އިނގިރޭސި ޕްރިމިއަރ ލީގުގެ ކުލަބު އެވަޓަންގެ ކޯޗުގެ މަގާމަށް ޑޭވިޑް މޮއިސް ގެނައުމަށްޓަކައި އެ ކުލަބުން އޭނާއާއެކު ވާހަކަ ދައްކަން ފަށައިފިއެވެ.
މީގެ ކުރިންވެސް އެވަޓަންއަށް ކޯޗުކޮށްދިން މޮއިސްގެ އިތުރުން އެހެން ފަރާތްތަކާއެކުވެސް އެވަޓަން އިން ދަނީ ވާހަކަ ދައްކަމުންނެވެ. ނަމަވެސް "ބީބީސީ" އިން ބުނެފައިވާ ގޮތުގައި އެވަޓަންގެ ކޯޗު ކަމާއި ހަވާލުވުން އެންމެ ގާތް ފަރާތަކީ މޮއިސްއެވެ.
އެވަޓަން އިން ކޯޗެއް ހޯދުމުގެ މަސައްކަތް ފަށާފައިވަނީ އެ ޓީމުގެ ކޯޗަކަށް ކުރިން ހުރި ޑައިޗް މިދިޔަ ބުރާސްފަތި ދުވަހު މަގާމުން ވަކިކުރުމަށްފަހުގައެވެ. ޑައިޗްގެ އިރުޝާދުގެ ދަށުން އެ ޓީމަށް އެދެވޭ ނަތީޖާތަކެއް ހޯދިފައިނުވާއިރު, އެވަޓަން މި ވަގުތު އޮތީ ތާވަލުގެ 16 ވަނައިގައި ރެލިގޭޝަން ޒޯނުން އެންމެ ޕޮއިންޓެއްގެ ތަފާތަކުންނެވެ. މި ސީޒަނުގައި ޕްރިމިއަރ ލީގުގައި ކުޅުނު 19 މެޗުގެ ތެރެއިން އެވަޓަން މޮޅުވެފައިވަނީ އެންމެ ތިން މެޗުންނެވެ.
މޮއިސް ވަނީ މީގެ ކުރިން 2002 އިން 2013 ގެ ނިޔަލަށް އެވަޓަންއަށް ކޯޗުކޮށްދީފަ އެވެ. އޭރު މޮއިސް އެވަޓަން ދޫކޮށްލީ މެންޗެސްޓަރ ޔުނައިޓެޑްގެ ކޯޗުކަމާ ހަވާލުވުމުގެ ގޮތުންނެވެ. ނަމަވެސް 10 މަސް ދުވަހަށްފަހު އެ ކްލަބުގެ ކޯޗުކަމުން އޭނާ ވަނީ ވަކިކޮށްފައެވެ.
މޮއިސްގެ އިރުޝާދުގެ ދަށުން އޭނާ ވަނީ ވެސްޓް ހޭމް ޔުނައިޓެޑަށް ޔުއެފާ ޔޫރޮޕާ ކޮންފަރެންސް ލީގު 2023 ވަނަ އަހަރު ކާމިޔާބުކޮށްދީފައެވެ. އަދި މިދިޔަ ސީޒަނަށްފަހު ވެސްޓް ހޭމްގެ ކޯޗުކަމުން ވަކިވި ފަހުން މޮއިސް އެއްވެސް ޓީމަކަށް ކޯޗުކަން ކޮށްދީފައެއް ނުވެއެވެ.
ދާދި ފަހުން ދީފައިވާ އިންޓަވިއުއެއްގައި މޮއިސް ބުނެފައިވަނީ އޭނާ ފުޓްބޯޅައާ ދުރަށް ދިއުމުގެ ވިސްނުމެއް އަދި ނުގެންގުޅޭ ކަމަށާއި، ނަމަވެސް ރެލިގޭޝަނުން ސަލާމަތްވާން އުޅޭ ޓީމަކަށް ކޯޗުކޮށްދިނުމުގެ ވިސްނުމެއް ނެތް ކަމަށެވެ.