ރަޝިޔާއިން ޔޫކްރެއިންގެ އިރުދެކުނުގައި އޮތް ޒަޕޮރީޜިޔާއަށް ދިން ޙަމަލާތަކެއްގައި ޢާންމުންގެ 13 މީހުން މަރުވެއްޖެއެވެ. ޔޫކްރެެއިންގެ އިދާރާތަކުން ބުނީ، ގައިޑެޑް ބޮމެއް ބޭނުން ކޮށްގެން ރަޝިޔާގެ އަސްކަރިއްޔާއިން ދީފައިވާ ޙަމަލާގައި އިތުރު 113 މީހުން ޒަޚަމުވެފައިވާ ކަމުގައެވެ. މިއީ، 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ރަޝިޔާ-ޔޫކްރެއިން ހަނގުރާމައިގެ ދަށުން ދީފައިވާ ޙަމަލާއެކެވެ.
ޔޫކްރެއިންގެ އިދާރާތަކުން ބުނީ، ރަޝިޔާގެ ޙަމަލާގައި ޢާންމުން ދިރިއުޅޭ ގިނަ އަދަދެއްގެ އެޕާޓްމަންޓް އިމާރާތަަށް ބޮޑެތި ގެއްލުންތަކެއް ލިބިފައިވާ ކަމުގައެވެ. އަދި، ސުންނާފަތިވެފައިވާ އިމާރާތްތަކުގެ ދަށުގައި ތާށިވެފައިވާ މީހުންގެ ހަށިތައް ނެގުމަށް މަސައްކަތް ކުރަމުންދާ ކަމުގައެވެ. ޙަމަލާގައި ޢާންމު ދަތުރުފަތުރުގެ ނިޒާމަށް ވެސް ބޮޑެތި ގެއްލުންތަކެއް ލިބުނު ކަމުގައި ޒަޕޮރީޜިޔާގެ އިދާރާތަކުން ހާމަކުރިއެވެ. ޙަމަލާގައި ފަސިންޖަރުން ތިބި ރޭލަކާއި ބަހަކަށް ވެސް ބޮޑެތި ގެއްލުންތަކެއް ލިބުނެވެ.
ޒަޕޮރީޜިޔާގެ ސަރަޙައްދީ ގަވަރުނަރު އިވަން ފެދެރޮވް ވިދާޅުވީ، އެ ސަރަޙައްދަށް ޙަމަލާ ދިނުމަށް ރަޝިޔާގެ އަސްކަރިއްޔާއިން ބޭނުން ކޮށްފައި ވަނީ ނުރައްކާތެރި ގައިޑެޑް ބޮމެއް ކަމުގައެވެ. އެ ޙަމަލާގައި ޒަޚަމުވެފައިވާ މީހުންގެ ތެރެއިން 60 މީހެއްގެ ހާލު ސީރިޔަސް ކަމަށާއި، ހަސްފަތާލުގައި އެޑްމިޓު ކޮށްގެން އެ މީހުންނަށް ފަރުވާ ދިނުމަށް މަސައްކަތް ކުރަމުންދާ ކަމުގައި ވެސް އޭނާ ވިދާޅުވިއެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވަނީ މި ޙަމަލާތަކާ މެދު ކަންބޮޑުވުން ފާޅު ކުރައްވާފައެވެ. "ޢާންމުން ދިރިއުޅޭ ރަށަކަށް، އެ މީހުންގެ ފުރާނައަށް ނުރައްކާ ވާނެ ކަން އެނގި ތިބެ، މަތިން ބޮންއަޅައިގެން ޙަމަލާ ދިނުމަށްވުރެ ނުބައި އަމަލެއް ނޯންނާނެ،" އޭނާ ވިދާޅުވިއެވެ. އަދި، ރަޝިޔާގެ މި ފަދަ ޙަމަލާތަކުން ދިފާޢުވުމުގައި އެހީތެރިކަން ފޯރުކޮށްދިނުމަށް ވެސް އޭނާ ވަނީ ޔޫކްރެއިންގެ މަދަދުގާރުންނަށް ގޮވައިލައްވާފައެވެ.
ޒަޕޮރީޜިޔާގެ ބައެއް ސަރަޙައްދުތައް މިހާރު ވެސް އޮތީ ރަޝިޔާ ސިފައިންގެ އަތްދަށުގައެވެ. އަދި، ޔޫކްރެއިންގެ ބާރުގެ ދަށުގެ އޮތް ސަރަޙައްދުތަކަށް ރަޝިޔާގެ އަސްކަރިއްޔާއިން ދޭތެރެދޭތެރެއިން ދަނީ ވަރުގަދަ ޙަމަލާތަކެއް އަމާޒު ކުރަމުންނެވެ. ޒަޕޮރީޜިޔާގެ އިތުރުން ޔޫކްރެއިންގެ އިރުމަތީ ދޮންބާސްގައި ހިމެނޭ ލުހާންސްކާއި ދޮންޏެސްކުގެ ބައެއް ސަރަޙައްދުތައް ވެސް އޮތީ ރަޝިޔާ ސިފައިންގެ ބާރުގެ ދަށުގައެވެ.
މި ހަނގުރާމައިގައި ޔޫކްރެއިނުން ވެސް ދަނީ ރަޝިޔާގެ ރަށްތަކަށް އަމާޒުކޮށް ނުރައްކާތެރި ޙަމަލާތަކެއް އަމާޒު ކުރަމުންނެވެ. މި ގޮތުން، ޖަނަވަރީ 8ވަނަ ދުވަހު އަސްކަރީ ޑްރޯންތަކެއް ބޭނުން ކޮށްގެން ރަޝިޔާގެ އެކި ސަރަޙައްދުތަކަށް އަމާޒުކޮށް ނުރައްކާތެރި ޙަމަލާތަކެއް ދީފައިވެއެވެ. އޭގެ ތެރެއިން ބައެއް ޙަމަލާތައް އަމާޒު ކޮށްފައި ވަނީ ވޮލްގާ ސަރަޙައްދުގައި އޮންނަ އަސްކަރީ މަރުކަޒަކަށެވެ.
އެ ޙަމަލާތަކާ ގުޅިގެން ވޮލްގާގެ އަސްކަރީ މަރުކަޒު ކައިރީގައި ހުންނަ ތެޔޮ ރައްކާކުރާ ސަރަޙައްދެއްގައި ބޮޑު އަލިފާންގަނޑެއް ރޯވިއެވެ. އަލިފާން ނިއްވާ ޓީމުތަކުން އަދިވެސް ދަނީ އެ ތަނުގައި ރޯވެފައިވާ އަލިފާންގަނޑު ކޮންޓުރޯލު ކުރުމަށް މަސައްކަތް ކުރަމުންނެވެ. "އަލިފާންގަނޑު ނިވެން ގިނަ އިރުތަކެއް ހޭދަވާނެ. ނަމަވެސް، ހުރިހާ ކަމެއް ވެސް އޮތީ ކޮންޓުރޯލުގެ ދަށުގައި،" ވޮލްގާގެ ސަރަޙައްދީ ގަވަރުނަރު ރަމަން ބުސަރްގިން ވިދާޅުވިއެވެ.
ނަމަވެސް، އަލިފާންގަނޑުގެ ނުރައްކަލާ ގުޅިގެން ވެރިރަށް މޮސްކޯގެ އިރުދެކުނުން އޮތް އޭންގެލްސް ސަރަޙައްދުގައި ވަނީ ކުއްލިހާލަތު އިޢުލާނު ކޮށްފައެވެ. އެއީ، 200,000އެއްހާ މީހުންގެ އާބާދީއެއް ދިރިއުޅޭ ސަރަޙައްދެކެވެ. އަލިފާންގަނޑު ނިއްވައިލުމުގެ މަސައްކަތުގައި ހަރަކާތްތެރިވަމުން ދިޔަ ދެ މީހަކު މަރުވެފައިވާ ކަމުގައި ވެސް ވޮލްގާގެ އިދާރާތަކުން ހާމަކުރިއެވެ.