ޕާކިސްތާނުގައި ބާއްވަން ޝެޑިއުލްކޮށް، އެކަމަކު ލަސްވަމުންދާ ސައުތު އޭޝިއަން ގޭމްސް ބާއްވަން އެ ގައުމުގެ ސަރުކާރުގެ އެހީތެރިކަމަށް ޕާކިސްތާނުގެ އޮލިމްޕިކް ކޮމިޓީން އެދެފި އެވެ.
އަލަށް އިންތިހާބުވި ރައިސް އާރިފް ސައީދު ހޯމަ ދުވަހު ވަނީ މީޑިއާތަކާ ބައްދަލުކޮށް ޕާކިސްތާނުގެ ކުޅިވަރާމެދު އޭނާ ދެކިވަޑައިގަންނަވާ ތަސައްވުރާއި ޕްލޭން ހިއްސާކުރައްވާފަ އެވެ. ސަރުކާރުގެ ކިބައިން އޭނާ އެދިވަޑައިގަތީ ގޭމްސް ބޭއްވުމަށް ބޭނުންވާ ފައިސާ ހަމަޖައްސަވައި ދެއްވުމަށެވެ.
"ވަރަށް ގިނަ މަސައްކަތް ކުރަން އެބަޖެހޭ ސައުތު އޭޝިއަން ގޭމްސްއަށް. ޕާކިސްތާނަށް މި ގޭމްސް ކާމިޔާބު ކަމާއެކު ބޭއްވިއްޖެނަމަ އެއީ އިންޓަނޭޝަނަލް އެހެން ގޭމްސްތައް ބައްވަން ލިބޭ ފުރުސަތަކަށްވާނެ،އާރިފް ސައީދު
ގޭމްސްއިން މެޑަލް ހޯދުމަށްވުރެ ޕާކިސްތާނަށް މި ވަގުތު މުހިންމީ އަދި އިސްކަންދޭންވީ ކުޅިވަރުގެ ރިވެތި އުސޫލުތައް ދަމަހައްޓައި ރަނގަޅު އޮނިގަނޑެއްގެ ތެރެއިން ކަންކަން ކުރުން ކަމަށް ވެސް އޭނާ ވިދާޅުވި އެވެ.
"އަހަރުމެންގެ ފުރަތަމަ ކަމަކީ ތެދުވެރިކަން އިސްކުރުން، ކުޅިވަރުގެ އުސޫލުތަކާއި ކުޅިވަރުގެ އަހުލާގު ހިފެހެއްޓުން. ގޭމްސްތަކުން މެޑަލް ހޯދިދާނެ. އެކަމަކު އޭގެ ހަގީގީ ފައިދާ ފެންނާނީ މި ކަންކަން ދެމެހެއްޓިގެން،އާރިފް ސައީދު
ސާކްގެ ހަތް ގައުމު ވާދަކުރާ ސައުތު އޭޝިއަން ގޭމްސް ޕާކިސްތާނުގައި ބާއްވަން ނިންމުމަށް ފަހު އަންނަ އަހަރަށް ފަސްކުރަން ޖެހުނީ ވެސް ގޭމްސް ބޭއްވުމަށް ވާންޖެހޭ ތައްޔާރީތަކަށް ބޭނުންވާ ބަޖެޓް ޕާކިސްތާން ސަރުކާރަށް ތަފާތު ސަބަބުތަކާހުރެ ނުދެވުމުންނެވެ.