ތުރުކީވިލާތުން ހުށަހަޅާފައިވާ ޝަރުތުތަކަށް އެއްބަސްނުވެއްޖެނަމަ، ސަރަޙައްދު ހުރަސްކޮށް ސޫރިޔާގެ އިރުދެކުނުގައި ޙަރަކާތްތެރިވާ ކުރުދީ ދަރިކޮޅުގެ ހަތިޔާރުއެޅި ޖަމާޢަތާ ދެކޮޅަށް އަސްކަރީ ޙަރަކާތެއް ހިންގާނެކަމުގެ އިންޒާރު ތުރުކީވިލާތުގެ ޚާރިޖީ ވަޒީރު ޙަކާން ފިދާން ދެއްވައިފިއެވެ.
ސޫރިޔާގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ވައިޕީޖީއަކީ، ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައިވާ ކުރްދިސްތާން ވަރކަރސް ޕާޓީ (ޕީކޭކޭ)އާ ގުޅުން އޮތް ޖަމާޢަތެއް ކަމުގައި ތުރުކީވިލާތުން ޤަބޫލު ކުރެއެވެ. ވައިޕީޖީއަކީ، އެމެރިކާގެ ވާގިވެރިކަމާ އެކު އަސަދުގެ ސަރުކާރާ ދެކޮޅަށް ހަނގުރާމަ ކުރަމުން ދިޔަ ސީރިޔަން ޑިމޮކްރެޓިކް ފޯސަސް (އެސްޑީއެފާ) ގުޅިފައިވާ ހަތިޔާރު އެޅި ޖަމާޢަތެކެވެ. ތުރުކީވިލާތުގެ ސަރުކާރާ ދެކޮޅަށް މީގެ 40 އަހަރު ކުރިން އަސްކަރީ ޙަރަކާތްތައް ފެށި ޕީކޭކޭއަކީ އަންކަރާގެ އިތުރުން ވޮޝިންގޓަނާއި ވިލާތުގެ އިއްތިޙާދު (އީޔޫ)ން ވެސް ނިރުބަވެރި ޖަމާޢަތެއްގެ ގޮތުގައި ދެކޭ ގުރޫޕެކެވެ.
ސޫރިޔާގެ ރައީސް ބައްޝާރް އަލް-އަސަދުގެ ސަރުކާރު ވެއްޓުމާ ގުޅިގެން، ތުރުކީވިލާތުން ވަނީ ވައިޖީޕީ ރޫޅާލައި، އެ ޖަމާޢަތުގައި ހަރަކާތްތެރިވަމުންދާ އެހެން ޤައުމުތަކަށް ނިސްބަތްވާ ހަނގުރާމަވެރިން އަނބުރާ ގޮސް، އެ ޖަމާޢަތުގެ އިސް ވެރިން ކަމާގުޅޭ އިދާރާތަކާ އަމިއްލައަށް ޙަވާލުވުމަށް ގޮވާލައިފައެވެ.
ސީއެންއެންއަށް ދެއްވި ބަސްދީގަތުމެއްގައި ފިދާން ވިދާޅުވީ، އަސަދުގެ ސަރުކާރު ވައްޓާލައި، ސޫރިޔާގެ ސަރުކާރާ ޙަވާލުވެތިބި ހަޔިއަތު ތަޙްރީރް އަލް-ޝާމް (އެޗްޓީއެސު)ން ވައިޖީޕީގެ މައްސަލައަށް ޙައްލެއް ހޯދައިދޭންޖެހޭ ކަމަށެވެ. ނަމަވެސް، އިންތިޤާލީ މަރުޙަލާގައި ސޫރިޔާ މިވަގުތު އޮތް އިރު، އެކަމަށް ވަގުތު ނަގާނެ ކަމަށް ޤަބޫލުކުރައްވާ ކަމަށް ވެސް ފިދާން ވިދާޅުވިއެވެ.
އެ މައްސަލަ އެޗްޓީއެސަށް ޙައްލުކޮށް ނުދެވިއްޖެނަމަ، ކުރަންޖެހުނު ކޮންމެ ކަމެއް ތުރުކީވިލާތުން ކުރާނެ ކަމަށް އޭނާ ވިދާޅުވިއެވެ. އެއީ ކޮން ކަމެއްތޯ ސުވާލުކުރުމުން، ފިދާން ވިދާޅުވީ އެއީ ވައިޖީޕީއާ ދެކޮޅަށް އަސްކަރީ ޙަރަކާތެއް ހިންގުން ކަމަށެވެ.
އަސަދުގެ ވެރިކަން ވައްޓައިލަން ކުރި ހަނގުރާމައިގައި، އެޗްޓީއެސަށް ވަނީ އެސްޑީއެފްގެ ބޮޑު އެހީތެރިކަމެއް ލިބިފައެވެ. އަދި އައިއެސްގެ ނިރުބަވެރި ހަނގުރާމަވެރިން ތިބި ޖަލުތައް އަދިވެސް ބަލަހައްޓަމުން ގެންދަނީ އެސްޑީއެފުންނެވެ. ނަމަވެސް، އެ ޖަލުތައް ބެލެހެއްޓުން އެޗްޓީއެސުން ޙަވާލުވުމަށް ނިންމާފައިވާ ކަމަށް ތުރުކީވިލާތުން މީގެކުރިން ބުނެފައިވެއެވެ.
ފިދާން ވިދާޅުވި ގޮތުގައި، އެ ޖަލުތައް ބެލެހެއްޓުމުގެ ޤާބިލުކަން އެޗްޓީއެސްގައި ނެތް ނަމަ، އެ ޒިންމާއާ ތުރުކީވިލާތުން ޙަވާލުވުމަށް ރައީސް ރަޖަބް ޠައްޔިބް އުރްދުޣާން ވަނީ އަންގަވައިފައެވެ.