބެލެވޭނެ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ޢުދުވާނަށް ނިމުމެއް ގެނައުމާ ގުޅޭ މަޝްވަރާތައް ކުރަމުންދާ މި ދަނޑިވަޅުގައި، ޔަހޫދީން ދަނީ ޣައްޒާ ޢާންމު ރައްޔިތުންނަށް އަމާޒުކޮށް ދެމުންދާ ނިރުބަވެރި ޙަމަލާތައް އިތުރުކޮށް ފުޅާ ކުރަމުންނެވެ. ފަލަސްޠީނުގެ ޞިއްޙީ ޚިދުމަތްތެރިން ބުނީ، ފާއިތުވި 48 ވަރަކަށް ގަޑިއިރުގެ ތެެރޭގައި ދީފައިވާ ރަޙުމު ކުޑަ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 105އަށް އުފުލިފައިވާ ކަމުގައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި މައުސޫމު ކުޑަކުދިންނެވެ.
މި ކަމާ މެދު އެމެރިކާގެ ޚާރިޖީ ވުޒާރާއިން ވެސް ވަނީ ކަންބޮޑުވުން ފާޅުކޮށްފައެވެ. އަދި، ޙަމާސްގެ މުޖާހިދުން ޝަހީދު ކުރުމުގެ ނަމުގައި ދެމުންދާ ޙަމަލާތަކުގައި ޝަހީދުވަމުންދާ ޢާންމު ރައްޔިތުންގެ އަދަދުތައް މަދު ކުރުމަށް ހަރުދަނާ ފިޔަވަޅުތަކެއް އެޅުމަށް ގޮވައިލާފައެވެ. އެމެރިކާއިން މި މޭރުމުން ބުނި ނަމަވެސް، ޔަހޫދީންގެ ޙިމާޔަތާއި ރައްކާތެރިކަން ކަށަވަރު ކުރުމުގެ ނަމުގައި ކޮންމެ ފަދަ ޖަރީމާއެއް ހިންގުމަކީ އެމެރިކާއިން ތާޢީދު ކުރާނެ ކަމެއް ކަމުގައި ވެސް އެ ވުޒާރާއިން ބުންޏެވެ.
މަޝްވަރާތަކުގައި ޙަމާސްގެ ބައިވެރިވުމާއި ފުރިހަމަ އެއްބާރުލުން
ޙަމާސާއި ޔަހޫދީންނާ ދެމެދު ކުރަމުންދާ މަޝްވަރާތަކުގެ އަައު ބައްދަލުވުންތައް މި ވަގުތު ކުރިއަށް ދަނީ ޤަޠަރުގެ ވެރިރަށް ދަވްޙާގައެވެ. ޙަމާސުން ބުނީ، މަޝްވަރާތަކުގައި އެ ޖަމާޢަތުން ބައިވެރިވަމުން ދަނީ ހެޔޮ ނިޔަތެއްގައި ކަމުގައެވެ. އަދި، ވީ އެންމެ އަވަހަކަށް ސުލްޙައިގެ އެއްބަސްވުމެއް އެކުލަވައިލަން އެ ޖަމާާޢަތުން ހުށަހަޅާފައިވާނެ ކަމަށާއި، އެ މިސްރާބަށް މަސައްކަތް ކުރަމުންދާ ކަމުގައެވެ. ނަމަވެސް، އަސީރުން މިިނިވަން ކުރުމުގެ ކުރިން ޢުދުވާން ހުއްޓައިލައި، ޣައްޒާއަށް އަރައިގަނެފައިވާ ޔަހޫދީ ނިރުބަވެރި ސިފައިން އެ ސަހަރުން ފައިބަން ފެށުމަކީ ޙަމާސްގެ މުހިންމު ޝަރުޠެކެވެ.
"ނަމަވެސް، އިސްތިޢުމާރީން [އިސްރާއީލުން] ދަނީ އެއްބަސްވުމުގައިވާ ކަންކަމަށް އިންކާރު ކުރަމުން، އަދި ކުރިއަށް އެންމެ ފިޔަވަޅެއް އެޅުމަށް ވެސް ދެކޮޅު ހަދަމުން،" ޙަމާސްގެ އިސް އޮފިޝަލަކު ބުންޏެވެ. އަނިޔާވެރި ނަތަންޔާހޫ ބުނަމުން ދަނީ، ޢުދުވާންތައް ހުއްޓައިލާނީ ޙަމާސް ޖަމާޢަތުގެ ހުރިހާ މުޖާހިދުން ޝަހީދުކޮށް ނިމުމުން ކަމުގައެވެ.
ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 45,805އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 109,064 މީހުން ޒަޚަމު ކޮށްލާފައެވެ.