ރާއްޖޭގެ ޚާރިޖީ ސިޔާސަތައް ބަދަލެއް ނާދޭ، އދ.ގެ ވޯޓުތަކުންވެސް އެކަން ސާފުވާނެ: ޚާރިޖީ ވަޒީރު
-
ދިވެހިރާއްޖެއިން އެއްވެސް ޤައުމަކާއި ހަތުރުވެރިނުވާނެކަމަށް ވަޒީރު ވިދާޅުވި
-
ރާއްޖެއިން އަބަދުވެސް މަސައްކަތް ކުރަނީ ރައްޔިތުންގެ މަންފާ އިސްކޮށްގެންކަން ފާހަގަކުރެއްވި
ބައިނަލްއަޤްވާމީ މައިދާނުގައި ރާއްޖެއިން ގެންގުޅެމުންދާ ޚާރިޖީ ސިޔާސަތައް ބަދަލެއް ނާންނަކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ޚާރިޖީ ވަޒީރު މިހެން ވިދާޅުވީ ސޯޝަލް މީޑިއާގައި ކުރެއްވި ޕޯސްޓެއްގައެވެ.
ރާއްޖެއިން ގެންގުޅޭ ޚާރިޖީ ސިޔާސަތައް ބަދަލު ނާންނަކަން ވަޒީރު ފާހަގަކުރައްވާފައި މިވަނީ، ރަޝިއާ-ޔޫކްރެއިން ހަނގުރާމައިގައި ވަކިކޮޅެއް ނަގާފައިވާ ކަމަށް ސޯޝަލް މީޑިއާގައި ދެކެވޭ ވާހަކަތަކާއި ގުޅިގެންނެވެ.
ޚާރިޖީ ވަޒީރު ޑރ. ޚަލީލް ކުރެއްވި ޕޯސްޓުގައި ވަނީ ރާއްޖެއިން ބައިނަލްއަޤްވާމީ މައިދާނުގައި ގެންގުޅެމުން އަންނަ ޒަމާންވީ ސިޔާސަތުތަކަށް ބަދަލު އައިސްފައި ނުވާކަމަށް ވިދާޅުވެފައެވެ. އަދި މިކަން ރާއްޖެއިން އދ. ގައި ވޯޓު ދެމުން އަންނަ ގޮތަށް ބެލިނަމަވެސް ސާފުވާނެކަން ވަޒީރު ފާހަގަކުރެއްވިއެވެ.
ބައިނަލްއަޤްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލެއް ނުވޭ. އ.ދ. ގައި ރާއްޖެއިން ވޯޓު ދެމުންދާގޮތް ބައްލަވާލެއްވުމުން އެކަން ސާފުވާނެ. ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤްލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ…
— Abdulla Khaleel (@abkhaleel) January 16, 2025
ވަޒީރު ވިދާޅުވީ ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް ކަމަށެވެ. މިއާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތުގެ ތަޞައްވުރު ވަޒީރު ތަކުރާރު ކުރެއްވިއެވެ.
ދިވެހިރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ޤައުމަކާ ހަތުރުވެރި ނުވެ ދިވެހި ރައްޔިތުންނަށް ލާބައާއި މަންފާ ލިބޭ ގޮތަށްކަން ވަޒީރު ފާހަގަކުރެއްވިއެވެ. އަދި ރާއްޖޭގެ މިނިވަންކަމާ ސިޔާދަތަށް ބުރޫ ނާރާގޮތަށް ހުރިހާ ޤައުމަކާއެކީވެސް ގާތް ގުޅުން ބޭއްވުމުގު މައްޗަށް އެ ސިޔާސަތު ބިނާވާކަމަށް ވަޒީރު ވިދާޅުވިއެވެ.
ރާއްޖެއިން މިހާތަނަށްވެސް ބައިނަލްއަޤްވާމީ މައިދަނުގައި ފަލަސްޠީނު މައްސަލަ ފިޔަވާ އެއްވެސް މައްސަލައެއްގައި ވަކި ޤައުމަކަށް ތަޢީދުކޮށްފައި ނުވެއެވެ. އޭގެ ބަދަލުގައި އަބަދުވެސް ވަކާލާތުކޮށް ގޮވާލަނީ ބައިނަލްއަޤްވާމީ މުއާހަދާތަކާއި ޤާނޫނުތަކާއި އެއްގޮތަށް ޤައުމުތަކުން ޢަމަލުކުރުމަށެވެ. އަދި އދ ވޯޓުދެމުންދަނީވެސް މި ސިޔާސަތާއި އެއްގޮތްވާ ގޮތުގެ މަތިންނެވެ.