އެފްރިކާގެ ބައްރުގައި އޮންނަ ޓެންޒޭނިޔާގައި ނުރައްކާތެރި ބައްޔެއް ކަމަށްވާ މާބަރގް ވައިރަސް ފެތުރެމުންދާ ކަމަށް ޝައްކުކުރެވޭ ކަމަށް ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ބުނެފިއެވެ. އެ ޖަމްޢިއްޔާއިން ބުނީ، ޓެންޒޭނިޔާގެ ހުޅަނގުދެކުނުގެ ސަރަޙައްދުތަކުގައި އެ ބަލި ޖެހުނު ނުވަ މީހެއްގެ ތެރެއިން، އަށް މީހަކު މަރުވެފައިވާ ކަމަށެވެ.
އެފްރިކާ ބައްރުން މި ބަލި އެންމެ ފުރަތަމަ ފެނިފައި ވަނީ 1967 ވަނަ އަހަރުއެވެ. އެއަށް ފަހު، ދޭތެރެދޭތެރެއިން މި ވައިރަހުގެ އަސަރު އިންސާނުންގެ ފުށުން ފެނިފައިވެއެވެ. މިއީ ވައުލުގެ ފުށުން އިންސާނުންގެ ހަށިގަނޑަށް ވާސިލުވާ ނުރައްކާތެރި ބައްޔެކެވެ. އަދި، ގައިންގަޔަށް އަރަނީ އިންސާނުންގެ ހަށިގަނޑުން ބޭރުވާ ދިޔާ ތަކެތީގެ ޒަރިއްޔާއިންނެވެ. މި ބަލީގެ އަލާމާތްތަކުގެ ތެރޭގައި ބޮލުގައި ރިހުމާއި, ހޮޑުލެވުމާއި, މަސްތަކުގައާއި ބަނޑުގައި ރިހުން ހިމެނެއެވެ.
މި ބަލި ޖެހޭ މީހުންގެ ތެރެއިން 88 އިންސައްތަ މީހުންގެ ފުރާނައަށް ނުރައްކާވާ ކަމުގައި ޞިއްޙީ މާހިރުން ހާމަކުރެއެވެ. މާބަރގް ވައިރަހަކީ ނުރައްކާތެރި ބައްޔެއް ކަމުގައިވާ އިބޯލާ ފަތުރާ ވައިރަހުގެ ޢާއިލާއަށް ނިސްބަތްވާ ވައިރަހެކެވެ.
މިދިޔަ އަހަރުގެ ޑިސެމްބަރު މަހުގެ 20 ވަނަ ދުވަހު ޓެންޒޭނެިޔާގައި ބަލި ފެތުރުން ހުއްޓުވުނު ކަމަށް އިޢުލާނުކުރިއިރު، އެ ބަލި ޖެހުނު 66 މީހުންގެ ތެރެއިން، 15 މީހުން ވަނީ މަރުވެފައެވެ. ޓެންޒޭނިޔާއާ އިންވެގެން އޮންނަ ރުވާންޑާގައި ވެސް ވަނީ މީގެ މަހެއްހާ ދުވަސް ކުރިން އެ ބަލި ވަރަށް ބޮޑަށް ފެތުރިފައެވެ.
ޓެންޒޭނިޔާގައި 2023 ވަނަ އަހަރު ވެސް މި ބަލި ފެތުރުނެވެ. އެ ފަހަރު އެ ބަލި ޖެހިގެން ހަ މީހުން މަރުވިއެވެ.