ލުބްނާނުގެ ބޮޑުވަޒީރުގެ މަޤާމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގެ ރައީސް ނަވާފް ސަލާމް އިންތިޚާބު ކުރުމުން ސަރުކާރު އެކުލަވާލުމުގެ މަސައްކަތް ކުރެއްވުމަށް އޭނާ އަނބުރާ ޤައުމަށް ވަޑައިގަތުމަށް ލުބްނާނުގެ އައު ރައީސް ޖޫޒީފް ޢައޫން އަންގަވައިފިއެވެ.
ލުބްނާނުގެ ޤާނޫނުހަދާ މަޖިލީހުގެ އަޤުލަބިއްޔަތުން ބޮޑުވަޒީރުގެ މަޤާމަށް ނަވާފް ސަލާމް އިންތިޚާބު ކުރުމަށް ވަނީ ފާސް ކޮށްފައެވެ. ޤާނޫނުހަދާ މަޖިލީހުގެ 128 މެންބަރުންގެ ތެރެއިން 84 މެންބަރުން ވަނީ ބޮޑުވަޒީރުގެ މަޤާމަށް ސަލާމް އިންތިޚާބު ކުރުމަށް ރުހުން ދެއްވައިފައެވެ. އޭނާއަށް ރުހުން ދެއްވި މެންބަރުންގެ ތެރޭގައި ނަޞާރާ އަދި ޑުރޫޒު ޕާޓީތަކަށް ނިޞްބަތްވާ މެންބަރުންނާއި ސުންނީ މުސްލިމު މެންބަރުން ވެސް ހިމެނެއެވެ. އޭގެ އިތުރުން އިޞްލާޙީ މަސައްކަތަށް ހިތްވަރު ދޭ މެންބަރުން ވެސް ހިމެނެއެވެ. އެ މެންބަރުންނަކީ ޙިޒްބުالله ޖަމާޢަތުން ހަތިޔާރު ބަހައްޓަން ޖެހޭ ކަމަށް ވަކަލާތު ކުރާ މެންބަރުންނެވެ.
ބޮޑުވަޒީރުގެ މަޤާމަށް ސަލާމް ޢައްޔަނު ކުރުމަކީ ލުބްނާނުގެ މުޖާހިދުންގެ ޖަމާޢަތް, ޙިޒްބުاللهއަށް ބަލިކަށިކަން ގެނެސްދޭނެ ކަމެކެވެ. މިދިޔަ އަހަރުގެ ތެރޭގައި ޔަހޫދީ ދައުލަތާއި ލުބްނާނާ ކުރި ހަނގުރާމައިގެ ސަބަބުންނާއި ޙިޒްބުاللهއަށް ވާގިވެރިވި ސޫރިޔާގެ ކުރީގެ ރައީސް ބައްޝާރު އަލް-އަސަދުގެ ވެރިކަން ކުއްލި ގޮތަކަށް ނިމުމަކަށް އައުމުގެ ސަބަބުން ޙިޒްބުاللهގެ ހައިބަތާއި ބާރު ވަނީ ގެއްލިފައެވެ. މި ދަނޑިވަޅުގައި ސަޢުދީ ޢަރަބިއްޔާއިން ވެސް މަސައްކަތް ކުރަމުން ދަނީ ލުބްނާނުގައި އެ ޤައުމުގެ ނުފޫޒު އިތުރުކުރުމަށެވެ. އެހެންކަމުން ދުވަހެއް ދުވަހަކަށް ޙިޒްބުالله ދަނީ އިތުރަށް ބަލިކަށި ވަމުންނެވެ.
ޤާނޫނުހަދާ މަޖިލީހުގެ ޖަލްސާގައި ޙިޒްބުاللهއާއި އެ ޖަމާޢަތަށް ވާގިވެރިވާ ޝީޢީންގެ ޢަމަލް މޫވްމަންޓުން ބޮޑުވަޒީރުގެ މަޤާމަށް އެއްވެސް ނަމެއް ހުށަހަޅާފައެއް ނުވެއެވެ. އެހެންކަމުން ރައީސް ޢައޫންގެ ސަރުކާރުގައި އެ ދެ ޕާޓީން ބައިވެރިވާން ބޭނުން ނުވާ ކަން ހާމަވެގެން ދެއެވެ. ބެލެވޭ ގޮތުގައި މިދިޔަ ހަފުތާގެ ތެރޭގައި ރައީސްގެ މަޤާމަށް ޢައޫން ޢައްޔަނު ކުރުމަށް ޙިޒްބުاللهން ތާޢީދު ކުރިއިރު އެ ޖަމާޢަތަށް ޤަބޫލު ކުރެވިފައި އޮތީ ބޮޑުވަޒީރުގެ މަޤާމުގައި މިހާރު ހުންނެވި ނަޖީބު މީޤާތީއަށް އެ މަޤާމުގައި ދެމިހުންނަވާނެ ކަމަށެވެ. އެހެންކަމުން ބޮޑުވަޒީރުގެ މަޤާމަށް ސަލާމް އިންތިޚާބު ކުރުން ވެގެން ގޮސްފައި މި ވަނީ ޙިޒްބުاللهއާ އެކު ވެފައިވާ އެއްބަސްވުމަކާ ޚިލާފުވެފައިވާ ކަމަށް އެ ޖަމާޢަތަށް ޤަބޫލު ކުރެވޭ ފަދަ ޙާލަތަކަށެވެ.
ޙިޒްބުاللهން ޤަބޫލުކުރާ ގޮތުގައި އިިދިކޮޅު ޕާޓީތަކުން މަސައްކަތް ކުރަމުން ދަނީ އެ ޖަމާޢަތް ބާކީ ކޮށްލުމަށެވެ. ނަމަވެސް އެ ޕާޓީތަކުން ބުނަމުން ދަނީ ޙިޒްބުاللهގެ އަސްކަރީ ބާރުވެރިކަމާއި ހަތިޔާރު ގިނަ ކަމުގެ ސަބަބުން ދައުލަތުގެ ބާރަށް ހުރަސް އެޅޭ ކަމަށެވެ.
ޙިޒްބުاللهގެ އިސް މެންބަރެއް ކަމަށްވާ މުޙައްމަދު ރަޢުދު ވިދާޅުވީ އެ ޖަމާޢަތާ ދެކޮޅު ޕާޓީތަކުން މަސައްކަތް ކުރަމުން ދަނީ ބައިބައިވުން އިތުރުކޮށް އެ ޖަމާޢަތް ބާކީ ކޮށްލުމުގެ ނިޔަތުގައި ކަމަށެވެ. ރައީސްކަމަށް ޢައޫން އިންތިޚާބު ކުރުމުގައި ޙިޒްބުاللهން އެއްބާރުލުމުގެ އަތެއް ދިއްކުރުމުން އެ އަތުގައި ހިފައި އަތް ކަނޑާފައިވާ ކަމަށް އޭނާ ސިފަ ކުރެއްވިއެވެ. އޭނާ އިތުރަށް ވިދާޅުވީ އެއް ބަޔަކު އަނެއް ބަޔަކާ ގުޅިގެން އުޅުމާމެދު މައްސަލައެއް އޮތް ކޮންމެ ސަރުކާރަކީ ޤާނޫނީ ގޮތުން އެއްވެސް ހައިޞިއްޔަތެއް އޮންނާނެ ސަރުކާރެއް ނޫން ކަމަށެވެ. ނަމަވެސް މި ޙާލަތުގައި ޤައުމުގެ މަޞްލަހަތު އިސްކޮށް ޙިޒްބުاللهން ޢަމަލު ކުރާނީ މަޑުމައިތިރިކަމާއި ޙިކުމަތްތެރިކަމާ އެކުގައި ކަމަށް އޭނާ ވިދާޅުވިއެވެ.
2022ވަނަ އަހަރުގެ އޮކްޓޯބަރު މަހު ލުބްނާނުގެ ކުރީގެ ރައީސް މިޝޭލް ޢައޫންގެ ރިޔާސީ ދައުރު ނިމުމަކަށް އައުމަށް ފަހު އެ މަޤާމަށް އައު ރައީސެއް އިންތިޚާބު ކޮށްފައެއް ނުވެއެވެ. އެއީ 128 މެންބަރުންގެ މައްޗަށް އެކުލެވިފައިވާ ލުބްނާނުގެ ޤާނޫނުހަދާ މަޖިލީހުގެ އަޣުލަބިއްޔަތު އެއް ބަޔަކަށް ލިބިފައި ނުވުމާއި މަޖިލީހުގެ ގިނަ މެންބަރުން ހިތްހަމަ ޖެހޭ ކެންޑިޑޭޓަކު ނެތުމުގެ ސަބަބުންނެވެ. އޭގެ ސަބަބުން މި މުއްދަތުގައި އެ ޤައުމުގައި ފުރިހަމަ ސަރުކާރެއް ވެސް އެކުލެވިފައެއް ނުވެއެވެ. އެހެންކަމުން ދެ އަހަރަށް ފަހު ރައީސާއި ބޮޑުވަޒީރުގެ މަޤާމަށް ބޭފުޅުން އިންތިޚާބު ކުރުމުން މި ވަނީ އެ ޤައުމުގެ ސަރުކާރު ފުރިހަމައަށް އެކުލަވާލައި ލުބްނާނަށް ދިވާވެފައިވާ ބޮޑެތި މައްސަލަތައް ޙައްލުކޮށް ޤަައުމު ރަނގަޅަށް ހިންގާލަން މަގުފަހިވެފައެވެ. ޤައުމު އަލުން އާރާސްތުކުރުމުގައި ބޭރުގެ ޤައުމުތަކުގެ އެހީތެރިކަން ލިބޭނެކަމުގެ ޔަޤީންކަން ދެއްވަމުން ޢައޫން ވަނީ ބައިނަލްއަޤްވާމީ ގޮތުން ގިނަ ފުރުޞަތުތަކެއް ހުރި ކަމަށް ވިދާޅުވެ އަވަސް ސަރުކާރެއް އެކުލަވާލައްވަން ބޭނުންވާކަމަށް ވިދާޅުވެފައެވެ.