އެހީތެރިކަން ފޯރުކޮށްދިނުމަށް ސިފައިން ތިބޭނީ 24 ގަޑިއިރު ތައްޔާރަށް: ޗީފް އޮފް ޑިފެންސް ފޯސް

މޫސުން ގޯސްވާނެކަމަށް ލަފާކުރެވޭތީ ސިފައިން 24 ގަޑިއިރު ތައްޔާރަށް ތިބިކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙިމް ޙިލްމީ ވިދާޅުވެއްޖެއެވެ.

ޗީފް އޮފް ޑިފެންސް ފޯސް މިހެން ވިދާޅުވީ، މޫސުން ގޯސްވުމުން ލިބޭ ގެއްލުންތަކުން ރައްޔިތުން ރައްކާތެރިކުރުމަށް އެހީތެރިކަން ފޯރުކޮށްދިނުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެކުލަވާލި ޚާއްސަ ޓާސްކް ފޯހުން ބޭއްވި ނޫސްވެރިންގެ ބައްދަލުކުރެއްވުމުގައެވެ.

ޗީފް އޮފް ޑިފެންސް ފޯސް ވިދާޅުވީ ދުރަލާ ގިނަ ފިޔަވަޅުތަކެއް އެމްއެންޑިއެފްއާއި ކަމާގުޅުންހުރި އިދާރާތައް ގުޅިގެން އަޅާފަވާކަމަށެވެ. އެގޮތުން ޖޮއިންޓް އޮޕަރޭޝަން ސެންޓަރ އެކްޓިވޭޓްކޮށް ރައްޔިތުންގެ ފުރާނައާއި މުދާ ސަލާމަތްކުރުމަށާއި، ވިއްސާރައިން ލިބިދާނެ ގެއްލުންތައް ކުޑަކުރުމަށް، މުޅިރާއްޖެ ހިމެނޭގޮތުން މާލޭ އޭރިއާ، ސެންޓްރަލް އޭރިއާ، ސަދަން އޭރިއާ އަދި ނޮދަން އޭރިއާ ހިމެނޭގޮތަށް ރާއްޖޭގެ 4 ސަރަހައްދުގައި ރައްކާތެރިކަމުގެ ގިނަ ފިޔަވަޅުތަކެއް އަޅާފައިވާކަމަށެވެ.

އެގޮތުން ވިއްސާރައިގެ ސަބަބުން ލިބޭ ގެއްލުން ކުޑަކުރުމަށްޓަކައި، އާންމުކޮށް ފެންބޮޑުވާ ސަރަޙައްދުތަކުގެ ތެރެއިން ފަސޭހައިން ފެން ނެގެންހުރި ސަރަހައްދުތަކުގައި އެމް.އެންޑީއެފް އެފްއާރއެސްގެ ފަރާތުން ޕަންޕް ބަހައްޓާ، ވަޅުތަކަށް އެޅެމުންދާ ފެން ހިއްކަމުންނެވެ. އަދި ފެންތައް ބޭރުކުރުމަށްޓަކައި ކުރެވެންހުރި އެހެނިހެން މަސައްކަތްތައް ވެސް ދަނީ ކުރަމުންނެވެ.

މީގެއިތުރުން މާލެ އޭރިއާއަށް ނިސްބަތްވާ ރަށެއްގައި ފެންބޮޑުވެ އެމްއެންޑީއެފްގެ އެހީތެރިކަމަށް އެދިއްޖެނަމަ، އެކަމަށް އިޖާބަދިނުމަށް މާލެ އޭރިއާގެ ކޮމާންޑުން ވަނީ ތައްޔާރުވެފައެވެ.
"އެމްއެންޑީއެފްގެ އޭރިއާ ކޮމާންޑްތައް ވަނީ ތައްޔާރީ ޙާލަތަށް ގެނެސްފައި. މާލޭގައިވެސް މިވަނީ ޕަމްޕް ބެހެއްޓުމާ ވެލިބަސްތާ ޖެހުމުގެ މަސައްކަތް ފަށާފައި. ރައީސްގެ އިރުޝާދާއެކު، އެމްއެންޑީއެފް އަދި ކަމާ ގުޅުންހުރި އިދާރާތައް މިވަނީ ތައްޔާރުވެފައި. ސިފައިންވެސް ތިބީ 24 ގަޑިއިރު ރައްޔިތުންގެ ޚިދުމަތުގައި." ޗީފް އޮފް ޑިފެންސް ވިދާޅުވިއެވެ.

ވިއްސާރައިގައި ގެދޮރަށް ފެންވަދެ ލިބިދާނެ ގެއްލުމަކުން ރައްކާތެރިކުރުމަށް ވެލިބަސްތާ ޖަހައިދިނުމުގެ މަސައްކަތައްވެސް މާލޭ އޭރިއާގެ ކޮމާންޑްޑުން ވަނީ ތައްޔާރުވެފައެވެ. އެގޮތުން މާލޭގެ ގޭބިސީ ތަކަށް އަވަސްކަމާއެކު ވެލިބަސްތާ ފޯރުކޮށްދިނުމަށް މާލޭގެ ތިން ސަރަޙައްދެއްގައި އުޅނަދުތައް ވަނީ ބަހައްޓާފައެވެ. އެގޮތުން ސަލްމާނު މިސްކިތް ސަރަހައްދުގައި 260 ބަސްތާއާއިއެކު ލޮރީއަކާއި، ކުޑަކުދިންގެ ބަގީޗާ ސަރަޙައްދުގައި 200 ބަސްތާއާއިއެކު ލޮރީއެއްގެ އިތރުުން ސޯޝަލް ސެންޓަރ ސަރަޙައްދުގައި 200 ބަސްތާއާއިއެކު ލޮރީއެއް ސްޓޭޝަން ކުރެވިފައިވެއެވެ. އެ ސްޓޭޝަންތަކުން ރައްޔިތުންނަށް ވެލިބަސްތާ ފޯރުކޮށްދިނުމުގެ އިތުރުން އެހީތެރިކަން ބޭނުންވާ ފަރާތްތަކަށް ވެލިބަސްތާ ފޯރުކޮށްދިނުމަށް 2 މޯބައިލްޓީމްވެސް ދަނީ ހަރަކާތްތެރިވަމުންނެވެ. އަދި ހާލަތަށް ރިޢާޔަތްކޮށް މޮބައިލް ޓީމްތަކުގެ ޢަދަދު އިތުރުކުރާނެކަމަސް އެމްއެންޑީއެފުން ވިދާޅުވެފައެވެ.

މާލޭގެ އިތުރުން ސެންޓްރަލް އޭރިއާ، ސަދަން އޭރިއާ އަދި ނޮދަން އޭރިއާ ގައި ވެސް ކައިންސިލްތަކާއި ގުޅިގެންދަނީ ގިނަ މަސައްކަތްތަކެއް ކުރަމުންނެވެ. އެގޮތުން ރަށްތަކުގެ ހާލަތު ކައިރިން ބަލަމުން ދިއުމާއިއެކު، ސިފައިންގެ އެހީތެރިކަން އެންމެބޮޑަށް ބޭނުންވާނެކަމަށް ލަފާ ކުރެވޭ ރަށްތަށް ދެނެގަނެ، އެހީތެރިކަން ބޭނުންވެއްޖެ ހާލަތެއްގައި މީހުންނާއި ވަސީލަތްތައް ފޯރުކޮށްދިނުމަށްވެސް ވަނީ ތައްޔާރުވެފައެވެ.

އެމްއެންޑީއެފް އިން މި އޮޕަރޭޝަންގައި މަސައްކަތް ކުރަމުންދަނީ ޖޮއިންޓް އޮޕަރޭޝަން ސެންޓަރ ގެ ތެރެއިން ކަމަށްވުމާއިއެކު، އެހީތެރިކަން ހޯއްދެވުމަށްޓަކައި މާލެއިން، މޯލްޑިވްސް ނޭޝަނަލް ޑިޒާސްޓަރ މެނޭޖްމެންޓް އޭޖެންސީ (އެންޑީއެމްއޭ)ގެ ހޮޓްލައިން 115 ގުޅައިގެން އެހީތެރިކަން ހޯދޭނެއެވެ. އަދި އަތޮޅުތަކުން ކޯޑިނޭޓް ކުރާނީ ކައުންސިލްތަކާއި ގުޅިގެން އޭރިއާ ކޮމާންޑްތަކާކަމަށް އެމްއެންޑީއެފުން މަޢުލޫމާތުދެއެވެ.