ޚިޔާނާތުގެ ކުށުގައި 12 އަހަރުގެ ޖަލު ޙުކުމެއް ތަންފީޒުކުރައްވަމުން ގެންދަވާ، މެލޭޝިޔާގެ ކުރީގެ ބޮޑުވަޒީރު ނަޖީބް ރައްޒާޤް، ގޭބަންދަށް ބަދަލުވެވަޑައިގެންނެވުމަށް ކުރައްވަމުން ގެންދަވާ މަސައްކަތަށް ކުރިއެރުމެއް ލިބިއްޖެއެވެ.
ނަޖީބާ ދެކޮޅަށް 12 އަހަރު ދުވަހުގެ ޖަލު ޙުކުމެއް އިއްވާފައި ވަނީ ވަން-މެލޭޝިޔާ ޑިވެލޮޕްމަންޓް ބަރްހާދް (ވަންއެމްޑީބީ)ގެ ފައިސާގެ ތެރެއިން 4.5 ބިލިޔަން އެމެރިކާ ޑޮލަރުގެ ޚިޔާނާތާއި މަނީ ލޯންޑްރިންގގެ ދަޢުވާގައެވެ. އެ ފައިސާގެ ތެރެއިން 1 ބިލިޔަން އެމެރިކާ ޑޮލަރު ޖަމާކުރައްވާފައި ވަނީ އޭނާގެ އަމިއްލަ އެކައުންޓަށެވެ.
އެ ފަންޑަކީ ނަޖީބުގެ ސަރުކާރުން 2009 ވަނަ އަހަރު އުފައްދާފައިވާ ފަންޑެކެވެ. ވެރިކަމުގައި ހުންނަވައި ނަޖީބު ވަނީ، ކޮރަޕްޝަންގެ ތުޙްމަތުތައް ތަޙްޤީޤް ކުރުމަށް ހުރަސް އަޅުއްވާފައެވެ. އެއީ، މެލޭޝިޔާގެ ބޮޑުވަޒީރު ކަމުގެ މަޤާމު އޭނާ ފުރުއްވި ފުރަތަމަ އަހަރެވެ. ވަންއެމްޑީބީން ގެއްލިފައިވާ ފައިސާއަކީ ސަޢޫދީ ޢަރަބިއްޔާގެ ޝާހީ ޢާއިލާއިން ހަދިޔާކޮށްފައިވާ ފައިސާއެއް ކަމަށް ބެލެވެއެވެ.
ދައުލަތުގެ ފައިސާއަށް ޚިޔާނާތްތެރިވުމާއި މަނީ ލޯންޑްރިންގ ކުށް ސާބިތުވެ ނަޖީބްގެ މައްޗަށް 2022 ވަނަ އަހަރު އިއްވާފައިވާ 12 އަހަރުގެ ޖަލު ޙުކުމުން ބައެއް ވަނީ އެ ޤައުމުގެ ރަސްގެފާނު މަޢާފުކޮށްދެއްވައިފައެވެ. ޖަލު ޙުކުމުން ބައެއް މަޢާފްކޮށްދެއްވި ޤަރާރުގައި ހިމެނޭ އިތުރު ލިޔުމެއްގައި، ޙުކުމުގެ ބާކީ އޮތް މުއްދަތު ގޭބަންދަށް ބަދަލުކުރެވޭނެ މާއްދާއެއް އޮތް ކަމަށް ވިދާޅުވެ، ނަޖީބް ގެންދަވަނީ އެ ލިޔުން ހޯއްދަވަން ތަކުރާރުކޮށް ވަކާލާތުކުރައްވަމުންނެވެ. އެ ލިޔުން ހޯއްދެވުމަށް، ނަޖީބްގެ ފަރާތުން ހުށަހެޅުއްވި މައްސަލަ ދަށު ކޯޓުން ވަނީ ބޭރުކޮށްލައިފައެވެ.
ނަމަވެސް، މެލޭޝިޔާގެ އިސްތިޢުނާފު ކޯޓުން ވަނީ، އެ ލިޔުމުގެ ޞައްޙަކަން ބެލުމުގެ ޙައްޤު ނަޖީބަށް ލިބިވަޑައިގަންނަވާ ކަމަށް ނިންމައި، އެހެން ފަނޑިޔާރަކު ޢައްޔަނުކޮށްގެން އެ މައްސަލަ އަލުން ބެލުމަށް ހައިކޯޓުގެ މައްޗަށް ޢަމުރުކޮށްފައެވެ. މިއީ އިންސާފު ޤާއިމުކުރުމަށް ކުރިއަށް އެޅުނު ފިޔަވަޅެއް ކަމަށް އެ ޙުކުމަށްފަހު ފޭސްބުކްގައި ޙިއްޞާ ކުރެއްވި ޕޯސްޓެއްގައި ނަޖީބް ވިދާޅުވިއެވެ.
މި މައްސަލައިގެ ޝަރީއަތް ކުރިއަށްދަނިކޮށް، ނަޖީބްގެ ގާތްމީހަކު ވަނީ، ގޭބަންދަށް ބަދަލުކުރުމުގެ ފުރުޞަތު އޮތް ކަމަށް ބުނާ ލިޔުން، ރަސްގެފާނު ދޫކުރައްވާފައިވާ ކަމަށް ބުނެ، ގަނޑުވަރުގެ ސިޓީއެއް ސޯޝަލް މީޑިޔާގައި ޙިއްސާކޮށްފައެވެ. މިއީ ނަޖީބް ހޯއްދަވަން މަސައްކަތް ކުރައްވާ ލިޔުމުގެ ޞައްޙަ ކަމާ ގުޅޭގޮތުން ރަސްމީ ސިފައެއްގައި އެއްޗެއް ބުނި ފުރަތަމަ ފަހަރެވެ. ނަމަވެސް، މެލޭޝިޔާގެ ސަރުކާރުން އަދިވެސް ބުނަނީ އެފަދަ ލިޔުމެއް ގަނޑުވަރުން ލިބިފައިނުވާ ކަމަށެވެ.