މޫސުމީ ބަދަލުތަކާއި ތިމާވެށީގެ ދާއިރާއިން މަޢުލޫމާތު ބަދަލުކުރުމަށް އެސްޓޯނިއާއެކު އެއްބަސްވުމެއް

މޫސުމީ ބަދަލުތަކާއި ތިމާވެށީގެ ދާއިރާއިން މަޢުލޫމާތު ބަދަލުކުރުމަށް ރާއްޖެއިން އެސްޓޯނިއާއެކު އެއްބަސްވުމެއްގައި ސޮއިކޮށްފިއެވެ.

މި އެސްބަސްވުމުގައި ސޮއިކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

ޚާރިޖީ ވުޒާރާއިން ވިދާޅުވީ، މި އެއްބަސްވުމުގެ ދަށުން މޫސުމީ ބަދަލުތަކާއި ތިމާވެށްޓާއި ހަކަތައިގެ ދާއިރާއިން ދެ ޤައުމުގެ ދެމެދުގައި މަޢުލޫމާތު ބަދަލުކޮށް، އެހީދިނުމާއެކު އެ ދާއިރާތަކުގެ ކުރިއެރުމަށް ދެ ޤައުމު ގުޅިގެން މަސައްކަތްކުރެވޭނެ ކަމަށެވެ.

އަދި މި އެއްބަސްވުމުގެ ބޭނުމަކީ މޫސުމީ ބަދަލުތަކަށް ވިލުންތެރިވުމާއި ތިމާވެށްޓަށް ދިމާވާ މައްސަލަތައް ހައްލުކުރުމާއި އިޢާދަކުރަނިވި ހަކަތަ ޤާއިމްކުރުމަށްކުރެވޭ މަސައްކަތްތައް ރާއްޖޭގައި ހަރުދަނާކުރުން ކަމަށެވެ.

Minister @Abkhaleel signed an MoU on Knowledge Exchange, Cooperation and Support in the Field of Climate Change, Environment and Energy with #Estonia, today.

This MoU aims to strengthen collaboration on climate action, environmental sustainability, and clean energy solutions. pic.twitter.com/UzvgrQpd2B

— Ministry of Foreign Affairs 🇲🇻 (@MoFAmv) January 13, 2025

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް މި ކުރައްވާ ދަތުރުފުޅުގައި ޑިޖިޓަލް ޓެކްނޮލޮޖީ، ސައިބަރ ސެކިއުރިޓީ، އީ-ގަވަރނަންސް، މޫސުމީ ބަދަލުތަކާއި ތަޢުލީމީ ދާއިރާއިން ދިވެހިރާއްޖެއާއި އެސްޓޯނިއާއާ ދެމެދު ގުޅުން ބަދަހިކުރުމާއި، ގުޅިގެން މަސައްކަތް ކުރުމަށް އިތުރު ފުރުސަތުތައް ހޯއްދެވުމަށް މަސައްކަތް ކުރައްވާނެއެވެ.

މި ދަތުރުފުޅުގައި ރައީސުލްޖުމްހޫރިއްޔާއާއެކު ދިވެހި ސަރުކާރުގެ އިސް ވަފުދެއް ބައިވެރިވެވަޑައިގަންނަވައެވެ.