އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް އަވާހަރަކޮށްލަން އީރާނުން އެއްވެސް އިރެއްގައި ރާވާފައި ނުވާނެ ކަމަށް އެ ޤައުމުގެ ރައީސް މަސްޢޫދު ޕީޒިޝްކިޔާން ވިދާޅުވެއްޖެއެވެ.
މިދިޔަ އަހަރުގެ ނޮވެމްބަރު ޓްރަމްޕް އަވަހާރަކޮށްލަން އުޅުނުކަމުގެ ތުހުމަތުގައި އީރާނުގެ ރައްޔިތަކަށް އެމެރިކާގެ އަދުލްއިންސާފާ ބެހޭ ވުޒާރާއިން ވަނީ ދަޢުވާ އުފުލައިފައެވެ. އެ ޙަމަލާ ދޭން އުޅުނީ، އީރާނުގެ އިންޤިލާބީ ލަޝްކަރުގެ ޢަމުރަށް ކަމަށް އެމެރިކާއިން ވަނީ ތުޙްމަތުކޮށްފައެވެ. އެ ޙަމަލާ ދިނުމުގެ ކުރިން، އެމެރިކާގެ ސަލާމަތީ ބާރުތަކުން ވަނީ އެ މީހާ ހުއްޓުވައި، ހައްޔަރުކޮށްފައެވެ.
އެމެރިކާގެ ރިޔާސީ ކެމްޕޭނުގެ ތެރޭގައި، ޓްރަމްޕް ވެސް ވަނީ އެ މަނިކުފާނު އަވަހާރަކޮށްލަން ރޭވުމުގެ ފަހަތުގައި އީރާން އޮތް ކަމަށް ތުޙްމަތު ކުރައްވައިފައެވެ.
"އެއީ އެއްވެސް ހަޤީޤަތެއް އޮތް ތުހުމަތުތަކެއް ނޫން. މިއީ އެއްވެސް އިރެއްގައި އަޅުގަނޑުމެން ރޭވި ކަމެއް ނޫން، އަދި ކުރިއަށް ތަނުގައި ވެސް ކުރާނެ ކަމެއް ނޫން،" އެންބީސީ ނޫހަށް ދެއްވި ބަސްދީގަތުމެއްގައި ޕީޒިޝްކިޔާން ވިދާޅުވިއެވެ.
އަންނަ ހޯމަ ދުވަހު ޓްރަމްޕް އެމެރިކާގެ ރައީސްކަމުގެ ހުވައި ކުރެއްވުމަށް ހަމަޖެހިފައިވާއިރު، ރިޔާސީ ކެމްޕޭނުގެ ތެރޭގައި އެ މަނިކުފާނު އަވަހާރަކޮށްލަން ދެ ފަހަރެއްގެ މަތިން ޙަމަލާ ދީފައިވެއެވެ. މި ގޮތުން، މިދިޔަ އަހަރުގެ ސެޕްޓެމްބަރު މަހު ފްލޮރިޑާގައި ގޮލްފް ކުޅުއްވަން ހުންނަވަނިކޮށް ޓްރަމްޕަށް ޙަމަލާ ދީފައިވެއެވެ. އޭގެ ކުރިން، މިދިޔަ ޖުލައި މަހު، ޕެންސަލްވޭނިޔާގައި ކެމްޕޭން ޙަރަކާތެއްގެ ތެރެއިން، ޓްރަމްޕަށް ވަނީ ބަޑިން ޙަމަލާ ދީފައެވެ. ނަމަވެސް، އެ ދެ ޙަމަލާގެ ތަހުޤީޤުގެ ތެރެއިން ވެސް އީރާނުގެ ބައިވެރިވުމެއް އޮތް ކަމުގެ ހެއްކެއް ލިބިފައެއް ނުވެއެވެ.
މީގެ އިތުރުން، އެމެރިކާގެ ދާޙިލީ ކަންކަމަށް ނުފޫޒު ފޯރުވަން، ސައިބަރ ޙަމަލާތައް ދެމުންދާ ކަމަށް ކުރެވޭ ތުޙްމަތުތައް ވެސް އީރާނުން ވަނީ އެކި ފަހަރު މަތިން ދޮގުކޮށްފައެވެ. އޭގެ ބަދަލުގައި، އީރާނުގެ ދާޚިލީ ކަންކަމުގެ ތެރެއަށް އެމެރިކާއިން ޒަމާނުއްސުރެ ވަދެ، ނުފޫޒު ފޯރުވާކަމަށް އެ ޤައުމުން ވަނީ ތުޙްމަތުކޮށްފައެވެ.