ބޮޑުބަޑި ފެނުނީ 1600ގެ އަހަރުތަކުގައި މާލޭގެ ބޮޑުފާރެއްހުރި ސަރަހައްދަކުން: ވަޒީރު އާދަމް ނަޞީރު

ޙަބީބް ބޭންކު ކުރިންހުރި ބިން ކޮންނަނިކޮށް ފެނުނު ބޮޑުބަޑިއަކީ 1600ގެ އަހަރުތަކުގައި މާލޭގެ ބޮޑުފާރު ރާނާފައިހުރި ސަރަހައްދުން ފެނުނު ބަޑިއެއްކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ދިވެހިބަހާބެހޭ ވަޒީރު އާދަމް ނަޞީރު އިބްރާހިމް ވިދާޅުވީ ޙަބީބް ބޭންކު ކުރިންހުރި ބިން ކޮންނަނިކޮށް ފެނުނު ބޮޑުބަޑި ސަގާފީ ތަރިކަ ރައްކާތެރިކުރާ ޤައުމީ މަރުކަޒުގެ ބެލުމުގެ ދަށަށް މިހާރު ގެނެސްފައިވާ ކަމަށެވެ. އަދި އެ ބަޑި ސާފުކޮށް، ގިނަ ދުވަހު ބެހެއްޓުމަށްޓަކައި ކުރަންޖެހޭ ކަންކަން ކުރުމުގެ މަސައްކަތް ވަރަށް އަވަހަށް ފެށޭނެކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ އެ ބޮޑުބަޑި ފެނިފައިވަނީ ސުލްޠާން މުޙައްމަދު ޢިމާދުއްދީނު (އެއްވަނަ) މަޝްހޫރު ނަމުންނަމަ ބޮޑު ރަސްގެފާނުގެ ދުވަސްވަރު މާލޭގެ ހިމާޔަތުގައި ރާނާފައިހުރި ބޮޑުފާރެއްހުރި ސަރަހައްދަކުން ކަމަށެވެ. ނަމަވެސް އެ ބަޑިއަކީ އެ ދުވަސްވަރުގެ ބަޑިއެއްކަމެއް އަދި ދެނެގަނެވިފައިނުވާކަމަށްވެސް ވަޒީރު ވިދާޅުވިއެވެ.

ބޮޑު ރަސްގެފާނު ނުވަތަ ކަޅުތުއްކަލާގެ ދުވަސްވަރު ވެރިރަށް މާލޭ ދުޝްމަނުންގެ ޙަމަލާތަކުން ދިފާޢުކުރުމަށް ގިނަ މަސައްކަތްތަކެއްކޮށްފައިވާކަން ދިވެހި ތާރީޚުން އެނގެން އެބައޮތެވެ. އެގޮތުން އެ ރަސްގެފާނުގެ ވެރިކަމުގައި މާލޭގެ އެކި ސަރަހައްދުތަކުގައި ބުރުޒުތައް ބިނާކޮށް، ދެ ބުރުޒު ދެމެދުގައި ފާރެއް ލެއްވިއެވެ. އަދި ފާރާއި ބުރުޒުތަކުގައި ބަޑި ދޮރު ކަނޑާފައިވާކަމަށް ތާރީޚު ދިރާސާކުރާ ފަރާތްތަކުން ވިދާޅުވެއެވެ.

މާލެއިން ފެނުނު ބޮޑުބަޑިއާ ގުޅޭގޮތުން ތަރިކަ ދިރާސާކުރާ މަރުކަޒުން ވިދާޅުވީ ބަޑި ފެނިފައިވަނީ މާލޭގެ ޗާންދަނީމަގާއި ދަނބުގޯޅި ގުޅޭ ކަންމަތީގައި، ކުރިން ހަބީބް ބޭންކު ހުރި ބިމުގައި އިމާރާތެއް އަޅަން ކޮންނަމުން ދަނިކޮށް ކަމަށެވެ.

ހަބީބް ބެންކު ހުރި ބިން ކޮންނަނިކޮށް ފެނުނު ޒާތުގެ އިތުރު ބޮޑުބަޑިތައް މިހާރުވެސް ދާރުލްއާސާރާއި ބައެއް އާސާރީ ތަންތަނުގައި ފެންނަން އެބަހުއްޓެވެ.