އެސްޓޯނިއާ ސަރުކާރުން އަދާކުރަމުންދާ މެހެމާންދާރީއަށްޓަކައި ރައީސްގެ ޚާއްސަ ޝުކުރެއް

އެސްޓޯނިއާގެ ސަރުކާރުން އަދާކުރަމުން ގެންދަވާ މެހެމާންދާރީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޝުކުރު އަދާކުރައްވައިފިއެވެ.

ރައީސުލްޖުމްހުރިއްޔާ މިހާރު ގެންދަވަނީ އެސްޓޯނިއާއަށް ރަސްމީ ދަތުރުފުޅެއް ކުރައްވަމުންނެވެ.

މިދަތުރުފުޅާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އެސްޓޯނިއާއަށް ދިޔުމަށް ދަޢުވަތުދެއްވައި ތާރީޚީ ދަތުރެއްކުރެއްވުމުގެ މަގު ފަހިކޮށްދެއްވިކަމަށްޓަކައި އެސްޓޯނިއާގެ ރައީސް އަލާރް ކަރިސްއަށާއި އެ ޤައުމުގެ ސަރުކާރަށް ޝުކުރުއަދާކުރައްވާ ކަމަށެވެ. އަދި އެ ޤައުމަށް ވަޑައިގަތީންސުރެ، އެސްޓޯނިއާ ސަރުކާރުން އަދާކުރަމުންދާ ހިންހެޔޮ މެހެމާންދާރީ ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ އެސްޓޯނިއާގެ ރައީސާއެކު ކުރިއަށްދިޔަ ބައްދަލުވުމުގައި ދެ ޤައުމުގެ ގުޅުން ބަދަހިކުރުމަށް މުހިންމު މަޝްވަރާތަކެއް ކުރެވުނު ކަމަށެވެ. އަދި ސަރުކާރު ހިންގުމުގައި ފަންނިއްޔާތު ބޭނުންކުރާ މިންވަރު އިތުރުކުރުމަށާއި ސައިބަރ އެޓޭކްތަކަށާއި މޫސުމީ ބަދަލުތަކަށް ވިލުންތެރިވުމާއި ތަޢުލީމީ ދާއިރާގެ އިތުރުންވެސް އެހެނިހެން ދާއިރާތަކުން ދެ ޤައުމުން ގެންގުޅޭ އެއް ގޮތް ވިސްނުމުގެ ސަބަބުން މި ދާއިރާތަކުގެ ކުރިއެރުމަށް ގުޅިގެން މަސައްކަތްކުރެވިގެންދާނެކަން ރައީސް ފާހަގަކުރެއްވިއެވެ.

Thank you, President @AlarKaris and the Government of Estonia, for the kind invitation to me to undertake this historic visit to your beautiful country. The warm hospitality and heartfelt welcome I received since my arrival have been excellent. It is indeed an honor to be here.… pic.twitter.com/ERqJvI1t9t

— Dr Mohamed Muizzu (@MMuizzu) January 14, 2025

ކުދި ޤައުމުތަކާއެކު ގުޅުން ބަދަހިކުރުމުގެ ސަބަބުން ހަމައެކަނި ކަށަވަރުކުރެވެނީ ރާއްޖޭގެ ސަލާމަތާއި ސިޔާދަތު އެކަނި ނޫންކަން ފާހަގަކުރައްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ބައިނަލްއަޤުވާމީ ހަމަޖެހުމާއި ދެމެހެއްޓެނިވި ތަރައްޤީ ކަށަވަރުކުރުމުގައިވެސް ކުދި ޤައުމުތަކާއެކު ގުޅުން ބަދަހިކުރުން މުހިންމު ކަމަށެވެ.

ރައީސުލްޖުމްހޫރިއްޔާ އެސްޓޯނިއާއަށް މިހާރު ކުރައްވަމުން ގެންދަވާ ދަތުރުފުޅަކީ އެ ޤައުމުގެ ރައީސްގެ ދަޢުވަތަކަށް ކުރައްވާ ރަސްމީ ދަތުރުފުޅެކެވެ. މިއީ ރާއްޖޭގެ ރައީސުލްޖުމްހޫރިއްޔާއަކު އެ ޤައުމަށް ވަޑައިގެންނެވި ފުރަތަމަ ފަހަރެވެ.