އިންޑިޔާއަކީ ސަރަޙައްދީ ގޮތުންނާއި އިޤުތިޞާދީ ދާއިރާއިން މުހިންމު ބައިވެރިއެއް ކަމުގައި އަފްޣާނިސްތާނުގައި ވެރިކަން ކުރާ ޠާލިބާނުން ސިފަކޮށްފިއެވެ. އެ ޖަމާޢަތުން މި މޭރުމުން ބުނެފައި ވަނީ، ދެ ޤައުމުގެ ޚާރިޖީ ވުޒާރާގެ އިސް އޮފިޝަލުންގެ މެދުގައި ބޭއްވި މުހިންމު މަޝްވަރާ ބައްދަލުވުމަކަށް ފަހުއެވެ.
އެކުވެރި ޢަރަބި ޢިމާރާތް (ޔޫއޭއީ)ގެ ދުބާއީގައި ބޭއްވި ބައްދަލުވުމުގައި އިންޑިޔާ ތަމްސީލު ކުރައްވާފައި ވަނީ އެ ޤައުމުގެ ފޮރިން ސެކްރެޓަރީ ވިކްރަމް މިސްރީއެވެ. ޠާލިބާނުން ތަމްސީލު ކޮށްފައި ވަނީ އެ ޖަމާޢަތުން އެކުލަވައިލާފައިވާ ސަރުކާރުގެ ޚާރިޖީ ވަޒީރު އަމީރު ޚާން މުއްތަޤީއެވެ.
މިއީ، ޠާލިބާން ޖަމާޢަތުން އަފްޣާނިސްތާނުގެ ވެރިކަން ފޭރިގަތް ފަހުން އިންޑިޔާއާއި އަފްޣާނިސްތާނުގެ އިސް އޮފިޝަލުންގެ މެދުގައި ބާއްވާފައިވާ ފުރަތަމަ ބައްދަލުވުމެވެ. އަފްޣާނިސްތާނުގެ ޤާނޫނީ ސަރުކާރު ވައްޓައިލައި ޠާލިބާނުން އެ ޤައުމުގެ ވެރިކަން ފޭރިގަނެފައި ވަނީ 2021ވަނަ އަހަރުގެ އޮގަސްޓު މަހުއެވެ.
ޠާލިބާނުންގެ ޚާރިޖީ ވުޒާރާއިން ބުނީ، އިންޑިޔާގެ ޚާރިޖީ ވުޒާރާގެ އިސްވެރިންނާ އެކު ބޭއްވި މަޝްވަރާތަކުގައި މުހިންމު ކަންތައްތަކެއްގެ މައްޗަށް އަލިއަޅުވައިލާފައިވާ ކަމުގައެވެ. އަދި، ދެ ޤައުމުގެ ދެމެދުގައި ގުޅުންތައް ހަރުދަނާ ކުރުމާއި ވިޔަފާރި ފުޅާ ކުރުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކޮށްފައިވާނެ ކަމުގައެވެ.
އޭގެ ތެރެއިން އެއް ކަމަކީ، އީރާނުގެ އިރުދެކުނުގައި އިންޑިޔާއިން ބިނާ ކުރަމުންދާ ތަޝާބުހާރު ބަނދަރު މެދުވެރިކޮށް އިންޑިޔާއިން އަފްޣާނިސްތާނަށް އެތެރެ ކުރާ މުދަލުގެ އަދަދު އިތުރު ކުރުމެވެ. އިންޑިޔާއިން މިހާރު ދަނީ ތަޝާބުހާރު ބަނދަރު އިތުރަށް ތަރައްޤީ ކުރުމަށް ބިޔަ މަޝްރޫޢެއް ހިންގަމުންނެވެ. އެ ބަނދަރު ހިންގުމާ އިންޑިޔާގެ ކުންފުންޏަކުން ޙަވާލުވެފައި ވަނީ، ޕާކިސްތާނުގެ ބަނދަރުތައް ކަމުގައިވާ ކަރާޗީއާއި ގަވާދަރާ ވާދަ ކުރުމުގެ ގޮތުންނެވެ.
"އަފްޣާނިސްތާނުގެ ހަމަހަމަ އަދި އިޤުތިޞާދީ ކުރިއެރުމަށް އިސްކަންދޭ ޚާރިޖީ ސިޔާސަތުގެ ދަށުން، ސަރަޙައްދީ އަދި އިޤުތިޞާދީ ގޮތުން މުހިންމު ބައިވެރިއެއް ކަމުގައިވާ އިންޑިޔާއާ އެކު ސިޔާސީ ގޮތުންނާއި އިޤުތިޞާދީ ދާއިރާއިން ގުޅުންތައް ހަރުދަނާ ކުރުމަކީ މުހިންމު ކަމެއްގެ ގޮތުގައި ދެކެން،" ޠާލިބާނުންގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވެއެވެ.
ދުބާއީގައި ބޭއްވި ބައްދަލުވުމަށް ފަހު އިންޑިޔާގެ ޚާރިޖީ ވުޒާރާއިން ބުނީ އަފްޣާނިސްތާނުގައި އުމްރާނީ ތަރައްޤީގެ މަޝްރޫޢުތަކެއް ހިންގުމަށާއި، އެ ޤައުމާ އެކު ވިޔަފާރީގެ ގުޅުންތައް ފުޅާ ކުރުމާ ގުޅޭ ގޮތުން ސަރުކާރުން ވިސްނަމުންދާ ކަމުގައެވެ. އަފްޣާނިސްތާނުގައި ޠާލިބާނުން ޤާއިމު ކޮށްފައިވާ ސަރުކާރަކީ، އެއްވެސް ބޭރު ޤައުމަކުން، އަދި ބައިނަލްއަޤުވާމީ މުޖުތަމަޢުން ބަލައިގަނެފައިވާ ސަރުކާރެއް ނޫނެވެ.
ނަމަވެސް، އަފްޣާނިސްތާނުގެ ވެރިރަށް ކާބުލްގައި ޚާރިޖީ އޮފީހެއް ހިންގަމުންދާ މަދު ޤައުމުތަކުގެ ތެރޭގައި އިންޑިޔާ ހިމެނެއެވެ. އެ އޮފީހުގެ މައިގަނޑު މަސައްކަތަކީ އަފްޣާނިސްތާނަށް އިންސާނީ އެހީއާއި ބޭސް ފަރުވާގެ ސާމާނު ފޯރުކޮށްދިނުމުގެ މަސައްކަތް ވިލަރެސް ކުރުމެވެ. މީގެ އިތުރުން، ސަރަޙައްދީ ބާރުތައް ކަމުގައިވާ ޗައިނާއާއި ރަޝިޔާއިން ވެސް ވަނީ އަފްޣާނިސްތާނާ އެކު ގުޅުން ބަދަހިކޮށް، ވިޔަފާރީގެ ގުޅުންތައް ފުޅާ ކުރަން ވިސްނަމުންދާ ކަން ހާމަކޮށްފައެވެ.
މަސްރަޙު ދިރާސާ ކުރާ ފަރާތްތަކުން ބުނީ، އިންޑިޔާއާއި އަފްޣާނިސްތާނާ ދެމެދު ގުޅުންތައް ހަރުދަނާ ކުރުމަކީ، އެ ދެ ޤައުމާ އިންވެގެން އޮތް ޕާކިސްތާނުގެ ސަރުކާރުން ރުހޭނެ ކަމަކަށް ނުވާނެ ކަމުގައެވެ. ނިއުކްލިޔަރ ދެ ބާރު ކަމުގައިވާ އިންޑިޔާއާއި ޕާކިސްތާނާ ދެމެދު މީގެ ކުރިން ވެސް ތިން ހަނގުރާމައެއް ކޮށްފައިވެއެވެ.
އަނެއް ކޮޅުން، ޕާކިސްތާނާއި އަފްޣާނިސްތާނާ ދެމެދު ވެސް އޮތީ ގުޅުންތައް ހީނަރުވެފައެވެ. ޕާކިސްތާނުގައި ދެމުންދާ ނިރުބަވެރި ބައެއް ޙަމަލާތަކުގެ ޒިންމާ އެ ޤައުމުން އަޅުވާފައި ވަނީ އަފްޣާނިސްތާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުގެ ކޮނޑުގައެވެ. އަދި، އެ ޖަމާޢަތްތަކަށް ޠާލިބާނުންގެ ސަރުކާރުން ޙިމާޔަތާއި ރައްކާތެރިކަން ފޯރުކޮށްދެމުންދާ ކަމަށް ޕާކިސްތާނުން ތުހުމަތު ކުރެއެވެ. ޕާކިސްތާނުގެ އަސްކަރީ މަތިންދާބޯޓުތަކުން ދާދިފަހުން އަފްޣާނިސްތާނުގެ ބައެއް ސަރަޙައްދުތަކަށް ވައިގެ ޙަމަލާތަކެއް ދިނުމާ ގުޅިގެން ދެ ޤައުމުގެ ގުޅުންތައް ވަނީ އިތުރަށް ހީނަރުވެފައެވެ.