ޝަންގްރިއްލާއަށް ނޯޓިސްދީފި، މިއަހަރު ތެރޭ ހައްލެއް ހޯދޭނެ: ވަޒީރު ފައިޞަލް

ޝަންގްރިއްލާ އަލުން އޮޕަރޭޝަނަށް ގެނައުމަށް ކުރަމުންދާ މަސައްކަތްތަކުގައި ކުރިއެރުންތަކެއް ލިބިފައިވާ ކަމަށާއި، މިއަހަރުތެރޭ މިކަމަށް ހައްލެއް ލިބިގެންދާނެ ކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.

ރާއްޖޭގެ އެންމެ ދެކުނުގައި ލަގްޒަރީ ފެންވަރަށް ޚިދުމަތް ދިނުމަށް ތަރައްޤީކޮށްފައިވާ ޝަންގްރިއްލާ ރިސޯޓަކީ 284 އެނދުގެ ރިސޯޓެކެވެ. މިރިސޯޓު ހުޅުވާފައިވަނީ ސަރުކާރުގެ %30 ހިއްސާ އާއި ރިސޯޓު ހިންގުމަށް ސަރުކާރާއި ގުޅިގެން ހަދާފައިވާ އައްޑޫ އިންވެސްޓްމަންޓް ޕްރައިވެޓް ލިމިޓެޑުގެ %70 ހިއްސާއާ އެކުއެވެ.

2023 ވަނަ އަހަރުގެ އޮގަސްޓުމަހުގެ ތެރޭގައި ސަރުކާރުން ވަނީ ހިއްސާ ދޫކޮށްލާފައެވެ. ސަރުކާރުން ހިއްސާ ދޫކޮށްލީ ކޯވިޑާ ގުޅިގެން ޝަންގްރިއްލާ ރިސޯޓް ބަންދުކުރުމަށްފަހު އަލުން ނުހުޅުވާ ގިނަ އަހަރުތަކެއްވުމުގެ ސަބަބުން ސަރުކާރަށް ގެއްލުންވަމުންދާތީއެވެ.

ޝަންގްރިއްލާ ރިސޯޓަކީ އައްޑޫގެ ގިނަ ބަޔަކު ވަޒީފާ އަދާ ކުރަމުން އައި ރިސޯޓެކެވެ. ނަމަވެސް އެތަން ބަންދު ކުރުމަށްފަހު، ގިނަ ބައެއްގެ ވަޒީފާ ގެއްލިގެން ދިޔައިރު، އަލުން ރިސޯޓު ހުޅުވޭނެ ދުވަހަކަށް އައްޑޫގެ ގިނަ ބަޔަކު އަންނަނީ އިންތިޒާރު ކުރަމުންނެވެ.

ޝަންގްރިއްލާ ހުޅުވުމަކީ ރައީސުލްޖުމްހޫރިއްޔާގެ ވަޢުދަފުޅުކެވެ. ޝަންގްރިއްލާ އަލުން ހުޅުވުމަށް ކުރަމުންދާ މަސައްކަތްތަކުގެ ފަހުގެ މައުލޫމާތުތައް ހިއްސާކުރަމުން ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވީ އެޓަރނީ ޖެނެރަލް އޮފީހުން މިހާރު ޝަންގްރިއްލާއަށް ނޯޓިސް ދީފައިވާ ކަމަށެވެ. އަދި މިއަހަރުތެރޭ ޝަންގްރިއްލާ މައްސަލައަށް ހައްލެއް ހޯދޭނެ ކަމަށް ވަޒީރު ވިދާޅުވިއެވެ.

"މިހާރު ވަކި ޑޭޓެއް ކިޔާކަށް ނެތިން، ޝަންގްރިއްލާ އިޝޫގަވެސް އަޅުގަނޑުމެން މިހާރުވާނީ އެޓާނީ ޖެނެރަލް އޮފީހުން އަޅުގަނޑުމެންގެ ލަފައާއެކު ވަނީ ނޯޓިސްދީފައި، މިއަހަރުތެރޭ ހައްލެއް ހޯދޭނެ، ދެން ރިނޮވޭޝަންއަށް ނަގާނެ ޓައިމެއް އެނގޭނީ އެތަން ބަލާލީމައި،" ފައިޞަލް ވިދާޅުވިއެވެ.

ވަޒީރު ފައިޞަލް ވިދާޅުވީ އައްޑޫ ސިޓީގައި ފަތުރުވެރިކަން ފުޅާކުރުމަށްޓަކައި އައްޑޫއަށް ބައިނަލްއަޤްވާމީ ވައިގެ ދަތުރުތައް މުހިއްމު ކަމަށެވެ. އަދި މިހާރު އެކަމާއި ގުޅޭ މަސައްކަތްތައްވެސް ކުރަމުންދާ ކަން ވަޒީރު ފާހަގަކުރެއްވިއެވެ.

"ހާއްސަ އިސްކަމެއް ދީގެން ޝަންގުރިއްލާ ހުޅުވުމާއި، އައްޑޫއަށް ޑައިރެކްޓު ފްލައިޓްސް ގެނައުމުގެ ނެގޯޝިއޭޝަންސް ކުރިއަށްދަނީ، މަހަކު 2-3 ފްލައިޓުކުރެވޭ ވަރަށް، އެކަން ކުރެވިއްޖެޔާ މިއާ އައްޑޫ ރައްޔިތުންނަށް ސަރުކާރަކަށްކޮށްދެވޭނެ އެންމެ ބޮޑު ކަންތައް" ވަޒީރު ފައިޞަލް ވިދާޅުވިއެވެ.

ޝަންގްރިއްލާ ރިސޯޓަކީ އައްޑޫގެ އެންމެ ބޮޑު ރިސޯޓެވެ. މި ރިސޯޓުގައި 60 ވޯޓަރ ވިލާ، 26 ބީޗް ވިލާ، 28 ޕޫލް ވިލާ، 16 ޓްރީ ހައުސް ވިލާ އަދި 2 ޕްރެޒިޑެންޝަން ވިލާ ހިމެނެއެވެ. މި ރަށުގެ ބޮޑު މިނުގައި ފަސް ލައްކަ ފަސް ހާސް އަކަ މީޓަރު ހުރެއެވެ.