މޯލްޑިވިއަންގެ ސީޕްލޭންގައި 1.2މިލިޔަނަށްވުރެ ގިނަ ފަސިންޖަރުން
-
ސީޕްލޭން ލައުންޖުގެ ޖާގަ ވަނީ 2 ގުނަ ބޮޑުކޮށްފައި
-
އަންނަ އަހަރު ޓުވިން އޮޓަރ ކްލެސިކް 300ޖީގެ 2 ބޯޓު ބޭނުން ކުރަން ފަށާނެ
މޯލްޑިވިއަންގެ ސީޕްލޭން އޮޕަރޭޝަންގައި މިހާތަނަށް 1.2މިލިޔަނަށްވުރެ ގިނަ ފަސިންޖަރުން އުފުލާފައިވާކަމަށް މޯލްޑިވިއަންގެ މެނޭޖިންގ ޑިރެކްޓަރ އިބްރާހިމް އިޔާސް ވިދާޅުވެއްޖެއެވެ.
މޯލްޑިވިއަންގެ މެނޭޖިން ޑިރެކްޓަރ އިބްރާހިމް އިޔާސް މިފަދައިން ވިދާޅުވީ އެ ކުންފުނީގެ ސީޕްލޭން ޓަރމިނަލް ތަރައްޤީކުރުމަށްފަހު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
2014ވަނަ އަހަރުގެ އޭޕްރީލް މަހު މޯލްޑިވިއަންގެ ސީޕްލޭން ޚިދުމަތް ފެށިގެން ދިޔުމަކީ އެ ކުންފުނީގެ ތާރީޚުގައި އައު ބާބެއް ފެށި ދުވަހެއްކަން ފާހަގަކުރައްވާ އިޔާސް ވިދާޅުވީ އެ ޚިދުމަތާއެކު ވެލާނާ އިންޓަރނޭޝަނަލް އެއަޕޯޓާއި ރާއްޖޭގެ ރިސޯޓްތަކާއި ދުރު ރަށްތައް އިތުރަށް ގާތްކޮށްދީ މުޅި ރާއްޖެ އެއްވިއުގައެއްގައި ގުޅާލުމުގެ މުހިއްމު ބިންގަލެއް އެޅިގެން ދިޔަކަމަށެވެ.
2015ވަނަ އަހަރު ވެލާނާ އިންޓަރނޭޝަނަލް އެއާޕޯޓްގައި މޯލްޑިވިއަންގެ ޓާމިނަލް ރަސްމީކޮށް ހުޅުވާ ޚިދުމަތް ދޭން ފެށިކަން އިޔާސް ފާހަގަކުރެއްވިއެވެ. އޭރު ސީޕްލޭންގެ ޚިދުމަތް އެންމެ 2 ބޯޓުން ފެށިނަމަވެސް މިހާރު އެ ޚިދުމަތް ވަނީ ފަތުރުވެރިކަމުގެ ދާއިރާގެ ވަރުގަދަ ބައިވެރިންނާއެކު ތަޖުރިބާކާރު މުވައްޒަފުންނާއި ޚާއްސަ ވަޞީލަތްތަކުގެ މައްޗަށް ބިނާވެ ޚިދުމަތްތަކަށް ބަދަލުއަިސްފައިކަން އިޔާސް ފާހަގަކުރެއްވިއެވެ. މޯލްޑިވިއަންގެ ސީޕްލޭން ޚިދުމަތުގައި މިއަދު 11 ޓުވިން އޮޓަރ މަތިންތާބޯޓުގެ ފްލީޓެއް އޮންނަކަން ފާހަގަކުރައްވާ އިޔާސް ވަނީ ސީޕްލޭން އޮޕަރޭޝަންގައި މިއަދާހަމައަށް 1.2މިލިޔަނަށްވުރެ ގިނަ ފަސިންޖަރުން އުފުލާފައިވާކަން ފާހަގަކުރައްވާފައެވެ.
"ސީޕްލޭންގެ ޚިދުމަތް ފުޅާކޮށް ތަރައްޤީކުރުމަކީ ސަރުކާރުން އިސްކަންދެން. އެގޮތުން ޓާމިނަލް ތަރައްޤީކުރުމުގެ އަމަލީ މަސައްކަތް މިދިިޔަ އަހަރު ފެށި.. އަދި މިއާއެކު ގިނަކަންކަން ހާސިލްކުރެވުނު. ސީޕްލޭން ލައުންޖުގެ ޖާގަ 2 ގުނަ ބޮޑުކޮށްފަ. ކިޑްސް ޕްލޭ އޭރިއާއަކާއި ފަސިންޖަރުންނަށް ޚާއްސަ ލުއިކާނާ އަދި ސްވެނިއަރ ލިބޭނެ ކިއޯސްކެއް ޤާއިމްކޮށްފައިވޭ. ބޯޑިން ގޭޓްގެ އަދަދު އިތުރުކޮށް ލައުންޖުގެ ދިވެހި މާހައުލާ ގުޅޭގޮތަށް އައުޓްޑޯ އޭރިއާއެއް ޤާއިމްކޮށްފައިވޭ.މޯލްޑިވިއަންގެ މެނޭޖިން ޑިރެކްޓަރ އިބްރާހިމް އިޔާސް ވިދާޅުވިއެވެ.
މޯލްޑިވިއަންގެ ސީޕްލޭން އައު ޓާމިނަލްއަށް އަލިއަޅުވާލައްވާ އިޔާސް ވިދާޅުވީ މުޅި ޓާމިނަލްގެ އިންޓީރިއާ އަދި އެކސްޓީރިއާއަށް ބަދލުތައް ގެނެސްފައިވާކަމަށެވެ. މުވައްޒަފުންނަށް ޚާއްސަ ކެންޓީންގެ ޚިދުމަތާއި ކުރިން ޓާމިނަލްގައި ބޭނުންކުރަމުންއައި 10000 އަކަފޫޓްގެ ސަރަޙައްދު ދެގުނަ ބޮޑުކޮށްފައިވާކަން ފާހަގަކުރެއްވިއެވެ. އެކުންފުނީގެ ސީޕްލޭން ފްލީޓަށް ބޯޓުތައް އިތުރުކުރުމަށްޓަކައި އެންމެ ފަހުގެ 2 ޓުވިން އޮޓަރ ކްލެސިކް 300ޖީ އަށް މިއަހަރުގެ އޯގަސްޓްމަހު އޯޑަރުކޮށްފައިވާއިރު، އެ ދެ ބޯޓު އަންނަ އަހަރު ރާއްޖެ ގެނެސް އޮޕަރޭޝަނަށް ގެންނައުމަށް ވަނީ ހަމަޖެހިފައެވެ.