އިންޑިޔާއާއި ރާއްޖޭގެ އަސްކަރީ ގުޅުން ވަރުގަދަ ކުރުމަށް މަޝްވަރާކުރައްވައިފި

އިންޑިޔާއާއި ރާއްޖެއާ ދެމެދު ދިފާޢި ދާއިރާއިން ގުޅުން ވަރުގަދަ ކުރުމަށް މަޝްވަރާކުރައްވައިފިއެވެ. މިމަޝްވަރާތައް ކުރިއަށް ގެންގޮސްފައިވަނީ ދިފާޢީ ވަޒީރު މުޙައްމަދު ޣައްސާން މައުމޫން އިންޑީއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެތެރެއިންނެވެ.

ދިފާޢީ ވަޒީރު މުޙައްމަދު ޣައްސާން މައުމޫން މިމަހުގެ 7 އިން 8 އަށް އިންޑިޔާއަށް ކުރައްވަމުން ގެންދަވާ ދަތުރުފުޅުގައި، ރާއްޖޭގެ ޤައުމީ ދިފާޢީ ބާރުގެ އިސްފަރާތްތައް ބައިވެރިވެވަޑައިގަންނަވައެވެ.

މި ދަތުރުފުޅުގެ ތެރެއިން އިންޑިޔާގެ ދިފާޢީ ވަޒީރު ރާޖްނާތު ސިންގްއާއި ބައްދަލުކުރައްވާ ދެ ޤައުމުގެ ދިފާޢީ ގުޅުން ވަރުގަދަކުރުމަށް ވަނީ މަޝްވަރާކޮށްފައެވެ. މި ބައްދަލުވުމުގައި ވާހަކަދައްކަވަމުން ދިފާޢީ ވަޒީރު މުޙައްމަދު ޣައްސާން މައުމޫން ވަނީ އިންޑިޔާ ސަރުކާރުން ދިވެހިރާއްޖޭގެ ޤައުމީ ދިފާޢީ ބާރަށް ވެދެއްވާ އެހީތެރިކަމަށް ޝުކުރު އަދާކުރައްވާފައެވެ. އެގޮތުން 1988 ވެދެއްވި އެހީތެރިކަން ފާހަކޮށް ޒަމާނީ އަސްކަރީއްޔާއަކަށް ޤައުމީ ދިފާޢީ ބާރު ހެދުމަށް އިންޑިޔާއިން ފޯރުކޮށްދޭ އެހީތެރިކަން ފާހަގަކޮށް ވަޒީރު ޝުކުރު އަދާކުރެއްވިއެވެ.

މިބައްދަލުވުމުގައި އިންޑީއާގެ ދިފާޢީ ވަޒީރު ރާޖްނާތު ސިންގް ވަނީ އިންޑިޔާއިން ރާއްޖޭގެ ދިފާޢީ ދައިރާ ހަރުދަނާ ކުރުމަށް ހުރިހާ ގޮތަކުންވެސް އެހީތެރިކަން ފޯރުކޮށްދެމުންދާ ކަމަށް ވިދާޅުވެފައެވެ. މިގޮތުން ކުރިމަގުގައިވެސް މި ގުޅުން އިތުރަށް ބަދަހިކޮށް އަސްކަރީ ތަމްރީނުތަކާއި ޤާބިލީއްޔަތުކަން އިތުރުކުރުމަށް ވަސީލަތްތައްވެސް ފޯރުކޮށްދެއްވާނެ ކަމަށް އިންޑިޔާގެ ދިފާޢީ ވަޒީރު ވިދާޅުވިއެވެ.

ދިފާޢީ ވަޒީރު މުޙައްމަދު ޣައްސާން މައުމޫންގެ މި ދަތުރުފުޅަކީ މަޤާމާއި ހަވާލުވުމަށް ފަހު އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ.