މިއަދުވެސް މުޅި ރާއްޖެއަށް މޫސުން ގޯސް، ސަމާލުވޭ!

މުޅި ރާއްޖެއަށް މިއަދުވެސް މޫސުން ގޯސްވާނެކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ. މެޓް އޮފީހުން ވިދާޅުވީ، އެންމެ ދެކުނުގެ އަތޮޅުތަކަށް ކެރީގެ އަސަރުފޯރާނެކަމަށާއި އަދި އެހެން ހިސާބުތަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާކަމަށެވެ.

ރާއްޖޭގެ ކަނޑުތައްވެސް އާދައިގެ ވަރަކަށް ގަދަވާނެކަމަށް މެޓް އޮފީހުން ވަނީ ވިދާޅުވެފައެވެ. ދެކުނުގެ އަތޮޅުތަކަށް ހުޅަނގުއުތުރާއި އުތުރުން އަދި އެހެން ހިސާބުތަކަށް އުތުރާއި އިރުއުތުރުން ގަޑިއަކު 8 މޭލާއި 18 މޭލާއި ދެމެދުގެ ބާރުމިނުގައި ވައި ޖެހޭނެއެވެ. އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައި ގަދަވުން އެކަށީގެންވާކަމަށް މެޓް އޮފީހުން ވަނީ ލަފާކޮށްފައެވެ.

ރާޅުގެ އުސްމިން ހުންނާނީ 3 ފޫޓާއި 6 ފޫޓާއި ދެމެދުގައިކަމަށް އެ އިދާރާއިން ވަނީ ވިދާޅުވެފައެވެ. ކުރިއަށްއޮތް 5 ދުވަހުވެސް ރާއްޖޭގެ އެކި ހިސާބުތަކަށް މޫސުން ގޯސްވާނެކަމަށް މެޓް އޮފީހުން ވަނީ ލަފާކޮށްފައެވެ.

ވޭތުވެދިޔަ 24 ގަޑިއިރު ރާއްޖޭގެ ގިނަ ރަށްތަކަށް ވާރޭވެހިފައިވާއިރު، އދ. މާމިގިލިއަށް 61 މިލިމީޓަރުގެ ވާރޭ އަދި ވ. ރަކީދޫ އަށް 54 މިލިމީޓަރުގެ ވާރޭ ވަނީ ވެހިފައެވެ.

ރާއްޖޭގެ އިރުން، ބޭ އޮފް ބެންގާލްގެ ހުޅަނގުގައި އުފެދިފައިވާ ކޮޅިގަނޑުގެ ރާއްޖެއާއި ގާތަށް ޖެހެމުންދާތީ ރާއްޖެ ސަރަޙައްދުގައި ގިނަ ޢަދަދެއްގެ ވިއްސާރަ ވިލާ އުފެދެމުންދާކަމަށް މެޓުން ވިދާޅުވެއެވެ.

މިދުވަސްވަރު ރާއްޖެއަށް ވިއްސާރަ ކުރާނެކަމަށް ބެލެވޭތީ، ވިއްސާރައިގެ ސަބަބުން ލިބޭ ގެއްލުން ކުޑަކުރުމަށް ކަމާއި ގުޅޭ އިދާރާތަކުންދަނީ މަސައްކަތް ކުރައްވަމުންނެވެ. އަދި ވިއްސާރަވެ ފެންބޮޑުވުމުގެ ސަބަބުން ލިބެމުންދާ ގެއްލުން ކުޑަކުރުމަށް ރައީސުލްޖުމްހޫރިއްޔާގެ އިރުޝާދުފުޅާއެކު ޚާއްސަ ޓާސްކް ފޯހެއް ވަނީ އުފައްދަވާފައެވެ. މި ޓާސްކް ފޯހުގައި ހިމެނެނީ އެމްއެންޑީއެފްއާއި، ފުލުހުންގެ އިތުރުން އެންޑީއެމްއޭއެވެ.