ހަށިވިއްކުމުގެ ވިޔަފާރިކުރި 2 މީހަކު ޑީޕޯޓް ކޮށްލައިފި
-
މީގެ ތެރެއިން އެކަކީ ޓޫރިސްޓް ވިސާގައި ރާއްޖެ އައި މީހެއް
-
މިދިޔަ އަހަރު އެކަނިވެސް 5000 އަށްވުރެ ގިނަ ބިދޭސީން ޑިޕޯޓްކޮށްފައިވޭ
ރާއްޖޭގައި ހަށިވިއްކުމުގެ ވިޔަފާރި ކުރަމުންދިޔަ ބިދޭސީ ދެ އަންހެނަކު ޑިޕޯޓް ކޮށްފައިވާ ކަމަށް މޯލްޑިވްސް އިމިގްރޭޝަނުން ހާމަކުރައްވައިފިއެވެ.
މިދެ މީހުން އިމިގްރޭޝަންގެ ބެލުމުގެ ދަށަށް ގެންދިޔައީ ރާއްޖޭގައި ހަށިވިއްކުމުގެ ވިޔަފާރި ކުރަމުންދާކަމަށް ތުހުމަތުކުރެވޭ ބިދޭސީންނަށް އަމާޒުކޮށް އިމިގްރޭޝަނާއި ފުލުހުން ގުޅިގެން ކުރިއަށްގެންދިއަ އޮޕަރޭޝަނެއްގައެވެ. މިދެމީހުންނަކީ ވިއެޓްނާމަށް ނިސްބަތްވާ ދެ މީހުންނެވެ.
މީގެތެރެއިން އެކަކީ ވޯކް ވިޒާގައި ރާއްޖޭގައި އުޅެމުންދިއަ މީހެއް ކަމަށާއި އަނެއް މީހާއަކީ ޓޫރިސްޓު ވިޒާގައި ރާއްޖެ އައިސްފައިވާ މީހެއް ކަމަށްވެސް އެއިދާރާއިން ވަނީ ވިދާޅުވެފައެވެ. މި މައްސަލަ ތަހުޤީޤު ކުރުމަށްފަހު، މި ދެ މީހުން ވެސް މިހާރު ޑީޕޯޓްކޮށްފައިވާ ކަމަށް މޯލްޑިވްސް އިމިގްރޭޝަނުން ވިދާޅުވެއެވެ.
އިމިގްރޭޝަނާއި ކަމާއި ބެހޭ އިދާރާތައް ގުޅިގެން ދަނީ ޤަވާއިދާ ޚިލާފަށް ރާއްޖޭގައި މަސައްކަތް ކުރަމުންދާ ބިދޭސީންގެ މައްސަލަ ހައްލުކުރުމަށް މަސައްކަތް ކުރައްވަމުންނެވެ. އެގޮތުން މިދިޔަ އަހަރު އެކަނިވެސް 5000 އަށްވުރެ ގިނަ ބިދޭސީން ޑިޕޯޓްކޮށްފައިވާ ކަމަށް މޯލްޑިވްސް އިމިގްރޭޝަނުން ވިދާޅުވެއެވެ.