މިރިހި ރިސޯޓު ކައިރީ އޮތް ސަފާރީއަކުން ކަނޑަށް ވެއްޓުނު މީހާގެ ހަށިގަނޑު ހޯދައިފި

އދ. މިރިހި އައިލެންޑް ރިސޯޓު ކައިރީ އޮތް ސަފާރީއަކުން ވެއްޓި ގެއްލުނު މީހާގެ ހަށިގަނޑު ހޯދައިފިއެވެ.

ޤައުމީ ދިފާޢީ ބާރުން ވިދާޅުވީ އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުންނަށް، ގެއްލުނު ދިވެހި މީހާގެ ހަށިގަނޑު ފެނުނީ ކަނޑުގެ 69 މީޓަރު އަޑިން ކަމަށެވެ. އަދި ޑައިވަރުންގެ ޓީމުން، އެ މީހާގެ ހަށިގަނޑު، 15:35 ހާއިރު ލޯންޗަށް ނަގާފައިވާކަމަށް ޤައުމީ ދިފާޢީ ބާރުން ވިދާޅުވިއެވެ.

ދިވެހި ފުލުހުންގެ ޚިދުމަތުން ވިދާޅުވީ އެމީހަކީ ނ. ހޮޅުދޫ، ސީ ވިޑް، އުމުރުން 35 އަހަރުގެ އަލީ އަރުޝާދު ކަމަށެވެ.

ފުލުހުން ވިދާޅުވީ ރޭގެ ވަގުތެއްގައި ސަފާރީގެ ޑެކް މަތީ ހުއްޓާ އަލީ އަރުޝާދު ކަނޑަށް ވެއްޓުނުތަން ސަފާރީގެ ސީސީޓީވީ ފުޓޭޖުން ފެނިފައިވާ ކަމަށެވެ.