މާފަންނު ސަހަރާގައި ހުރި ޕަންޕް ސްޓޭޝަން މަރާމާތުކޮށް ވަގުތީގޮތުން އޮޕަރޭޝަނަށް ގެނެސްފި

މާފަންނު ސަހަރާގައި ހުރި ފެން ހިންދާ ޕަމްޕު ސްޓޭޝަން މަރާމާތުކޮށް ވަގުތީގޮތުން އޮޕަރޭޝަނަށް ގެނެސްފިއެވެ.

މާލެ ސިޓީ ކައުންސިލުން މާފަންނު ސަހަރާ ހުސްކުރުމުގެ މަސައްކަތް ހަވާލުކޮށްފައިވާ ކޮންޓެކްޓަރުގެ އިހުމާލުން އެތަނުގައި ހަދާފައިވާ ސްޓޯމް ވޯޓަރ ޕަމްޕް ސްޓޭޝަން ހަލާކުވެފައިވާކަން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވަނީ މިއަދު ހާމަކުރައްވާފައެވެ.

މިމައްސަލައާ ގުޅޭގޮތުން އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާއިން ނެރުނު ނޫސްބަޔާނެއްގައި ވިދާޅުވީ މާފަންނު ސަހަރާގައި ހުރި ފެން ހިންދާ ޕަންޕު ސްޓޭޝަން ހަލާކުވުމާ ގުޅިގެން ނެޓްވޯކްތައް ޗެކުކޮށް ރޯޑް ޑިވެލޮޕްމެންޓް ކޯޕަރޭޝަން ލިމިޓެޑާއި، ސްޓެލްކޯގެ އެހީތެރިކަމާއެކު ވަގުތީގޮތުން އެޕަމްޕް ސްޓޭޝަން ބޭނުންކުރެވޭނެ ހާލަތަށް މިހާރު ގެނެވިފައިވާކަމަށެވެ.

މާލެއަށް ބޯކޮށް ވާރޭވެހުމުން ދިމާވާ ފެންބޮޑުވުމުގެ މައްސަލަތައް ޙައްލުކުރުމަށް ހަދާފައިވާ އެއް ސްޓޯމް ވޯޓަރ ޕަމްޕް ސްޓޭޝަން ހުންނަނީ މާފަންނު ސަހަރާ ހިމެނޭ ސަރަހައްދުގައެވެ.

ވިއްސާރާއިގެ ސަބަބުން މޭލެ ސިޓީގައި ފެންބޮޑުވުމުގެ މައްސަލަ ދިމާވާ ކޮންމެ ފަހަރަކު އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މާލޭގެ އެކި ސަރަހައްދުތަކުގައި ޤާއިމުކުރެވިފައިވާ ފެން ހިންދާ ސްޓޭޝަންތައް އިންސްޕެކްޓްކޮށް މި ސްޓޭޝަންތައް ރަނގަޅަށް މަސައްކަތްކުރޭތޯ ބަލަމުންދެއެވެ. އަދި މިގޮތަށް ބެލިއިރު މާފަންނު ސަހަރާގައި ޤާއިމްކުރެވިފައިވާ ޕަންޕް ސްޓޭޝަނާއި އެ ސްޓޭޝަނަށް ގުޅާފައިވާ ހޮޅިތައް ބޭނުން ނުކެރެވޭވަރަށް ހަލާކުވެފައިވާކަމަށް ފާހަގަކުރެވިފައިވެއެވެ.

މި ޕަމްޕް ސްޓޭޝަނަށް ގެއްލުންވެފައިވަނީ މާލޭ ސިޓީ ކައުންސިލުން މާފަންނު ސަހަރާގައި ކުރަމުންދާ މަސައްކަތެއްގެ ތެރެއިން އެ ސަރަހައްދު ކޮނެފައިވާތީކަމަށް އެ ވުޒާރާއިން ވިދާޅުވެއެވެ. އަދި މާފަންނު ސަހަރާގެ ބައެއް ހުސްކުރުމަށް މާލެ ސިޓީ ކައުންސިލުން ހަވާލުކޮށްފައިވާ ފަރާތުން އެވުޒާރާއަށް އެންގުމަކާ ނުލައި މަސައްކަތްކޮށްފައިވާނީ ޒިންމާދާރުކަންކުޑަ ގޮތަކަށްކަމަށްބުނެ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ކަންބޮޑުވުންފާޅުކުރައްވާފައެވެ.