މިނިވަން ވިޔަފާރީގެ އެއްބަސްވުން: ދިވެހި ޓްރެވެލް އެޖެންސީތަކަށް ޗައިނާގައި ވިޔަފާރިކުރުމުގެ ފުރުސަތު

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމާއިއެކު ފަތުރުވެރިކަމުގެ ސިނާއަތުގައި ހަރަކާތްތެރިވާ ދިވެހި ޓްރެވެލް އެޖެންސީތަކަށް ޗައިނާގައި ވިޔަފާރިކުރުމުގެ ފުރުސަތު ފަހިވެގެންދާނެއެވެ. މިއީ މިފަދަ ވިޔަފާރިތަކަށް ލިބިގެންދާނެ ބޮޑު ކުރިއެރުމެކެވެ.

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމަށް މިމަހުގެ 1 ވަނަ ދުވަހުން ފެށިގެން ވަނީ އަމަލުކުރަން ފަށާފައެވެ. މިއީ ރާއްޖެއާއި ޗައިނާއާ ދެމެދު ވިޔަފާރިއާއި އިންވެސްޓްމަންޓްގެ ގިނަ ފުރުސަތުތަކަކަށް މަގު ފަހިވެގެންދާނެ އެއްބަސްވުމެއް ކަމަށް ސަރުކާރުން ވަނީ ވިދާޅުވެފައެވެ.

ޗައިނާއަކީ ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ޤައުމެވެ. ރާއްޖެ-ޗައިނާ މިނިވަން ވިޔަފާރީގެ އެއްބަސްވުމާއިއެކު ޗައިނާގައި ރާއްޖޭގެ ފަތުރުވެރިކަން އިޝްތިހާރުކުރުމަށް ގިނަ ފުރުސަތުތަކެއް ފަހިވެގެންދާނެއެވެ. އެގޮތުން އެންމެ ފާހަގަކޮށްލެވޭ އެއްކަމަކީ އެއްބަސްވުމުގައި ފަތުރުވެރިކަމާއި ދަތުރުފަތުރާއި ގުޅުންހުރި ޚިދުމަތްތައް ދިނުމުގެ ބައެއް ހިމަނާފައިވުމެވެ.

ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ ދަށުން ދިވެހި ޓްރެވެލް އެޖެންސީގެ ވިޔަފާރިތައް ހިންގާ ފަރާތްތަކުން ނުވަތަ އެފަދަ ވިޔަފާރިއެއް ފަށަން ޝައުގުވެރިވާ ފަރާތްތަކުން ޗައިނާގައި ޓްރެވެލް އެޖެންސީގެ ޚިދުމަތްތައް ޤާއިމްކުރުމަށް މަގުފަހިވެގެންދެއެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދު ވިދާޅުވީ، މި އެއްބަސްވުމުގެ ސަބަބުން ދިވެހި ވިޔަފާރިވެރިންނަށް ޗައިނާގައި ޓްރެވެލް އެޖެންސީ ހިންގުމުގެ ފުރުސަތު ފަހިވެގެންދާނެކަމަށެވެ. މިއީ އެހެން އެއްވެސް ޤައުމަކަށް ޗައިނާއިން ދީފައިވާ ފުރުސަތެއް ނޫންކަން ވަޒީރު ފާހަގަކުރެއްވިއެވެ.

"މި އެފްޓީއޭގެ ސަބަބުން ޗައިނާގެ ފްރީ ޓްރޭޑް ބައެއް އޭރިއާ ތަކުގައި ދިވެހި ކުންފުނިތަކަށް ޗައިނާގެ ކުންފުންޏަކަށް ލިބޭ ހުރިހައި ރައިޓްއަކާއިއެއްކޮށް ވިޔަފާރި ކުރުމުގެ ފުރުސަތު އެބަލިބޭ އިންކުލޫޑިން އިންޓާނަލް ޓްރެވެލް ޑިސްޓްރިބިއުޝަންއާއިއެއްކޮށް. މިއީ އެއްވެސް އެފްޓީއޭ ޕާޓްނަރަކަށް ޗައިނާއިން މީގެކުރިން ދީފައި އޮތް ބެނެފިޓްއެއް ނޫން" ވަޒީރު ވިދާޅުވިއެވެ.

ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާގޮތުން މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ޗައިނާއިންނެވެ. އެގޮތުން މިދިޔަ އަހަރު ޗައިނާއިން ރާއްޖެއަށް 241،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. އަދި މިއަހަރުގެ ފުރަތަމަ ހަފްތާގައި ޗައިނާއިން ރާއްޖެއަށް 1،615 ފަތުރުވެރިން ވަނީ އައިސްފައެވެ.