އުތުރު ކޮރެޔާއާ އެކު އަސީރުން ބަދަލު ކުރަން ތައްޔާރަށް ހުންނެވި ކަމުގައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. ޔޫކްރެއިންގެ ފައުޖުން އުތުރު ކޮރެޔާގެ ސިފައިންގެ ބަޔަކު ހައްޔަރު ކޮށްފައި ވަނީ ރަޝިޔާގެ ހުޅަނގުގައި އޮތް ކޫރްސްކް ސަރަޙައްދުންނެވެ. އެއީ، ޔޫކްރެއިންގެ ފައުޖުތަކާ ދެކޮޅަށް ހަނގުރާމަ ކުރުމަށް އުތުރު ކޮރެޔާއިން ފޮނުވާފައިވާ ލަޝްކަރުގައި ހިމެނޭ ސިފައިންނެވެ.
ޔޫކްރެއިންގެ ފައުޖުތަކުން ސަރަޙައްދީ ރޮނގު ހުރަސްކޮށް ރަޝިޔާގެ ކޫރްސްކް ސަރަޙައްދަށް އަރައިގަނެފައި ވަނީ ހުސްވި އަހަރުގެ އޮގަސްޓު މަހުގެ 6ވަނަ ދުވަހުއެވެ. ޔޫކްރެއިންގެ ސިފައިން ވަނީ އެ ސަރަޙައްދުގެ ބައެއް ރަށްތަކާއި އަވަށްތަކަށް އަތްގަދަ ކޮށްފައެވެ. އުތުރު ކޮރެޔާއިން ރަޝިޔާއަށް ސިފައިން ފޮނުވާފައި ވަނީ، ޔޫކްރެއިންގެ ސިފައިން ފަހަތަށް ޖެއްސުމަށް ހަނގުރާމަ ކުރަމުންދާ ރަޝިޔާގެ އަސްކަރިއްޔާއަށް އެހީތެރިކަން ފޯރުކޮށްދިނުމުގެ ގޮތުންނެވެ. ރަޝިޔާގައި އުތުރު ކޮރެޔާގެ 11,000އަށްވުރެ ގިނަ ސިފައިން ތިބި ކަމުގައި ޔޫކްރެއިނާއި ހުޅަނގުގެ ބާރުތަކުން ތުހުމަތު ކުރެއެވެ.
ޒެލެންސްކީ ވިދާޅުވީ، ކޫރްސްކުން ހައްޔަރު ކޮށްފައިވާ އުތުރު ކޮރެޔާގެ ސިފައިން މިނިވަން ކުރެވޭނެ ގޮތްތަކެއް އުތުރު ކޮރެޔާއަށް ހުށަހަޅާފައިވާނެ ކަމުގައެވެ. އަދި، ޝަރުޠަކީ، އޭގެ ބަދަލުގައި ރަޝިޔާއިން ހައްޔަރު ކޮށްފައިވާ ޔޫކްރެއިންގެ ސިފައިންގެ ބަޔަކު މިނިވަން ކުރުން ކަމުގައެވެ. 2022ވަނަ އަހަރުގެ ފެބުރުވަރީ މަހުގެ 24ވަނަ ދުވަހު ފެށި ރަޝިޔާ-ޔޫކްރެއިން ހަނގުރާމައިގެ ތެރެއިން ޔޫކްރެއިންގެ ގިނަ އަދަދެއްގެ ސިފައިން ވަނީ ހައްޔަރު ކޮށްފައެވެ.
"އެންމެ ފުރަތަމަ ހައްޔަރު ކޮށްފައިވާ އުތުރު ކޮރެޔާގެ ސިފައިން އިތުރުން، އިތުރު ބަޔަކު ހައްޔަރު ކުރެވޭނެ ކަމާ މެދު ޝައްކެއް ނެތް. އުތުރު ކޮރެޔާގެ އިތުރު ސިފައިން ހައްޔަރު ކުރުމަށް އަޅުގަނޑުމެންގެ ފައުޖުތަކަށް ގިނަ ދުވަސްތަކެއް ހޭދައެއް ނުވާނެ،" ސޯޝަލް މީޑިޔާގައި ކުރެއްވި ޕޯސްޓެއްގައި ޒެލެންސްކީ ވިދާޅުވިއެވެ.
ޒެލެންސްކީ ވިދާޅުވީ، އުތުރު ކޮރެޔާގެ ސިފައިންގެ ދެ މީހަކު ޔޫކްރެއިންގެ ސިފައިންގެ ބެލުމުގެ ދަށުގައި ތިބި ކަމުގައެވެ. މިއީ، ދިރިތިއްބާ އުތުރު ކޮރެޔާގެ ސިފައިންގެ ބަޔަކު ރަޝިޔާގެ ކޫރްސްކުން ހައްޔަރު ކޮށްފައިވާ ކަން ޔޫކްރެއިނުން ހާމަކޮށްފައިވާ ފުރަތަމަ ފަހަރެވެ.
"އެ މީހުން [އުތުރު ކޮރެޔާގެ ޒައީމް] ކިމް ޖޮންގ އުނާ ޙަވާލު ކުރަން ޔޫކްރެއިނުން އޮތީ ތައްޔާރަށް، އެ ކަން ކުރެވޭނީ، އެ މީހުންގެ ބަދަލުގައި ރަޝިޔާއިން ހައްޔަރު ކޮށްފައިވާ އަޅުގަނޑުމެންގެ ސިފައިން މިނިވަން ކުރަން އެއްބަސްވުމުން،" ޒެލެންސްކީ ހާމަކުރެއްވިއެވެ. ޔޫކްރެއިންގެ ފައުޖުން ހައްުޔަރު ކޮށްފައިވާ އުތުރު ކޮރެޔާގެ ސިފައިން ފެންނަ ވީޑިޔޯއެއް ވެސް ޒެލެންސްކީ ޢާންމު ކުރައްވާފައިވެއެވެ. "އޭގެ ތެރެއިން އެކަކު ބޭނުމީ ޔޫކްރެއިންގައި މަޑު ކުރަން، ދެވަނަ މީހާ ބޭނުން ވަނީ އެނބުރި ކޮރެޔާއަށް ދިޔުމަށް،" ޒެލެންސްކީ ވިދާޅުވިއެވެ.
ޔޫކްރެއިނުން ބުނީ، ރަޝިޔާއަށް އެހީތެރިކަން ފޯރުކޮށްދިނުމަށް އެ ޤައުމުގެ ކޫރްސްކަށް ފޮނުވާފައިވާ އުތުރު ކޮރެޔާގެ ސިފައިންގެ ތެރެއިން 300އެއްހާ މީހުން މަރައިލާފައިވާނެ ކަމުގައެވެ. އަދި، އިތުރު 2,700އެއްހާ ސިފައިން ޒަޚަމު ކޮށްލާފައިވާނެ ކަމުގައެވެ.
ރަޝިޔާއިން ދެމުންދާ ނުރައްކާތެރި ޙަމަލާތަކުން ދިފާޢުވުމުގައި އެހީތެރިކަން ފޯރުކޮށްދިނުމަށް ޒެލެންސްކީ ވަނީ ހުޅަނގުގެ ބާރުތަކަށް ވެސް ތަކުރާރުކޮށް ގޮވައިލައްވާފައެވެ. އޭނާ ވިދާޅުވީ، ޔޫކްރެއިނަށް ހަތިޔާރު ފޯރުކޮށްދީ، އަސްކަރީ އެހީތެރިކަން ފޯރުކޮށްދިނުމަށް ހުޅަނގުގެ ބާރުތަކުން ވަޢުދުވެފައިވާ ކަމުގައެވެ. މި ކަމަށް އިޝާރާތް ކުރައްވައި ޒެލެންސްކީ ވަނީ އެ ވަޢުދުތައް ފުއްދުމަށް ހުޅަނގުގެ ބާރުތަކަށް ގޮވައިލައްވާފައެވެ. ޔޫކްރެއިނަށް ހަތިޔާރު ފޯރުކޮށްދީ، އަސްކަރީ ގޮތުން އެންމެ ބޮޑު އެހީތެރިކަމެއް ފޯރުކޮށްދެމުން ދަނީ އެމެރިކާއާއި ހުޅަނގުގެ ދިފާޢީ އިއްތިޙާދު (ނޭޓޯ)ގެ މެންބަރު ޤައުމުތަކުންނެވެ.