ސްޕޭން ސަރުކާރުން ބާސެލޯނާގެ ދެ ކުޅުންތެރިއަކު މުއްދަތު ހަމަވިފަހުން ސްޕެނިޝް ލީގުގައި ކުޅެން ރަޖިސްޓަރ ކޮށްދޭން ނިންމުމުން އެކަމަށް އެތްލެޓިކޯ މެޑްރިޑުން ވަރަށް ފާޑުކިޔައިފި އެވެ.
އެކުލަބުން ނެރުނު ބަޔާނުގައި ބުނެފައިވަނީ ސްޕެނިޝް ލީގުގެ ނިންމުންތަކަށް ސަރުކާރުން ވަދެ، ގޮތް ކަނޑައެޅުމަކީ ކަންކަން ނުރައްކަލަށް ހުށަހެޅުން ކަމަށެވެ. އަދި މިހާތަނަށް ސްޕެނިޝް ލީގުގައި އެންމެ ހަރުދަނާކޮށް ކުރަމުން އައި ކަމަކީ އިގްތިސާދު ކުރުމުގައި އަމަލުކުރަންޖެހޭ ގަވާއިދުތައް ހިފެހެއްޓުން ކަމަށާއި ނަމަވެސް ސަރުކާރުން މި ގަވާއިދަށް ނުބަލައި ބާސެލޯނާ އަށް ވަކި ގޮތެއް ހަދާދީފައިވާ ކަމަށެވެ. މީގެ ސަބަބުން ކުލަބުތަކުގެ މެދުގައި ހަމަހަމަކަން ގެއްލިގެންދާނެ ކަމަށް ވެސް އެކުލަބުން ވަނީ ބުނެފަ އެވެ.
ބާސެލޯނާގެ ދެ ކުޅުންތެރިން ކަމަށްވާ ޑެނީ އޮލްމޯ އާއި ޕައު ވިކްޓަރ ރަޖިސްޓަރކޮށްދޭން ނިންމީ ސްޕޭންގެ ސްޕްރީމް ސްޕޯޓްސް ކައުންސިލުންނެވެ. އެއީ ދަށު ކޯޓުތަކުންނާއި ސްޕެނިޝް ލީގާއި ސްޕެނިޝް ފެޑަރޭޝަނުން މި މައްސަލަ ބާސެލޯނާއާ ދެކޮޅަށް ނިންމާފައިވަނިކޮށެވެ. ނަމަވެސް ބާސެލޯނާއިން މައްސަލަ ހުށަހެޅީ ގާނޫނީ ނުކުތާތަކެއް މައްޗަށެވެ.
ސްޕްރީމް ސްޕޯޓްސް ކައުންސިލުން ބުނީ ކުޅުންތެރިންނަށް ކުޅުމުގެ ފުރުސަތު ނުލިބުމަކީ ކުޅުންތެރިޔާ އާއި ކުލަބަށާއި ސްޕޭނުގެ ގައުމީ ޓީމަށް ވެސް އިއާދަ ނުކުރެވޭ ވަރުގެ ގެއްލުންތަކެއް ލިބިދާނެ ކަމެއް ކަމަށެވެ. މިހެންވެ ސްޕެނިޝް ލީގާއި ފެޑަރޭޝަނުގެ ނިންމުން ސަސްޕެންކޮށް، ކުޅުމުގެ ފުރުސަތު ދިނުމަށެވެ.
މި މައްސަލާގައި ބާސެލޯނާއާ ދެކޮޅަށް އެންމެ ބޮޑަށް މަސައްކަތް ކުރަނީ ތިން ކުލަބަކުންނެވެ. އެއީ އެތްލެޓިކޯ މެޑްރިޑާއި ސެވިއްޔާ އަދި ވިޔަރެއާލް އެވެ. މިހެންވެ ބާސެލޯނާއިން މިހާރު ނިންމާފައިވަނީ މި ތިން ކުލަބާއެކު ކުރިމަގުގައި އެއްވެސް މުއާމަލާތެއް ނުކުރުމަށެވެ. ހާއްސަކޮށް މިއިން ކުލަބަކަށް ކުޅުންތެރިއަކު ވިއްކާނުލުމަށެވެ.
މީގެ އިތުރުން މައްސަލަ ބާސެލޯނާ ކޮޅަށް ނިމުމުން އެ ކުލަބުގެ ރައީސް ޖޯން ލަޕޯޓާ އުފާފާޅު ކުރުމުގައި ބޭ އަދަބީ ގޮތްތަކެއް ގެންގުޅުނު މައްސަލަ ވެސް މިހާރު ވަނީ ބޮޑުވެފަ އެވެ. މި މައްސަލަ ޑިސިޕްލިނަރީ މައްސަލައެއްގެ ގޮތުގައި ހުށަހަޅައިފިނަމަ އޭނާގެ މަގާމު ގެއްލުމުގެ ފުރުސަތު އެބައޮތެވެ.