ޤާނޫނުގެ ދަށުން ރިސޯޓުތަކުން 40 މިލިޔަން ޑޮލަރު މާރުކުރާނެ ކަމަށް ބެލެވޭ

ބޭރު ފައިސާގެ އައު ޤާނޫނުގެ ދަށުން ބޭންކުތަކަށް ބޭރު ފައިސާ މާރުކުރަން ފަށާއިރު، މަދުވެގެން 40 މިލިޔަން ޑޮލަރު މާރުކުރާނެ ކަމަށް ލަފާކުރެވޭ ކަމަށް މަރުކަޒީ ބޭންކް އެމްއެމްއޭއިން ވިދާޅުވެއްޖެއެވެ. ބޭރު ފައިސާގެ އައު ޤާނޫނަށް ޢަމަލުކުރަން ފަށާފައިވަނީ މިމަހުގެ އެއްވަނަ ދުވަހުއެވެ.

މިހާރު ޢަމަލުކުރަން ފަށާފައިވާ ބޭރު ފައިސާގެ އައު ޤާނޫނުގެ ދަށުން ބޭންކުތަކަށް ބޭރު ފައިސާ މާރުކަން ފަށަންޖެހެނީ މިމަހުގެ 28 ވަނަ ދުވަހުން ފެށިގެންނެވެ. މި ޤާނޫނަކީ އޭގެ ކުރިން ހަދާފައިވާ ބޭރުފައިސާގެ ޤަވާއިދަށް ބާރުދިނުމުގެ ގޮތުން ރައްޔިތުންގެ މަޖިލީހުން ފާސްކޮށް ތަންފީޒު ކުރަން ފަށާފައިވާ ޤާނޫނެކެވެ.

މި ޤާނޫނުގެ ދަށުން ފަތުރުވެރިކަމުގެ ދައިރާގެ ވިޔަފާރިތައް ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ފަތުރުވެރިއަކަށް، ބޮލަކަށް ޖެހޭ ނިސްބަތުން ވަކިވަރެއް ރާއްޖޭގެ ހިންގާ ބޭންކުތަކަށް މާރުކުރުމަށް އެ ވިޔަފާރިތަކަށް ލާޒިމްކުރެއެވެ.

އެގޮތުން ރިސޯޓުތަކުން އަންނަ ކޮންމެ ފަތުރުވެރިއަކަށް ބޮލަކަށް 500 ޑޮލަރު މާރުކުރަން ޖެހޭއިރު، ގެސްޓް ހައުސްތަކުން މާރުކުރަން ޖެހޭނީ ކޮންމެ ފަތުރުވެރިއަކަށް 25 ޑޮލަރެވެ. އެނޫނުންނަމަ މި ދެ ގިންތީގައިވެސް ހިމެނޭ ވިޔަފާރިތަކުން އެ މީލާދީ މަހެއްގެ ތެރޭ ބޭރުފައި ފައިސާގެ އާމްދަނީ 20 އިންސައްތަ މާރުކުރުމުގެ ފުރުސަތު ޤާނޫނުން ވަނީ ފަހިކޮށްދީފައެވެ.

ބޭންކުތަކަށް ބޭރު ފައިސާ މާރުކުރަން، އެ ވިޔަފާރިތަކަށް މަރުކަޒީ ބޭންކުގައި ރެޖިސްޓްރީ ވާންޖެހެއެވެ. އެގޮތުން މަރުކަޒީ ބޭންކުގައި ރެޖިސްޓްރީ ވުމަށް ފަހު، އެ ފަރާތްތަކުން އަންނަ ފަތުރުވެރިންނާއި ގުޅޭ ސޭލްސް ރިޕޯޓްތައް މަރުކަޒީ ބޭންކަށް ހުށަހަޅަންޖެހެއެވެ. މީގެ ސަބަބުން މި ޤާނޫނާއި އަދި އެއާއި ގުޅޭ ޤަވާއިދު ތަންފީޒުކުރުމަށް އެމްއެމްއޭއަށް މަގުފަހިވެގެންދެއެވެ.

ބޭރު ފައިސާގެ އައު ޤަވާއިދުގެ ދަށުން ބޭރު ފައިސާ މާރުކުރަން ފެށުމުގެ ކުރިން 3 މަސް ދުވަހުގެ މުއްދަތެއް ވިޔަފާރިތަކަށް ދެއެވެ.

މިއާއެކު މިމަހުގެ 28 ވަނަ ދުވަހު ބޭރު ފައިސާ ބޭންކުތަކަށް މާރުކުރަން ފަށާއިރު، މިހާތަނަށް ރާއްޖޭގެ 175 ރިސޯޓުގެ ތެރެއިން 138 ރިސޯޓެއްގެ ސޭލްސް ރިޕޯޓް އެމްއެމްއޭއަށް ލިބިފައިވާ ކަމަށް އެމްއެމްއޭގެ އޮފިޝަލެއް ވަނީ ކަށަވަރުކޮށްދެއްވާފައެވެ. މިހާތަނަށް ލިބިފައިވާ ރިޕޯޓުތަކަށް ބަލާއިރު 30 މިލިޔަން ޑޮލަރާއި 40 މިލިޔަން ޑޮލަރާއި ދެމެދުގެ އަދަދެއް ބޭންކުތަކަށް މާރުކުރާނެ ކަމަށް ލަފާކުރެވޭ ކަމަށް އެމްއެމްއޭގެ އޮފިޝަލް ވަނީ ވިދާޅުވެފައެވެ.

އަލަށް ޢަމަލުކުރަން ފެށި ބޭރު ފައިސާގެ ޤާނޫނުގެ މަޤްޞަދަކީ، ރާއްޖޭގައި ބޭރު ފައިސާއިން ކުރެވޭނެ މުޢާމަލާތްތައް ކަނޑައަޅައި، ބޭރު ފައިސާ އެތެރެކޮށް ބޭނުންކުރުމާއި ގެންގުޅުމާއި އަދި ޖަމާކޮށް މާރުކުރުމާއި ގުޅޭ އުސޫލުތައް ކަނޑައަޅައި ހިންގުމަށް ބޭނުންވާ ޤާނޫނީ އޮނިގަނޑެއް ކަނޑައަޅައި އެކުލަވާލުމެވެ. މި ޤާނޫނުގެ ދަށުން އިސްތިސްނާވާ މުޢާމަލާތްތައް ފިޔަވައި އެހެން ހުރިހާ މުޢާމަލާތްތައް ކުރަން ޖެހޭނީ ދިވެހި ރުފިޔާއިން ކަމަށް ވަނީ ބަޔާންކޮށްފައެވެ.

މި ޤާނޫނަށް ޢަމަލުކުރަން ފެށުމާއެކު ގިނަ ފައިދާތަކެއް ލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެެފައެވެ. އެގޮތުން ސަރުކާރު ހިއްސާވާ ކުންފުނިތަކަށް ބޭންކު ރޭޓުގައި ޑޮލަރު ލިބެން ފެށުމާއި، އަންނަ އަހަރު ފުރަތަމަ ކުއަރޓާއިން ފެށީގެން ފުރާ ކޮންމެ މީހަކަށް ދޫކުރާ 500 ޑޮލަރު 1000 ޑޮލަރަށް ބޮޑުކުރުން ހިމެނެއެވެ. މީގެ އިތުރުން ކްރެޑިޓް ކާޑު ލިމިޓު 1400 ޑޮލަރަށް ބޮޑުކޮށްދެވޭނެ ކަމަށް ރައީސުލްޖުމްހޫރިއްޔާ ވަނީ ހާމާކުރައްވާފައެވެ.

މިމަހުން ފެށިގެން ފަތުރުވެރިކަމުގެ ވިޔަފާރިތަކުން ޑޮލަރު މާރުކުރަން ފަށާއިރު، އަހަރެއްގެ މައްޗަށް އާމްދަނީގެ ގޮތުގައި 15 މިލިޔަން ޑޮލަރަށް ވުރެ މަތިން އާމްދަނީ ލިބޭ އެހެނިހެން ވިޔަފާރިތަކުންވެސް އާމްދަނީގެ 20 އިންސަތައް ބޭންކްތަކަށް މާރުކުރުމަށް ޤާނޫނުން ވަނީ ލާޒިމްކޮށްފައެވެ.