ޔޫއެފާ ނޭޝަންސް ލީގުގައި ރޭ ޗެކް ރިޕަބްލިކް އާއި ދެކޮޅަށް އިންގްލެންޑް ކުޅުނު މެޗު 2-0 ގެ ނަތީޖާއަކުން އިންގްލެންޑް މޮޅުވެއްޖެއެވެ.
މި މެޗުން އިންގްލެންޑް މޮޅުވެފައިވާއިރު އެ ޓީމަށް ވަނީ 3 ޕޮއިންޓާއެކު ގްރޫޕްގެ ދެވަނަ މަގާމް ލިބިފައެވެ. މިއީ މި ފަހަރުގެ މުބާރާތުގައި އިންގްލެންޑް މޮޅުވި ފުރަތަމަ ފަހަރެވެ. އެ ޓީމު ވަނީ އަމިއްލަ ގައުމުގައި މިދިޔަ ހަފްތާގައި ދުނިޔޭގެ ޗެމްޕިއަން ސްޕެއިން އަތުން ބަލިވެފައެވެ.
ޗެކް ރިޕަބްލިކްގެ ފޯޗޫނާ އެރީނާގައި ކުޅުނު މި މެޗުގެ 25 ވަނަ މިނިޓުގައި ޗެކް ރިޕަބްލިކްގެ އެންމެ ނުރައްކާތެރި އެއް ކުޅުންތެރިޔާ ކަމުގައިވާ ޕަވެލް ސުލްޗް އެލިއަޓް އެންޑަސަން އަށް ކުރި ފައުލަކާއި ގުޅިގެން ރެފްރީ ވަނީ އޭނާއަށް ރަތް ކާޑު ދައްކާ ދަނޑުން ފޮނުވާލާފައެވެ. އެހެންކަމުން މެޗުގެ ގިނަ ވަގުތު ޗެކް ރިޕަބްލިކް އިން ކުޅެފައިވަނީ އެއް ކުޅުންތެރިއަކު މަދުކޮށެވެ.
މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް ދެވަނަ ހާފުގެ ކުޅުން ފެށުނުތާ 2 ވަނަ މިނިޓޫގައި އެލެކްޒެންޑަރ އާނޯލްޑް ދިން ޕާހަކުން އެންތޮނީ ގޯޑޮން ވަނީ ލަނޑެއް ޖަހާ އިންގްލެންޑަށް ކުރި ހޯދަދީފައެވެ.
ތޯމަސް ޓުޗެލްގެ އިރުޝާދުގެ ދަށުން ކުޅެމުންދާ އިންގްލެންޑް އިން މި މެޗުގައި ޖެހި ދެވަނަ ލަނޑަކީ މެޗުގެ 69 ވަނަ މިނިޓުގައި ހެރީ ކޭން ކާމިޔާބުކޮށްދީފައިވާ ލަނޑެކެވެ. މިއީ އޭނާ ގައުމީ ޓީމަށް ކުޅެދިން 123 ވަނަ މެޗުގައި ޖެހި 87 ވަނަ ލަނޑެވެ.
އިންގްލެންޑް މި މެޗުން މޮޅުވެފައިވާއިރު މިއީ ވޯލްޑްކަޕްގެ ސެމީ ފައިނަލުގައި އާޖެންޓީނާ އަތުން އިންގްލެންޑް ބަލިވި ފަހުން އެ ޓީމު މެޗަކުން މޮޅުވި ފުރަތަމަ ފަހަރެވެ.
ނޭޝަންސް ލީގުގައި އަންނަ ހޮނިހިރު ދުވަހު އިންގެލްނޑް ނިކުންނާނީ ކްރޮއޭޝިޔާ އާއި ދެކޮޅަށެވެ.