ވައިގެ ދަތުރުފަތުރު ކުރުމުގައި ދިމާވާ ހާދިސާތައް ތަހުޤީޤުކުރަން ވަކި އިދާރާއެއް އުފައްދަނީ

ވައިގެ ދަތުރުފަތުރުގެ ނިޒާމުގެ ތެރޭގައި ހިނގާ ހާދިސާތައް ތަހުޤީޤުކުރަން ވަކި އިދާރާއެއް އުފެއްދުމަށް މަސައްކަތް ކުރަމުންދާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.

ވަޒީރު އަމީން ވަނީ ރާއްޖޭގެ ވައިގެ ދަތުރުފަތުރުގެ ސަލާމަތީ މިންގަނޑު މިހާރަށް ވުރެ ރަނގަޅު ކުރަންޖެހޭ ކަމަށް ވިދާޅުވެފައެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅު ދައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުހައްމަދު އަމީން ވަނީ ރާއްޖޭގެ ވައިގެ ދަތުރުފަތުރުގެ ނިޒާމުގެ ސަލާމަތާއި ރައްކާތެރިކަމާއި ގުޅޭގޮތުން ވާހަކަފުޅު ދައްކަވާފައެވެ. ވަޒީރު ވިދާޅުވީ ކުރިއަށް އޮތް ޖޫން މަހު، އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އިން ރާއްޖޭގެ ސޭފްޓީ އޮޑިޓެއް ކުރަން ނިންމާފައިވާކަމަށެވެ.

ސަރުކާރުގެ އަމާޒަކީ މީގެ ކުރީ އޮޑިޓްތަކަށްވުރެ މި އޮޑިޓުގެ ނަތީޖާ ރަނގަޅުކުރުންކަމަށާއި މިކަމަށް މިހާރުވެސް މަސައްކަތް ފަށާފައިވާ ކަމަށް ވަޒީރު ވިދާޅުވިއެވެ. އެގޮތުން އައިކާއޯގެ މިންގަނޑަށް ސިވިލް އޭވިއޭޝަން އޮތޯރިޓީ އޮނިގަނޑު ބަދަލުކޮށްފައިވާކަން ފާހަގަކުރެއްވިއެވެ. މީގެ އިތުރުން އައިކާއޯގެ މިންގަނޑަށް، ވައިގެ ހާދިސާތައް ތަހުޤީޤުކުރާ އިދާރާއެއް އުފެއްދުމުގެ މަސައްކަތްވެސް ކުރައްވަމުން އަންނަ ކަމަށް ވަޒީރު ވިދާޅުވިއެވެ.

"އެންމެ މުހިންމުކޮށް ކުރަންޖެހޭ ކަމަކީ، އެއަރކްރާފްޓް އެކްސިޑެންޓް އިންވެސްޓިގޭޝަންސް، އެއީ މިހާރު ސިވިލް އޭވިއޭޝަނުން ބޭރުކޮށްފައި އިތުރު ބޮޑީއެއް އުފެއްދުން. އެއީ އެހެން ޤައުމުތަކުގައިވެސް އެކަން އޮންނަ ގޮތް. އައިކާއޯ މެންޑޭޓް ކުރޭ. އިރާދަކުރެއްވިއްޔާ މި ޖެނުއަރީ ނިމޭ ހިސާބަށް، ކެބިނެޓަށް ހުށަހަޅައިގެން އެކަން ކުރެވޭތޯ މިބަލަނީ. މިކަން ކުރެވޭނީ ރައީސުލްޖުމްހޫރިއްޔާގެ ޤަރާރަކުން" ވަޒީރު އަމީން ވިދާޅުވިއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވަޒީރު އަމީން ވިދާޅުވީ ވައިގެ ދަތުރުފަތުރުގެ ދާއިރާ ހަރުދަނާކުރަން ޤާނޫނަށް ގެންނަން ޖެހޭ ބަދަލުތައް ގެނައުމަށް، އެޓަރނީ ޖެނެރަލްގެ އޮފީހަށް މިހާރު ފޮނުވާފައިވާކަމަށެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމަށް ވަޑައިގެންނެވީ މިދާއިރާ ހަރުދަނާ ކުރުމަށް ފިޔަވަޅުތަކެއް އަޅުއްވާނެ ކަމަށް ވިދާޅުވެ ކަމަށާއި، ރައީސްގެ ވަޢުދުފުޅާއި އެއްގޮތަށް މަދަނީ އުދުހުންތަކާ ގުޅޭ ކަންކަން ބަލަހައްޓާ، ސިވިލް އޭވިއޭޝަން އޮތޯރިޓީ އަކީ އޮޕަރޭޓަރުންނާއި ގާތުން މަސައްކަތް ކުރާ ތަނަކަށް ހައްދަވާނެ ކަމަށް ވަޒީރު އަމީން ވިދާޅުވިއެވެ.

ރާއްޖޭގައި 19 އެއަރޕޯޓެއް ތަރައްޤީކޮށް އަންނަނީ ބޭނުންކުރަމުންނެވެ. އަދި އިތުރު އެއަރޕޯޓުތަކުގެ މަސައްކަތް ކުރަމުންދާއިރު، ފަތުރުވެރިކަމުގެ ދާއިރާގައި ގިނަ އަދަދެއްގެ ސީޕްލޭންވެސް އަންނަނީ ބޭނުން ކުރަމުންނެވެ.