ސާކް ސަރަހައްދުގެ ކުލަބުތަކުގެ މެދުގައި ބާއްވާ ފުޓްބޯޅަ މުބާރާތް މި އަހަރު ބާއްވަން ފަށާނެ ކަމަށް ސައުތު އޭޝިއަން ފުޓްބޯޅަ ފެޑަރޭޝަން (ސާފް) އިން ބުނެފި އެވެ.
ޖެނެރަލް ސެކްރެޓަރީ އަންވަރުން ހައްގު ހިލާލް ވިދާޅުވީ މުބާރާތުގައި ކުޅޭނީ ޖުމުލަ 8 ޓީމު ކަމަށެވެ. މީގެ ދެ ތެރެއިން އިންޑިޔާގެ2 ޓީމަށް ފުރުސަތު ދޭނެ ކަމަށެވެ. ދިވެހިރާއްޖެ އާއި ސްރީލަންކާ އާއި ބޫޓާނާއި ނޭޕާލް އަދި ޕާކިސްތާނާއި ބަނގްލަދޭޝް ކުރެ ކޮންމެ ގައުމަކަށް ވެސް ލިބޭނީ އެއް ޖާގަ އެވެ.
މުބާރާތް ބާއްވާނެ ތާރީހެއް ސާފުން އަދި ހަމަނުޖައްސައެވެ. ނަމަވެސް މިހާރު ބޮޑަށް ވިސްނަމުންދަނީ އިންޑިޔާގެ ޓީމުތަކަށް ފަސޭހަ ދުވަސްވަރެއްގައި މެޗުތައް ކުޅުމަށެވެ.
އޭނާ ވިދާޅުވީ މި މުބާރާތް ވެސް ކުޅޭނީ ހޯމް އެންޑް އަވޭ އުސޫލުން ކަމަށެވެ. ސަބަބަކީ ސްޕޮންސަރުން އެކަމަށް ބޭނުންވުން ކަމަށެވެ.
ސާފް ކުލަބު ޗެމްޕިއަންޝިޕުގެ ހިޔާލަކީ މީގެ 10 އަހަރު ކުރިން ވެސް ގެންގުޅެމުން އައި ހިޔާލެކެވެ. ނަމަވެސް ތަފާތު ސަބަބުތަކާހުރެ މި ހިޔާލު އަދި އޮތީ ހަމައެކަނި އުއްމީދެއްގެ ގޮތުގަ އެވެ.
މި އަހަރުގެ ސާފް ޗެމްޕިއަންޝިޕް ވެސް ބާއްވަން މިހާރު ނިންމާފައިވަނީ ހޯމް އެންޑް އަވޭ އުސޫލުންނެވެ. މި ކަމަށްޓަކައި ދޮޅު މަސްދުވަސް ހޭދަވާނެ އެވެ. ސާފް ޗެމްޕިއަންޝިޕް ހޯމް އެންޑް އަވޭ އުސޫލުން ނުބޭއްވޭނަމަ އެ މުބާރާތް ބާއްވަން ނޭޕާލާއި ސްރީލަންކާ އަދި ބަނގްލަދޭޝްގެ ޝައުގުވެރިކަން އެބަހުއްޓެވެ.