ޓެނިހުގައި ރާއްޖޭގައި މުސްތަގުބަލު އެބައޮތް ކަމަށާއި ކުރިމަގުގަ މުޅިރާއްޖެއަށް ޓެނިސް ފުޅާކުރުމަކީ އަމާޒެއް ކަމަށް ޓެނިސް އެސޯސިއޭޝަންގެ ނައިބު ރައީސް އިގްނާޒް މަންސޫރު ވިދާޅުވެއްޖެއެވެ.
ޕީއެސްއެމް "ކުޅިވަރު ވިންދު" ޕްރޮގްރާމްގައި ވާހަކަދައްކަމުން އިގްނާޒް ވިދާޅުވީ މުޅި ރާއްޖޭގައި ޓެނިސް ފުޅާކުރުމުގެ ވިސްނުމާއެކު ރާއްޖޭގެ ބައެއް ހިސާބުތަކުގައި ޓެނިސް ކޯޓުތަކެއް ޤާއިމުކުރުމުގެ މަސައްކަތް ކުރަމުންދާ ކަމަށެވެ. އެގޮތުން ޅ.ނައިފަރާއި، ގދ.ފަރެސްމާތޮޑާގައި ގާއިމުކޮށްފައިވާ ޓެނިސް ކޯޓުގެ މަސައްކަތް ނިމި ބޭނުންކުރަން ފަށާފައިވާ ކަމަށް އިގްނާޒް ވިދާޅުވިއެވެ. އަދި މި ދެ ރަށުގެވެސް ކުޅުންތެރިން ތަމްރީނުކުރުމުގެ މަސައްކަތާއި ކޯޗުންވެސް ހަރަކާތްތެރިވަމުންދާނީ އެސޯސިއޭޝަނުގެ ބެލުމުގެ ދަށުންކަމަށް އިގްނާޒް ވިދާޅުވިއެވެ.
"ޓެނިހަކީ ވަރަށް ބޮޑަށް ޖާގަ ބޭނުންވާ ކުޅިވަރެއް، ވަރަށް އަގުބޮޑު ކުޅިވަރެއް، މެއިންޓެއިން ކުރަންވެސް ފުދޭވަރަކަށް ފައިސާ ބޭނުންވާ ކުޅިވަރެއްއިގްނާޒް މަންސޫރު
އިގްނާޒް ވިދާޅުވީ މުޅި ރާއްޖޭގެ ކޮންމެ ރަށެއްގައި ޓެނިސް ކޯޓެއް ނޭޅުނު ނަމަވެސް ވަކި ސަރަހައްދުތަކަކަށް އަމާޒުކޮށްގެން ޓެނިސް ކޯޓުތަކެއް އެޅުމަކީ ގެންގުޅޭ ވިސްނުމެއް ކަމަށެވެ. އަދި ކުޅިވަރު ވުޒާރާ އާއި ކައުންސިލުތަކުގެ އެހީތެރިކަމާއެކު މުޅި ރާއްޖެއަށް ޓެނިސް ފަތުރާލުމަކީ ވެސް ބޮޑު އަމާޒެއް ކަމަށް އިގްނާޒް ވިދާޅުވިއެވެ.