ރަޝިޔާގެ ހުޅަނގު ފަރާތު ވައިގެ ސަރަޙައްދުން ދަތުރު ކުރުމަކީ ފަސިންޖަރުން އުފުލާ އެއަރލައިންތަކަށް ރައްކާތެރި ކަމެއް ނޫން ކަމުގައި ވިލާތުގެ އިއްތިހާދު (އީޔޫ)ގެ ވައިގެ އުދުހުންތަކުގެ ރައްކާތެރިކަމާ ބެހޭ އިދާރާ (އީއޭއެސްއޭ)ން ބުނެފިއެވެ. އެ އިދާރާއިން މި އިންޒާރު ކޮށްފައި މި ވަނީ ރަޝިޔާ-ޔޫކްރެއިން ހަނގުރާމައާ ގުޅިގެން މަދަނީ ވައިގެ އުދުހުންތަކަށް އޮތް ނުރައްކާތެރިކަން އިތުރުވަމުން ދިޔުމާ ގުޅިގެންނެވެ.
ހުސްވި މަހު ހިނގި ހާދިސާއެއްގައި އަޒަރްބައިޖާން އެއަރލައިންސްގެ މަތިންދާބޯޓެއް ވަނީ ކަޒަޚްސްތާނަށް ވެއްޓިފައެވެ. އެ މަތިންދާބޯޓު ވެއްޓިފައި ވަނީ، ރަޝިޔާގެ ވައިގެ ދިފާޢީ ނިޒާމުގައި ބޭނުން ކުރާ މިސައިލެއްގެ ޙަމަލާއެއް އެރުމާ ގުޅިގެން ކަމުގައި އަޒަރްބައިޖާނުން ވަނީ ބުނެފައެވެ. އެ ހާދިސާ ހިނގާފައި ވަނީ ރަޝިޔާގެ ހުޅަނގު ފަރާތު ވައިގެ ސަރަޙައްދުން މަތިންދާބޯޓު ދަތުރު ކުރަމުން ދިޔަ ވަގުތެއްގައެވެ. އެއީ، ޔޫކްރެއިނުން ރަޝިޔާއަށް ޙަމަލާ ދިނުމަށް ފޮނުވައިލި އަސްކަރީ ޑްރޯންތަކެއް ދިފާޢު ކުރުމަށް، ރަޝިޔާއިން ވައިގެ ދިފާޢީ ނިޒާމު ބޭނުން ކުރަމުން ދިޔަ ދަނޑިވަޅެކެވެ.
އެ ހާދިސާއަކީ، ރަޝިޔާގެ ހުޅަނގު ފަރާތުގެ ވައިގެ ސަރަޙައްދުގައި އޮތް ނުރައްކާތެރިކަން ހާމަކޮށްދޭ ހާދިސާއެއް ކަމުގައި އީއޭއެސްއޭން ބުންޏެވެ. އަޒަރްބައިޖާންގެ މަތިންދާބޯޓު ވެއްޓުނު ހާދިސާގައި އެއިން ދަތުރު ކުރި މީހުންގެ ތެރެއިން 38 މީހުން މަރުވިއެވެ. އަދި، 29 މީހުން ޒަޚަމުވިއެވެ. އެ މަތިންދާބޯޓަށް ރަޝިޔާއިން ޙަމަލާ ދެވިފައި ވަނީ އޮޅުމަކުން ނަމަވެސް، އެއީ އެ ސަރަޙައްދުން ދަތުރު ކުރާ މަތިންދާބޯޓުތަކަށް އޮތް ބޮޑު ނުރައްކަލެއްގެ ގޮތުގައި އީއޭއެސްއޭން ސިފަ ކުރިއެވެ.
"ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅިގެން މަދަނީ ވައިގެ އުދުހުންތަކުގައި ހަރަކާތްތެރިވާ އެއަރލައިންތަކަށް އެ ސަރަޙައްދުން ދަތުރު ކުރުމަކީ ރައްކާތެރި ކަމެއް ނޫން، ސަބަބަކީ އޮޅުމެއްގެ ތެރެއިން މަދަނީ އެއަރލައިންތަކުގެ މަތިންދާބޯޓުތަކަށް ޙަމަލާ ދެވުމަކީ އެކަށީގެންވާ ކަމެއް،" އީއޭއެސްއޭން ނެރުނު ބަޔާނެއްގައި ބުންޏެވެ.
ރަޝިޔާ-ޔޫކްރެއިން ހަނގުރާމަ ފަށާފައި ވަނީ 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހުއެވެ. އެ ހަނގުރާމަ ފެށުމާ އެކު، އީއޭއެސްއޭން ވަނީ ރަޝިޔާގެ ވައިގެ ސަރަޙައްދު ބޭނުން ކުރުން އީޔޫގެ މެންބަރު ޤައުމުތަކުގެ އެއަރލައިންތަކަށް މަނާކޮށްފައެވެ. މި ފަހަރު އިންޒާރު ނެރެފައި މި ވަނީ، އެހެން ޤައުމުތަކުގެ އެއަރލައިންތަކަށް އަމާޒުކޮށް ކަމުގައި އެ އިދާރާއިން ބުންޏެވެ.
އަޒަރްބައިޖާން އެއަރލައިންސްގެ މަތިންދާބޯޓު ވެއްޓުނު ހާދިސާއާ ގުޅިގެން ރަޝިޔާގެ ރައީސް ވްލަޑިމިޔަރ ޕުޓިން ވަނީ އަޒަރްބައިޖާންގެ ރައީސް އިލްހާމް އަލިޔެފަށް ފޯނުން ގުޅުއްވައި މަޢާފަށް އެދިވަޑައިގަންނަވާފައެވެ. ނަމަވެސް، ރަޝިޔާއިން ރަސްމީ ހައިސިއްޔަތެއްގައި މަތިންދާބޯޓު ވެއްޓުނު ހާދިސާގެ ޒިންމާ އުފުލާފައެއް ނެތެވެ.
އަޒަރުބައިޖާނުގެ މަތިންދާބޯޓު ވެއްޓުމުގެ ހާދިސާއިން ރަޝިޔާ-ޔޫކްރެއިން ހަނގުރާމަ ހިނގަމުންދާ ސަރަޙައްދުތަކުން ދަތުރު ކުރާ މަދަނީ އުދުހުންތަކަށް އޮތް ނުރައްކާ ހާމަވެގެން ދެއެވެ. 2014ވަނަ އަހަރު މެލާޝިޔާ އެއަރލައިންސްގެ އެމްއެޗް-17 އަދި 2020ވަނަ އަހަރު ޔޫކްރޭނުގެ މަތިންދާބޯޓެއް ވެސް ވަނީ މި ފަދަ ހާދިސާތަކުގައި ވެއްޓިފައެވެ.